*********************************************

(3)

يوم الخميس زي عادتنا كنا مجتمعين انا والربع فالاستراحه وخالد للحين ما جا صار دايم يتأخر لكن عمره ما تركنا,كنا جالسين بعضنا يلعب ورقه والباقين يسولفون,انا كنت العب وسمعنا صفقة الباب اللي برى وبما ان خالد اللي ناقصنا عرفنا انه هو,وبدى التعليق اللي يقول جانا العريس والثاني يقول الله يعينا عليه من اول ما وقف زقاير وهو نار شابه,قلت لهم:كلش الا خويي عاد لحد يغلط عليه وانا موجود ...وقعدنا نضحك ,فتح باب الغرفه والتفت اسلم عليه ماحسيت الا واحد يرفعني من القلابي ويلزقني عالجدار بقوه,لما حاولت اعرف من هو الا هو خالد كان معصب ويصرخ في وجهي ويدفع جسمي عالجدار بطريقه عنيفه, كنت مصدوم واطالع فيه مو فاهم شاللي صاير حتى ربعنا يطالعون بتعجب ولما استوعبوا ان السالفه هوشه قاموا يفكونه عني, في هاللحظه انا للحين ما بعد استوعبت الموقف بس يوم شفتهم يسحبونه عني حسيت انهم اوجعوه بديت ابعدهم معه واحاول احميه بيديني كنت خايف عليه وجسمه صار احمر من تسحيبهم الشديد وانا لهاللحظه ما ادري وش صاير لكنهم كانوا اكثر منا وقدروا يمسكون كل واحد في جهه,سامي كان يسأل خالد بعصبيه: انت صاحي؟!! وش جاك انهبلت؟!وش صاير؟!ورد خالد بصوت انسان ثاني ما عرفه وياليته ما تكلم: اسأل هالجبان اللي قدامكم وش سوى لا تسألوني انا.. في هالوقت بديت استوعب الموقف...خالد قدامي في حاله عمري ما شفته فيها,معصب والكلام يطلع مقطع منه بسبب تنفسه السريع,نظرته ماغيرها تطل من عيونه بس الحقد حل محل البراءه؟؟كان كل شوي يحاول يتخلص من يدينهم عشان يضربني!! تصوروا!!بعد كل هالعمر وهالعشره يضربني انا بندر صديق عمره ورفيق دربه,قلت له وانا احاول اقرب عنده اهديه:وش بلاك ياخالد انا وش سويت ياخوي؟! رجع يحاول يتهجم علي وابعدوني عنه بسرعه..لا تقول ياخوي انا لاني اخوك ولا اتشرف اكون اخوك وبصوت تخالطه البحه من شدة الصراخ وهو يمسك راسه بين يدينه بعصبيه..وبعدين لا تقول وش سويت ياحقير لا تنرفزني زياده...خفت عليه كان يصارخ ما يتكلم ويطلع كلامات زي السم...لما ما تكون قد الكلام اللي تقوله لا تقعد تتفلسف علي يا اكبر كذاب..قال سامي..خالد وش هالكلام؟!! كبر عقلك وخلنا نفهم القصه...صرخ فيه..انتم لا تتدخلون ورجع يطالعني وهو يضرب على صدره بقهر واضح..انت ما شفتني اموت فاليوم عشرين مره وانا احاول بكل ما فيني اني اوقف زقاير ليش تقولهم اني كنت ادخن ليش؟!...كنت هاللحظه زي الغبي وعيوني بتطلع من مكانها رديت.. خالد انا قلت لك محد جاني ولا احد سألني--..كلامي زاد ثورته وقام يتحرك زي المجنون..هذا اللي يبي يذبحني، بندر لا تكذب لا تكذب ما ابي اسمع منك ولا كلمه صحيح انهم رفضوني بس ما يهم البنت بدالها الف وبدت نبرة صوته تخف حدتها..لكن انت ليش سويت كذا يا بندر ليش؟! الكلام اللي قلت لي ذاك اليوم كان كله كذب وتمثيل؟!!على 2الأقل ليش توعدني وتخلف لو قلت انك بتعلمهم كان تفهمت الموضوع, انت حطيتني في اصعب موقف، معقوله استخسرت السعاده اللي انا كنت عايشها ولا قدرت تستحمل فكره اني ابعد عنك شوي!! معقوله يابندر انت من بد هالعالم كلهم تسوي فيني كذا هذا جزاي اني عزيتك؟؟!..رجعت النبره العاليه.. ما توقعتك كذا ابدا انت انسان اناني تعرف يعني ايش اناني؟! حاولت اتمالك نفسي ورديت بصوت هادي قد ما اقدر...بس لا تكمل لا تقول كلام تندم عليه بعدين يا خالد لا تظلمني وانا اخوك... ضحك بسخريه..اندم!!