يا كثر ما رافقت خلان واحباب = ويا كثر ما في شدتي هــملوني
على كثر ما أعدهم ستر وحجاب =على كثر ما احتجتهم واتركوني
من صارت الخوه ثمن حفنة تراب = نفس الوجيه اللي نصوني... نسوني
من غير ذكر فروق، وعروق، وأنساب = كانوا ثلاثة ...والثلاثة جفــوني
علمتهم وشلون الأهداف تنصاب =ولما سواعدهم قوت... صوبونـي
عشاني أصغرهم عمر صاروا أحزاب = عشاني اصدقهم قصيد اظلمونـي
اللي نجاح اسمي زرع فيهم أنياب = حتى النصيحة ما بغوا ينصحـوني
دام العطايا عندهم دين وأتعاب = والله لـو أطلب ذنبهم ما عطوني
طالب نصيحة، كني طالب أرقاب = وهي نصيحة؟!كيف لو زوجوني؟
كنت أكتب لنفسي مشاريه وعتاب = ولا ادري إن اللي قروني... قروني
تضاربت من دوني عقول وألباب = واجد بغوا غيري... وواجد بغوني
أقفل هدب... تسهر على شعري أهداب = كني حبست إرقادهم في جـفوني
لو شفتهم واحد... يشوفوني اسراب = من وين مالدوا نظـرهم لقونـي
أثري وجودي بينهم محرق أعصاب = ومزعل بعضهم من بعض لو طروني
يا كبري بعـيني وأنا توني شاب = واهم كتاب الشعـر حـاربـوني
حتى ولو يهوي على نجمي شهاب = يكفيني إن إسـمي كبـير بعيوني
كد قال ابوي: ان هبتهم قول: ما هاب= لو يقدرونك قول: مـا تـقدروني
مادام قبـري محتضن راس مرقاب = على كثر مـا تقـدرون ادفـنوني
لو ماني بذيب إنـهشت عظمي ذياب= لو ما عرفت اثبت وجودي لغوني
لو ما سكنت وجيهـهم مت بغياب =لو ما قدرت أمحي ورقهم محوني
أصبحت الأصعب لأنهم كانوا اصعاب= جنـنتهم مـثـل مـا جننـوني
ماجيت أبدبل كبدهم شعر وخطاب = لين أدبلوا كبد الـذي خـلفوني
يا ويل وجهي كن للدمع مخلاب =ما جف ماه ولا استحى من طعوني
كل ما طرالي منظرمريب وأرتاب =كان الوحيد اللـي يـحرك شجوني
قبلة صلاة،وذكر، وخشوع، وكتاب= وأمي على ســجادة النور دوني
تدعي لي الله يفتح بوجهي أبواب = تتوسله بالشــده يكـون عوني
من كثر ما خفاقها بالدعاء ذاب =صارت تحس إن زملاي اكرهوني
بشرتها: يمه معي ربع وأصحاب = مـاني لـحالي واجـد اللي يبوني
من يوم ما حاز قلمي كل الالقاب = قلطتهـم في دفـتري واحفظوني
الله وهبنيهم بني عـم وأجناب = من يوم جيت اعجبتهم واعجبوني
واعجابهم فيني ما هو بأيه اعجاب =باسلوبي، بشرحي، بطرحي، بلوني
لوقلت عن نفسي( بشر)..صرت كذاب =لو قلت : ( دمي من ذهب) صدقوني
لو بكيفهم كان ازرعوا دربي أعشاب = لـوبـيدهم يـتشبهون اشبهوني
من كثر ما صاروا من طبوعي اقراب =حـتى بلـبسة شـمغهم قلدوني
واجد دعوني واغلقوا دوني الباب = واكثار نـاس أبكي لهم ما بكوني
لوطالوا لهدمي مناسيب وأطناب = كان وغـلاتك من زمان اهدموني
مدام حطوا فيني عيوب وسباب =جنبت عـنهـم مـثل ماجـنبوني
أصلا لو أن بخوتي شي ينعاب =ذبحت نـفسـي قبـل لايذبحـوني
أنا يدي لو ماكست متني ثياب =نذر ٍ علـى لقـطع يـدي من متوني
موعيب أجي مدعو ولا أشوف ترحاب=العيب لـو إني رجعـت إن دعـوني
مادمت اجي ولا يحسبون لى حساب =حرمــت اروح اذا يـبوني يجوني