طاش ما طاش المنتديات والمسنجر
(الحلقة الثانية)
@@ رايحه فيها @@

@@ رايحه فيها @@: هلا بجنية المنتدى شلونك يا بعد عمري؟

## جنية المنتدى##: بخير الله يعافيك يا عيوني... إنت شلونك وشلون صحتك وشلون العيال وأبو العيال إن شاء الله الجميع بخير ... خبريني عن علومك.

@@ رايحه فيها @@: تبي الصراحه يا خويتي حالي مش ولابد، وعيوني سهيره والنوم مجافيني، والخوف مالي قلبي، وطايحه بورطه وماني عارفه كيف بطلع نفسي منها.

## جنية المنتدى ##: شغلتي بالي عليك يا بنيه عسى ما شر .... خبريني سالفتك شنهي، يمكن اقدر أعين وأعاون يا طويلة العمر.

@@ رايحه فيها @@: الله يخليك لنا يا ست الكل ..... أنا معتمده على الله وعليك، ومتعشمه فيك تساعديني اطلع من المصيبة اللي حطيت نفسي فيها.

## جنية المنتدى ##: اهدي شويه وبسالفتك يا حلوه اشجيني.

@@ رايحه فيها @@: تعرفين أنا إنسانه غشيمه وخبرتي بالحياه قليلة، وجديده على عالم المنتديات، وكل الناس عندي طيبين وحلوين .... ومن خلال تصفحي للكاتبين بالمنتدى أعجبتني مواضيع زميلنا %% المصرقع %%، ولفت إنتباهي نشاطه المميز وقلمه الرائع، ومع الأيام صار بيننا تعليقات ومحاورات أدبية، ولما طلب مني أضيفه على المسنجر ما ترددت ولا لحظه، وصار بينا سوالف وكلام على المسنجر في مختلف أمور الدنيا، ومع مرور الأيام شعرت براحة نفسيه بالتعامل معه ووثقت به كأخ، وعلمته عن كل أسرار بيتي، وحكيت له عن مشاكلي مع زوجي وعن غيرته الزايده وظنونه فيني وعن ظنوني وشكوكي فيه (على علاقة مع امرأة اخرى)، وعن أهله القشران وسوء معاملتهم لي .... ومع زود الثقة أعطيته رقم تلفوني النقال، ورقم جوال زوجي، وكملتها برقم هاتف البيت.

## جنية المنتدى ##: انت اكيد انهبلت بعقلك ..... في وحده عاقله بالدنيا بتعطي رقم جوال زوجها لإنسان ما بتعرف إسمه الحقيقي ولا بتعرف أصله من فصله، ولا شافت شكله وما بتعرف عنه سوى إسم الشهرة %% المصرقع %%%. انت اكيد مو صاحيه للي قاعده تسوينه بعمرك، شتبيني أقولك؟؟؟!!! الله يهديك.

@@ رايحه فيها @@: يا ليت وقفت الامور على هالسالفه وبس ..... أنا كمان طلبت مني يدخل المسنجر ويسوي نفسه بنت، وخليته يتحرش بزوجي علشان اعرف مايته شلون صايره، وأختبر اذا كان بعده بيحبني أو لأ.

## جنية المنتدى ##: ردت المية بزورك قولي ان شاء الله، وبعدين شصار؟؟؟ وافق %%% المصرقع %%% يسوي هالخدمة الجليلة لسعادتك.

@@ رايحه فيها @@: تبي الصج ما قصر ونفذ رغبتي بالحال، وصار يتكلم مع زوجي على أنه بنت قموره من ربوع لبنان..... وزوجي الشهم تجاوب مع بنت ام بي سي، وبنفس الوقت خبرني بأنه تعرف على فتاه لبنانية عن طريق المسنجر، وبأنها إنسانه محترمة من خلال دردشته معها.

## جنية المنتديات ##: يعني الرجال طلع مظلوم، ولو كان في نيته الغدر كان ما علمك بالسالفه من أصله يا هانم، وكل القصة أوهام دايره براسك انت يالمجنونه …… بس تعالي قوليلي: بالله عليك شنو راح يكون موقفك لو عرف زوجك بيوم من الايام الصجيه، وعرف بأن الحسناء التي كانت تتحدث معاه على المسنجر طول الوقت ما هو رجل مسلط من قبل زوجته المصون!!!! لو حلفت ليل نهار يا الرايحه فيها بأن العلاقة اللي بينكم برئيه تتوقعي انو راح يصدقك؟؟؟؟ انت جبت بالنار لبيتك، وورطت نفسك يا حلوه.

@@ رايحه فيها @@: (تبكي بدون توقف) صدقيني انا عارفه اني غلطانه، وندمانه على عدد شعر راسي، ومن خوفي الليل قمت ما أنامه، وما عارفه كيف أطلع نفسي من هالورطه، وخايفه يطلع %% المصرقع %% إنسان مو كفو ويعلم زوجي بالسالفه كلها، واروح بداهيه…. (مستمره بالبكاء) الله يخليك …. تكفين اتصلي عليه وقوليله يبعد عني وينسى كل أرقامي … الله يوفقك هذا جميل ما راح أنساه إلك طول العمر.

## جنية المنتدى ##: يعني معقوله اتصل على الرجال وافهمه اني عارفه بالسوالف اللي بينكم، واطلب منه خبط لزق إنو يبعد عنك ؟؟؟؟ مش شايفه أنها قويه وصعبه علي، وثانيا مش حلوه بحقك يعرف انك معلمتني بالسوالف الخفية اللي بينكم.

@@ رايحه فيها @@: (تبكي بحرقه) تكفين تكفين ساعديني ولا تتخلي عني الله يخليك.

## جنية المنتدى ##: تخيلي لو انكشفت سالفتك مع %% المصرقع %% ثقي تماما بأنك راح تتطلقي بالحال، هذا غير الفضايح اللي راح تصير لما يعرفو أهلك، ولو بصمت بالعشرة على حسن النوايا ما راح يصدقوك يا شاطره …على العموم لو اتصل %% المصرقع %% فيك مثلي عليه وفهميه بأنو زوجك بدأ يشك فيك بأنك على علاقة مع غيره، ووضع رقم البيت تحت المراقبه، وبأنه صاير يشيك على رقم جوالك علشان يخاف علي عمره ويحرم يتصل فيك …… ولما يكلمني على المسنجر راح اختلق سالفة مقاربة لسالفتك معاه وألمح قدامه بأن زوج صاحبتي بلغ الشرطة علشان يعرفوا مجهول الهوية اللي قاعد يتصل على بيته عله يرتدع ويخاف على نفسه من شر الطيحه……… على العموم هدي نفسك لأني اعرف عن هالانسان كل خير، وأنا واثقه من طيب معدنه، ومتأكده مليون بالمية من حسن نواياه، وواثقه بأنه قصدو يساعدك، وغبي لأنو ما فكر بعواقب الامور، والان تصبحي على خير وربك يسهلها إن شاء الله. (وكما توقعت طلع الشاب محترم وتوقف عن الاتصال بها من تلقاء نفسه لأنو اعتبر المهمة التي كلف بها انتهت، وكملها بأنو طلب اساعد على قدر المستطاع زميلتنا الطيبة المسكينة ## رايحه فيها ## لأنها تمر بظروف صعبه وعندها مشاكل مع زوجها وأهله) لأنها كاسره خاطره. الحمدلله السالفه انتهت بالستر على صاحبتنا ، والله رحمها من عواقب وخيمه. علي وعسى أن تكون سالفة @@ رايحه فيها @@ درس مفيد للجميع.