اندم على ايش والا ايش؟! على العشره الحلوه اللي كانت بيننا والا على16 سنه اللي ضيعتها من حياتي على واحد مثلك والا عالانسان اللي توقعته صديقي وما طلع----وقبل ما يكمل كلمته هالمره انا اللي تخلصت من يدينهم وهجمت عليه ورميته عالأرض, ولما ثبته تحتي رفعت يدي لكنها وقفت وكل عضله فيني ترجف رجفه فظيعه,لان اللي تحتي كان خالد,خالد الرفيق !! خالد الغالي !! يارب انا وش قاعد اسوي معقول امد يدي عليه؟! صرخت في وجهه...اسمع يا خالد كل الكلام اللي قلته ممكن اتغاضى عنه عشان المعزه اللي لك بقلبي ولاني متأكد انه فيه سوء فهم فالموضوع اما انها توصل فيك انك تقول اللي بيننا ما كان شي فهذا اللي ما راح اسمح لك تقوله فااااهم؟!...خلص يدينه من يديني ودفعني من فوقه.. اقول ابعد عني بس... وقف وانا للحين على الارض...اسمع يا بندر هي كلمه و رد غطاها ما عاد ابي اشوفك ولا عاد ابي اسمع صوتك او حتى طاريك وكل اللي كان بيننا اليوم انتهى, الانسان المخادع اللي ما يقدر الصداقه ماله مكان في حياتي ابد, واذا كنت سويت هالحركه خايف انك تفقد جزء مني يا طفل ابيك تدري اللحين انك فقدتني للابد.
طلع من الاستراحه بنفس الحال اللي دخل فيه واشرت لسامي وانا احس بأرهاق شديد :اطلع معه الله يعافيك لا يسوق السياره وهو على هالحال بعد هو مب ناقص جنون فالسواقه..لكنه رجع بعد دقايق يقول انه ما قدر يلحقه.
انتشر الهدوء بعد طلعة خالد وكانوا كلهم يطالعوني مو عارفين وش يقولون,كانوا مصدومين مثلي واكثر,وقفت ويدي على قلبي حسيت اني مخنوق وانا احاول استجمع القوه اللي باقيه فيني قلت:عذرا ياشباب متأسف على الفصل البايخ اللي صار قبل شوي, يالله انا ماشي... سألني سامي بتردد واضح:لحظه قبل ما تمشي يابندر صحيح الكلام اللي قاله خالد؟!هزيت راسي بأسى وانا امسك دموعي اللي عصتها شيمه الرجال وبابتسامه رديت:ليش استغرب منكم انكم تصدقون هالكلام فيني اذا كان خالد خوي الروح قدر يصدقه؟!!!!مع السلامه.. وطلعت, لحقني سامي...خلني اوصلك للبيت يا بندر تراك على طريقي...شكله حاس بتأنيب ضمير وراحمني وهذا اللي ما احبه رديت...لا مشكور انا بخير لا تشغل بالك...وركبت السياره ومشيت.
فالبيت الوالده وريم كانوا فالصاله لما دخلت, واستغربوا رجوعي بدري..بعد السلام سألت الوالده باهتمام:بندر يمه وش فيك؟!... ريم بعد قالت شي زاد الالم اللي في قلبي:عسى ما شر يابندر خالد فيه شي؟؟؟…حاولت امثل اني معصب ..انتِ ماتفهمين؟!! كم مره اقولك يارويم لا تتفاولين على العالم، يا جماعه كل اللي صار ان احنا تفرقنا بدري الليله عادي وشفيكم؟!...قالت الوالده...ياولدي وجهك متغير انا امك واحس فيك قلي يا امي من اللي مضيق صدرك؟!.. قالت ريم: لا يكون متطاق مع واحد من العيال؟؟..قالت امي..وش دعوى ما تعودنا منك ياوليدي هالحركات؟!!
كنت عارف ان شكل ثيابي يدل على اني توي طالع من هوشه…قلت لهم:ريحوا بالكم تهاوشت مع واحد من الشباب بس جت سليمه خلاص عاد فكوني, قالت ريم:اكيد بتجي سليمه اذا كان خلود المرعب ابو المشاكل هو اللي دايم يفزع معك المفروض محد يقرب لمك،هزت راسها كنها تذكرت شيء مو حلو...يمه منه ذاك الولد شراني ياكثر ما صيحني وحسرني وحنا صغار،تذكرين يمه ذيك الايام؟!…ابتسمت امي...اول سنتين من نقلتنا للرياض ماكنت اربط شعرك دايم تجيني تصيحين من تمعيطه لشعرك..قالت ريم..وتضحكين بعد يمه المشكله ان ولدك ذا كان يطقني معه ما كني اخته الحمد الله والشكر... قالت امي..صحيح ان خالد كان شيطان وهو صغير بس والله ان الولد والنعم فيه شوفي وش صار الحين... آلمني كلامها زياده بس سويت الوضع عادي ووجهت كلامي لريم...وانتِ وش تبين ما عندك الا خالد وخالد؟!بعدين تستاهلين رازه وجهك عند العيال فالشارع دايم وهو معتبرك اخته...حسيت اني احرجتها وردت.. انا والا انت اللي ما عنده الا خالد؟!!.. قطعت الحوار و رحت للغرفتي...

****************

(4)



قعدت في فراشي استرجع اللي صار معقوله خالد يسوي معي كذا ويقول عني هالكلام, وبدون حتى ما يفكر وقدام هالعالم كلهم؟!! لا اكيد انا احلم اصلا اللي شفته اليوم انسان ما اعرفه!!!ورغم الإهانه اللي كنت احس فيها والجرح اللي في قلبي الا اني دست على مشاعري ورحت ادق عليه لازم افهم وش اللي مضايقه لهالدرجه ليش؟؟ لانه مو اي واحد لكنه للاسف عطاني مشغول بعدين قفل جواله !!
جلست في بيتنا ثلاث ايام لا رحت للاستراحه كالعاده ولا استقبلت مكالمات من احد حتى اهلي مستغربين ,لكن لان طبعي كتوم ما قدروا يعرفون أي شي.
كانت هاذي اول ثلاث ايام ما اشوف خالد فيها واحنا في نفس المكان مرت علي كنها ثلاث سنوات ,ورغم اللي سواه معي الا انه وحشني حيل واشتقت له ذاك الشوق اللي تحسه يوجعك مو بس نفسي الا تحس شيء يألمك من جد اذا فاهميني!!! ,لكنه الله يسامحه ما حاول يعطيني أي فرصه عشان اتصل عليه.
اتصلوا الشباب من الاستراحه وكانوا حاطينه عالسبيكر وسلموا علي وسألوا عن احوالي عاد واحد منهم اسمه ماجد قال:وينك من زمان عنك يارجال كبر راسك علينا والا عشان خويلد ما عاد يجي صرت انت بعد ما تجي؟!
سمعت كان احد ضربه وسكته المهم قلت:معليش ياشباب انا هاليومين ما اعتقد اني بجي للاستراحه مالي نفس سامحوني..قال سامي:وشرايك نجيك للبيت اذا ما عندك مانع؟!...استغربت بس رديت..بالعكس حياكم الله أي وقت البيت بيتكم...خلاص اذا شفنا يوم مناسب بندق عليك... خير انشاءالله الله يحييكم أي وقت...مع السلامه..
بعد شوي دق خالد!!!!!!!!معقوله ماني مصدق عيوني وش القصه؟! قعدت ساعه اطالع الأسم ابي اتأكد انه فعلا هو، لكن للاسف سويت شي بظل ندمان عليه طول عمري,عطيته مشغول وقفلت الجوال,ليش سويت كذا ما ادري اظن انها كانت ردة فعل طبيعيه بعد اللي صار لي معه وما اعتقد احد يلومني,يمكن ابي ارد له اللي سواه او كنت عارف لو رديت انه بيكون لي فضل عليه وهذا اللي ما ابيه المهم هذا اللي صار,لكن الوضع استمر صار يدق علي وانا ما ارد كنت اعاند قلبي قبل لا اعانده هو, صار يرسل مسجات يترجاني فيها اني ارد لكن اللي فهمته من بعض المسجات انه يبيني اسامحه لانه اكتشف انه غلط بحقي ومن هالكلام اللي خلى عنادي يزيد...
بعد يومين دق علي طلال اخو خالد الكبير هو بعد صديق عزيز يجلس معنا من فتره لفتره فالاستراحه وكنت اغليه من غلى اخوه واحترمه كثير ولا قدرت اصفطه رغم اني عارف سبب المكالمه ورديت: مرحبا طلال... هلا وغلا وش اخبارك وعلومك يابندر؟...ابد والله تمام...انت أخبارك واخبار الأهل؟...تسلم كلهم تمام, بندر ياخوي!!.. ســــم؟ ...سم الله عدوك, انا داق عليك عشان موضوع خالد انا عارف انك ماتبي احد يتدخل فالموضوع حتى خالد مو راضي يتكلم انا عرفت من الشباب وفكرت كثير قبل اكلمك لكني ماقدرت اشوف حالة اخوي كذا واصفط يديني, الصراحه من ذاك اليوم وهو مو خالد اللي نعرفه لا يروح ولا يجي ماعاد يسولف ولا يضحك حتى الاكل دايم ما يشتهي!!والوالده ضايق صدرها عليه تحسب انه زعلان على البنت وتقول لاخواني وين بندر عنه محد بيوسع صدره الا هو!!، صار طول الوقت في غرفته خاصه لما عرف انه مالك يد فاللي صار، وليتها جت على كذا خالد رجع يدخن بعد بس هالمره بشكل يخوف يابندر...قلبي انقبض بس رديت...والله ياطلال انا مقدر موقفك وخوفك على اخوك واعرف ان قلوبكم على بعض دايم وصدقني اخر شيء اتمناه ان خالتي يضيق صدرها وانت عارف زين اني اعتبرها امي الثانيه لكن انا ما غلطت معه ابد,هو اللي جاني ونسف كل شي حلو كان بيننا في لحظه غضب... طيب ماتبي تعرف وش القصه وليش خالد سوى معك كذا؟.. مهما كانت القصه ما تعطيه الحق انه يسوي اللي سواه ترانا ماعدنا صغار وانا اخوك,بالله هاذي طريقه يعاملني فيها؟!! والله اني ما شفته يسوي كذا مع الناس اللي كان يتهاوش معهم وهو مراهق، خالد قدر يقول عني كلام يجرح بدون ما يراعي أي شي ويصدق فيني كذبه بدون حتى ما يعطيني فرصه ادافع عن نفسي...تنهد طلال.. ياخوك اللي صار ان اهل البنت قبل لا نحدد الملكه رفضوا فجأة يقولون انهم عرفوا انه يدخن او على الاقل كان يدخن ولا عندهم استعداد انهم يجازفون ,ومن ضمن الكلام فهمنا ان اللي قالهم بندر وانجن خالد لما سمع اسمك كان مصدوم وقعد يصارخ يقول كيف يسوي فيني كذا وهو وعدني؟!وطلع وصار اللي صار لكن اللي فهمناه بعدين انه طلع بندر ولد جيرانا بس تبي الصراحه ما احد من اخواني جا على باله كلنا رحنا لك على طول لما سمعنا الاسم... ضحكت بتعجب وانا اقول في قلبي "هذا الشيء التافه هو اللي خلاك تظلم خويك ياخالد؟!!"رديت على طلال...والله هذا مو ذنبي ولا هو عذر للي سواه معي خالد ظلمني وكسر في داخلي شي عمره ما يتصلح والله انه غالي وانا مسامحه ياطلال ولا ابي شيء منه بس صدقني ما اقدر --وحسيت اني ماعاد اقدر اكمل...بنبره هادئه رد طلال..على كلا انا حبيت افهمك اللي صار وانتم رجال وفاهمين وش تسوون وانا ما اقدر الومك على شيء بس هذا اخوي يا بندر ولازم احاول اسوي اي شي... اعذرني ياطلال ياليتك جيتني في شي ثاني والله رقبتي سداده ... اصيل ما تقصر يابندر اشوفك على خير...مع السلامة...لما عرفت التفاصيل ضاق خلقي زياده كنت اتمنى ان الموضوع يكون اكبر يعني معقوله يسوي كل ذاك الفصل عشان تشابه اسماء؟! شي يحز فالخاطر صراحه صحيح ان خالد معروف عنه انه عصبي ولا يقدر يضبط نفسه بس هالكلام المفروض ماينطبق علي،على الأقل مو بهالطريقه اللي صارت!!بأختصار حسيت اني مثلي مثل غيري بالنسبه لخالد...
فاليوم الثاني جت الوالده تصحيني الساعه10الصبح ...يمه بندر اصحى خالد عند الباب...كنت متوقع ان هالشي بيصير وحاسب حسابه ..قولي له نايم...قلتها وانا اغطي راسي بالبطانيه..حاولت تسحبها من فوقي ... يوه اقولك خالد عند الباب وش بلاك ياولدي...على صوتي شوي... عارف انه خالد سمعتك من المره الاولى وانا اقولك نااااايم... تعجبت الوالده من تصرفي لاني اول مره اسويها لكني ما عطيتها فرصه عشان تستفسر, طلعت من غرفتي وانا نطيت من فراشي للشباك على طول, كنت اشوف سيارته لكن ماقدرت اشوفه حاولت منا ومنا مافي مجال.
صار يمر على بيتنا يوميا الظهر والليل وانا اتهرب منه واصرفه ولا عمري طلعت له,ودروا اهلي ان بيني وبينه شي اصلا واضح مايبي لها ذكاء, اما جوالي صار مايسكت سواء مكالمات من خالد او من الناس اللي يحاولون يصلحون بيننا و مسجات طول الوقت حتى اذا قفلته وفتحت الثاني او سوا كان يدق عليهم على طول,ما ادري العب على مين هذا خالد اللي يعرفني زين ويعرف كل ارقامي وحتى لو كان عندي رقم محد يعرفه فهالكلام ماينطبق عليه...


***************************

***************************

(5)
ذاك اليوم اشتقت له ورجعت بي الذكريات لايام الابتدائي وياكثر المواقف اللي حصلت لنا لان اللي يصادق واحد مثل خالد تتحول حياته لمغامره، مره في الصف السادس اذا ما خاب ظني كان الاستاذ مسوي مسابقه اللي يفوز بيصير"العريف"اللي ينظم الفصل اذا ما كان الأستاذ موجود..!! والله ايام وحشتني، المهم انا كنت ميت عشان اصير هالعريف اجي بدري، واشارك، وصاير مؤدب"ثقيل دم على قولة خالد"كان مايحب الاشخاص اللي مثلي يهتمون بالدراسه ويحبون المدرسين او يتمصلحون عندهم على قولته بس سبحان اللي جمعنا مع بعض كان يقول...ليش تبي تصير عريف؟!! ترى العيال بيكرهونك..ما اهتميت لكلامه ورديت..ابي اصير كيفي!! بعدين يا غبي بخليك تطلع وتدخل على كيفك..لا مو لازم انا اسوي اللي ابي حتى لو ماكنت انت العريف...المهم قبل لا يختار الأستاذ بيومين شريت بلونات وجبتها للمدرسه، خالد كان مريض و غايب بس انا والشله رحنا ومليناها مويه واول ما انتهى الدوام رميناها من فوق وانحشنا، يمكن بتقولون وين الولد المؤدب لكن انا بعد خالد صارت تجيني طلعات، توقعت الموضوع محد بيدري عنه لكن من بكره اول ما جيت الصبح قالوا لي العيال ان الأستاذ يسأل عن اللي جاب البالونات وسوى الحركه اللي امس، هنا انا قلت على العريف السلام، هالاستاذ مايصدق، رحت لخالد اللي متجمعين عليه كل العيال بما انه كان غايب امس، علمته باللي صاير وهو يدري انا وش سويت امس لاني قلت له السالفه واحنا جايين للمدرسه، قال خلاص ولا يهمك انا اتفاهم مع الأستاذ كنت اعتمد عليه كثير، لما بدت الحصه دخل الأستاذ وبنبره كانت تخلينا ننتفض..اللي رمى البالونات امس يوقف.. محد رد فالبدايه كان ماسك مسطره وش كبرها الله يسامحه...شوفوا لو ما تكلمتوا بعاقب الفصل كله...ناظرت خالد وانا بموت من الروعه ابتسم وغمز.لي بعدين وقف ...انا يا استاذ...قالها كنه محرر القدس!!قرب الأستاذ من عنده وسحب اذنه... والله اني عارف انه ما في غيرك ياخالد يسوي هالحركات، انت متى بتعقل ليش ما تصير مثل اخوانك او مثل صديقك بندر جننتني معك ياولد!!...
الصراحه ما توقعت ان خالد بيتحمل اللي صار بدالي؟؟! فعلا كنت مستغرب والدليل اني قاعد اتفرج وهو يتعاقب وانا ساكت!!طبعا الأستاذ كسر المسطره على يدينه يا حرام وانا احس ان عقلي بيطير من المنظر بعدين وداه للمدير...في نفس الحصه اختارني الاستاذ عريف وطبعا ما تهنيت فالخبر لاني ما ادري وش صاير مع خالد ذاك الوقت.. لما انتهت الحصه كان واقف قدام غرفة المشرف وحوله بعض الاولاد، يوم شافني ركض ولمني...احلىىىىىىى اخيرا وصلت اللي تبي مع وجهك...انا ما كنت اقدر اتكلم اشوف يدينه حمر من الطق ويفركها على جسمه ووجه الاسمر تخالطه حمره بسبب المرض وهو يضحك...قلت وانا متنرفز يمكن من الأحراج...خالد ليش سويت كذا انا ما قلت لك—قاطعني...يا بن الناس يعني اول مره انطق خلاص مشها يالله لازم نحفل اليوم...من بعد اللي صار عمرنا ما تكلمنا عن هالسالفه شكله نساها او ما اعتبرها شيء بس عمري ما نسيت صحيح اننا كنا صغار لكن فزعته هاذي لا يمكن انساها...
هالذكريات شوقتني له و رحت اتفرج على صورنا وعلى اشرطة الفيديو ,عجبني كيف كنا مره قريبين من بعض ولا في مكان يطلع فيه واحد الا الثاني جنبه,اغلب الاشرطه ما قد شفتها من قبل كانو حوالي العشرين شريط شي لسفراتنا وشي لطلعات البر وكلها شفتها في يوم واحد ورى بعض,اكتشفت اني طول الوقت اطالع فيه هو حتى فالصور عيني عليه بس, وطوال وقت عرض الاشرطه وانا اضحك عليه كان بطبعه خفيف دم محد فهالدنيا يخليني ابتسم او اضحك اوحتى يجنني مثل ما يسوي ,واحد من الاشرطه كان فيه مقطع اثر فيني كثير كنا مخيمين فالصمان واحد من الشباب يصور ومعه خالد, مروا على اغلب الشباب, اللي ينصبون الخيام واللي ينزلون الاغراض وخالد كان ماخذ دور المقدم عشان يتهرب من الشغل كالعاده هو واللي معه وقعد يسوي مقابلات معاهم ويستهبل عليهم وانا اضحك طول الوقت على طريقه كلامه وتعليقاته لما جا دوري كنت قاعد اشب الفحم ومعطيه ظهري قرب مني...عاد جينا الحين لاغلى انسان...كنت مشغول باللي معي...هلا هلا خلود,مسوي فيها مذيع يعني؟!!ما ودك تساعدني بدال هالخرابيط ازعجت العالم ياعمي...كان يوجه كلامه للكاميرا وحاط يده على ظهري وانا مو معطيه وجه ...هالولد اللي تشوفونه عرفته من يوم احنا صغار عزيز وغالي علي ولا ابدله بكنوز الارض...قاله اللي يصور: ما اقدر انا على هالكلام!! يا بعدي هاللي انت كاشخ فيه وتمدحه من الصبح حتى ما عطاك وجه وانت تتكلم... طالعني بنظرات ما انتبهت لها ذاك الوقت كانت تحمل معاني حلوه... كمل كلامه..ولله لو ايش يصير ما يتغير شي من غلاه... تجمعت الدموع وانا اسمع كلامه مع اني ذاك الوقت واضح اني ما انتبهت لـ أي كلمه جتني مشاعر متضاربه كنت اقول في نفسي "كلام رائع لكن ماطبقته ياخالد باللي سويته فيني", سكرت الفيديو ورحت انام او بالاصح احاول انام.
يوم الثلاثاء رجعت للبيت متأخر ولما وصلت عند الباب شفت سيارته, كان يستنى داخلها والله وحده اللي يدري من متى,وعلى ما يبدو لي من طريقة قعدتة وتكتيفة يدينه انه نايم لأن راسه مايل على جنب بس شكله متغير مره!! اول شي لحيته بدت تطلع,شعره تركه يطول بدون ما يرتبه وهاذي مو عادته ابد,واضح ان جسمه ضعف يعني كأنه واحد توه طالع من السجن...
وقفت سيارتي لكنه ما حس ما ادري وش اللي خلاني اصفق باب سيارتي بقوه عشان ينتبه .. يمكن ما كنت ابغى انتظاره يطول،فز من نومته و نزل بسرعه ،ناداني وصوته تخالطه بحه واضحه،وخالد من النوع اللي صوته يروح بسرعه اذا صارخ او اذا صار مريض حسيت بتعبه,لكني ما التفت له وسويت روحي ما اسمع ودخلت للبيت, الرجال قعد يطق الباب زي المجنون لدرجه اني خفت يصحي الجيران ويفضحنا قدام العالم وانا واقف عنده من داخل منزل راسي واسمعه ...افتح يابندر خلني اكلمك الله يعافيك لا تسوي فيني كذا يابندر... كان كل مره ينادي فيها باسمي بصوته اللي مره تسمع الكلمه ومره ماتسمعها اتألم بس من جد ما ادري وش قوة القلب اللي جت لي فجأة وخلتني اتماسك ولا اطلع له كل ما مر الوقت زاد عنادي, بعد فتره سمعت صوت جسمه ينسحب على بابنا كنه يقعد فالارض ,رحت اركض بافتح الباب خفت انه صار له شيء,لكن سمعت صوته يكلم نفسه لانه توقع اني دخلت داخل خلاص...سامحني يا بندر انا اسف والله اسف ... وانا اسمعه كنت كني اسمع اعتذار من طفل متأكد ان اللي قدامه ماراح يسامحه, جلست على الارض وحطيت راسي بين يديني وسندت ظهري للباب من داخل , وانا افكر في نفسي"معقوله اللي قاعد يصير معنا يارب؟!!"والله دنياغريبه، وجلسنا ساكتين، بعد فتره سمعته يتحرك ويركب سيارته.
بعد يومين جاني واحد من ربع الثانويه اسمه نواف كانت علاقته قويه مع خالد والى الحين وهم ربع بس هو مو من شلة الأستراحه ابتسمت اول ماشفته تذكرت على طول هباله هو وخالد ايام كانوا يرقصون سامري فالصف كانوا اجرأ اثنين وكيف جتهم تهزيئه من المدير خلتهم ينسون الرقص كله وسبحان الله وشلون تغير هالنواف وصار شيء ثاني رغم ان خالد لازال على جنونه...
ماقال شيء عن الموضوع لكن جيته صدقوني كان لها اثر في نفسي ذكرتني بأشياء كثيره واظن ان هذا مقصده من الزياره..


***************************

***************************
(6)

جاني مسج من خالد فاليوم الي بعده وكان مقطع من اغنيه تعجبنا ودايم نرددها يقول المسج:

*ما جيت ابسأل جروح او سبه غيابي..
المشكله"اعرفـــــــك" اكثر من أسرارك..
وأكثر من جــــــــــــروح قلبي ورقه اعتابي..
((قلي بعد هالـــــفراق وش آخر اخبارك))؟؟!!

المسج اثر فيني لان خالد مو راعي مسجات ولا يعترف فيها، رجعت بي الذكرى لايامنا الحلوه وقررت ارسل له مسج كرد من نفس هالاغنيه بعد بتعديل بسيط مني:

*ماهي غريبه اذوق وانطفي بنارك
ولا هي بعيده اشوف الجرح باحبابي
حاولت أنسى ولكن ضاعت اعذارك
مادام جرحك ((يالرمت))مكتوب بكتابي!!

يوم الخميس اتصل سامي:هلا بندر...فرحت بمكالمته ذكرتني بالجمعات فالأستراحه...هلاااااااااااااااا سامي وش الاخبار...تسلم, وش دعوى يارجال وين الناس اشتقنالك...تشتاقلك العافيه ياخوي...فاضي اليوم نمرك انا والشباب بين عشوين؟...الساعه المباركه حياكم الله والله ودي بشوفتكم...اجل نشوفك اليوم انشالله... لا تطولون صلو في مسجدنا مع السلامه.
جو الشباب على موعدهم على انهم ما صلوا عندنا ورحت افتح لهم, ماشاء الله كان الكل جاي ما ادري وش الغلا اللي جا لي فجأة, ولما اكتملت المجموعه وانا ارحب فيهم قبل لا اسكر الباب دفعه واحد فتحته بسرعه وقبل ما اشوف مين قلت..السموحه ماشفتك يـــا...كان خالد!!!ما عرفت وش المفروض تكون ردة فعلي ،لما تلاقت عيوننا بعد كل هالغيبه حسيت كني بطير من الفرحه في داخلي وانا احاول بكل ما اقدر اني اخفيها واني ما انط عليه واحضنه,ابتسم ذيك الابتسامه الحلوه واللي وحشتني حيل وهو زي ماتقولون كنه واحد غرقان ورد النفس...فتح يدينه عشان يلمني لكني بكل جمود مديت يدي وصافحته بدون أي كلمه!!قبل لا يصير في خاطركم شيء علي تذكروا اللي سواه فيني وش ممكن تكون ردة فعل اي احد فيكم، فالأخير احنا بشر ولنا مشاعرنا وانفعالاتنا اللي مو دايم لها تفسير ولا نقدر نتحكم فيها مهما كانت مكانة الشخص بالنسبه لنا..
الشباب سبقونا للمجلس,اصلا كان واضح القصد من هالزياره اكيد خالد هو اللي جابهم كلهم,توجهت للمجلس لكنه سحبني من ذراعي ناحيته بقوه, وبصوت هامس يحمل كل معاني الندم والرجا...معقوله ما وحشتك؟!!.. مارديت عليه وكمل كلامه...لمتى يابندر بتظل تتجاهلني, كلمني رد علي,هزئني اوحتى اضربني انا راضي واستاهل لكن لا تسوي فيني كذا حرام عليك والله اني تعبان وفهمت غلطتي وعارف اني ما اقدر اعوضك لكن هالعقاب والله فوق طاقتي يكفيني يابندر انت بالذات تدري اني مالي غنى عنك...كان قلبي يقول لي...ياخي خذه بحضنك وانسوا كل هالالم لكن الله يلعن ابليس ،العناد والكبرياء سيطروا علي والموقف اللي صار فالاستراحه بين عيوني, قلت بكل برود وانا ابعد يدينه عني بهدوء...جعل يدي تنقص قبل يجي اليوم اللي تنمد فيها عليك ماضربتك وحنا صغار تبيني امدها الحين؟!! "كانت نغزه على حركة الأستراحه", يالله الشباب ينتظرون داخل... نزل راسه بانكسار ودخلنا,واضح انهم كانوا يحاولون يلقطون شي من الحوار اللي دار بيننا,لكن اول ما دخلت كل واحد التفت على الثاني وسوى روحه متعمق في سالفته.
بديت اصب القهوه ومسك خالد الدله الثانيه,كانت هاذي عادتنا لما يزورني احد دايم نفزع لبعض بس هالمره ماكنت ابي أي مساعده منه,واللي زاد قهري ان خالد باللي صار خلانا فرجه لخلق الله ومحل شفقه الجميع وهذا اللي ماكنت استحمله..قلت لماجد اول واحد بصب له بصوت واطي وانا اضغط على اسناني..رح قله يترك الدله ومشكور ما نبي منه شي...كملت صب وسمعت ماجد يقول لخالد اللي بدى يصب من الجهه الثانيه :هات الدله عنك...لا استرح تسلم انا ابي اصب مع رفيقي...وشدد على اخر كلمه يبيني اسمع...لكن بمزحه بايخه وقاسيه في نفس الوقت يرد ماجد:هذا اول يالحبيب زين انه سمح لك تدخل لبيته معانا هات عنك بس...وقعد يضحك..حسيت انه جرحه وتعمد يهينه ولولا اني حكمت عقلي ذيك اللحظه وتذكرت انه في بيتي كان صفقت وجهه بالدله اللي معي,صحيح ان ماجد كان معروف عنه انه انسان فظ وعربجي ومزحه زي وجهه ولا يثمن كلمته او حتى يفكر فيها قبل يقولها,لكن لو في ظروف غير هاذي الله العالم وش كنت بسوي فيه... هذا اذا ما أدبته اول مايطلع خالد ادري انكم تقولون طيب هذا اللي انت تسويه مع خالد بس ما ادري اذا قد جاكم هالشعور انه ممكن اجرح او ازعل انسان غالي علي بس لو احد ثاني حاول يفور دمي و اعصب!!!.
المهم سويت روحي ما سمعت وكملنا صب,جلسنا, اللي يسولف واللي يضحك كنه ماصار شيء الا انا وخالد كنت امر بعيوني عنده كل شوي, ولأني افهمه من عيونه وبدون أي كلمه عرفت انه ينتظر الشباب يمشون.
اذن العشاء وقاموا الجماعه الا خالد وكنت متوقع هالشي بعد, ودعتهم وشكرتهم على الزياره,عند الباب قال لي سامي بيني وبينه:والله انكم مفضوحين الغلا واضح بينكم حتى لو حاولتوا تبينون العكس والله الله في خالد وانت عارف اكثر مني انه مافي مثله انت العاقل ولا تغلط غلطته انتم بدون بعض اسمح لي ما تسوون شي , ولا تخلون شي تافه يهدم احلى صداقه شفتها في حياتي,اصلا والله يابندر انه يحز في نفسي اني اوصيك عليه وانتم اللي من اول نخاف نقول شيء عن واحد منكم قدام الثاني...شكرته وقلت..قلبي ياسامي ما يزعل وانت تعرف خاصه على خالد بس الأمور احيانا تطلع من يد الواحد والله يخليك لا تفتح معي الموضوع مره ثانيه تراه علي اصعب مما تتخيلون..مع السلامه..
ودعته, ولما التفت لقيت خالد واقف عند الباب الداخلي ينتظرني, قربت عنده بدون أي كلمه وكتفت يديني, بدى بالكلام على طول... بندر سامحني يااخوك ترى كل هاللي قاعد يصير ماله داعي, انا تهورت وقلت كلام ماكان لازم اقوله, وجيت اليوم اعتذر لك واحب راسك بعد,"تكفى"خل عنك العناد وريح بالي ترى ما صارت المسامح كريم يالغالي...سكت فتره اول مره اسمع تكفى منه كانت طالعه قويه منه لكني حاولت اختار كلماتي قبل لا اقوله شيء..آسف يا خالد صدقني ما اقدر انت حطمت كل الاشياء الحلوه لك في داخلي بعد ما سمعتني ذاك الكلام والا نسيت؟!!اذا انت نسيت تراي اذكر كل كلمه قلتها وتتردد في بالي كل يوم, ذاك الكلام اللي زي السم واتهمتني باطل بعد بدون ما تحسب لصداقتنا أي حساب,يا خالد انا للحين احس اني في حلم مو قادر اصدق اللي صار, انت من بد كل هالعالم تبيعني انا في لحظه؟!! ما كان العشم والله... وبصوت مليان الم ...يعني ايش يابندر 16 سنه صداقه معقول ما قدرت تلقى لي لحظه وحده تشفع لي عندك وتخليك تسامحني؟؟؟!!..بعد كلامه انهمرت الذكريات من كل جهه لكني حاولت اتجاهلها بكل ما اقدر وانفجرت... اسأل نفسك قبل لما اهنتني قدام البشريه بدون ما تعطيني حتى فرصه اني ادافع عن نفسي انت يا خالد حتى ما حاولت انك تظن فيني خير وبعتني بسهوله , نسيت كل شي يا خلود, نسيت اللي اذا ضاقت بك الدنيا يصير لك الدار ويضيق خلقه لين تنفرج عليك, ونسيت اللي صانك وحفظ اسرارك طول عمره، نسيت اللي ما يرضى احد يغلط عليك وانت بكل بساطه تجرحه وتظلمه وتحرجه قدام الكل, ياليتك قدرت معزتي ومحبتي الكبيره لك, حركت يديني بعصبيه... يا خساره يا خالد انا بس ابي اعرف ذنبي, قلي ليش سويت معي كذا؟؟! عمري غلطت عليك بكلمه؟ او حتى ضيقت خاطرك بحركه؟ تجرحني بهالسهوله ليه؟ علمني ياخالد لا توقف ساكت تكلم يا اخوك؟!! المشكله هنا ان الغلطه جت من غالي وهذا اللي يخليني ما اقدر امشيها...عضيت على شفتي وانا اشوف ملامحه تتغير...تجاهلته وكملت...تدري وفر علي كل الكلام اللي بتقوله لانه ما عاد ينفع شي الحين اللي انكسر ما يتصلح ما عاد لك بقلبي مكان ليتني ما عرفتك ياخالد... كنت اقول هالكلام عشان ارد له اللي صار فالاستراحه وداخلي يصرخ...يا مكبر كذبتك يا بندر انت لو احد سألك وش دنيتك مايجي في بالك الا أهلك وخالد... سكتنا شوي وخالد يهز راسه وعيونه تتلامع, والف صوت في داخلي يقول له:تراي مثلك يالغالي عزيز وداخلي منهار, وعشان انهي هالمشهد الحزين قبل لا اضعف قدامه قلت: في بيت شعر سمعته مره وما اظن ان معناه وصل لي او يمكن المشاعر اللي وصفها الا اليوم:

الجرح لا جــا من اغـــراب عــــــــــــادي
بس الجرح مـوت الجرح لا جا من احـباب*1
لا جا من احباب ياخالد وانت ياخوي ما قصرت كفيت ووفيت معي فهمتني البيت بطريقه ما اظن الا متأكد ان ما احد يقدر يوصلها مثلك, ما ودي اقول اني نادم على الماضي لاني فعلا ما ندمت لكنك خيبت ظني فيك...رفع براسه وقرب يده من اذنه من قسوة الكلام اللي سمعه...كافي يا بندر كافي انا عارف انك دايس على قلبك وانت تقول هالكلام، فإذا كنت تبي تثبت لي شي او حتى لنفسك صدقني تراك اثبته, واذا كنت تحس انك مخدوع فيني او مصدوم فأنت الحين بأصرارك على الزعل تسوي مثلي ومهما صار او بيصير ترى غلاك في قلبي هو الاول دايم وعشرتك عمرها ما تهون عندي, وبالنسبه لك انا اكثر انسان فاهمك في هالدنيا عشان كذا بصبر عليك شوي لكن ما راح استسلم وعارف انك مهما تقسى وتبعد طيبتك وحنية قلبك بترجعك لخو يك, وعارف بعد اني ما اهون عليك... همست وعيوني فالأرض: وش اللي يخليك متأكد لهالدرجه؟! مثل ما هنت عليك في يوم بتهون علي اليوم !!...طالعني بنظره يائسه وحزينه... الله يسامحك يابندر والله ما اظن انه يفرحك انك تجرح خويك بهالطريقه...، اذا كنت قادر تنسى وتلغي احلى سنوات من طفولتك وشبابك فانت بتقدر تنساني اما بالنسبه لي فانا ما اقدر استغني ولو عن لحظه من ذكريات عمري معك لاني ما اقدر انسى حياتي كلها ... رديت بسخريه واللي سويته فالأستراحه وش تعتبره؟؟مثل مانسيت اللي بيننا بسوء ظن انا نسيته بهالجرح، و ادري انك ماتستحمل فكرة ان اي احد يزعل منك لكن انا--...قاطعني...يابندر انت مو اي احد وراك تكلمني كذا؟! فتح عيونك تراي خلود... فعلا انا مو اي احد والدليل سواتك فيني...ابتسم بألم...لا حول ولاقوه الا بالله ما توقعت العناد يوصل فيك لهالدرجه، على كل حال الموضوع الحين صار في يدك وتقدر تحكم فيه بالطريقه اللي تبي بس اتمنى انك ما تسوي شيء تندم عليه، ولا تغالط نفسك اكثر من كذا انت تعرف من انت بالنسبه لي وهالعالم اللي حولي بدونك ما ابيهم وما اقدر اتخيل ان اللي كان بينا بيكون ذكرى في يوم من الأيام انت متخيل هالشيء وانت تقول هالكلام؟!!...هزيت راسي...محد يموت قبل يومه الدنيا كذا والحمدالله على نعمة النسيان... اقامة الصلاه.. وودعنا بعض وطلع.


********************