يقابلني يهلّلي في سلامه = و إذا أقفيت يرميني كلامه
أعرفه لو تضاحك لي بسنّه = ظهر للخبث في عينه علامه
يبيّن لي من الظاهر موده = و في قلبه بنى بغضي خيامه
يدوّر عثرتي في كل مسعى = مناته لو يقوّمها قيامه
و قفت .. و قال ما يقدر و فاشل = و سعيت .. و قال وش غايه مرامه
يأوّل كل فعل و كل كلمه = يسِن بها على الغافل حسامه
خذاك الله يا عين الخطيّه = وراها ما تشوف إلا الملامه
وراها ما تشوف الصبح يضحك = و ليل الحب يسري بابتسامه

هوّن على القلب المعنّى خفوقه = لا تتعب الخفّاق و الناس سالين
ما أحدٍ درى بك يا مفجّر عروقه = إنت و خلِيّ الهم حيل متساوين
يا صاحبي دنياك ماهي صدوقه = كذبة عبث بالحس و السمع و العين
أكذب من الأحلام لمعة بروقه = سحابها يرعد و لا للمطر عين
ما صادق إلا من طوتني حروقه = ياليتها تكذب جروح المحبين
ليت الهوى ما صادفتني طروقه = و لا عرفت الوصل أو لوعة البين
لا واهني من لا يميّز فروقه = ما يفرق الجمعه على صبح الأثنين
يدلَه و الأيام الهنيّه تسوقه = نوم الهنا يغشاه بين العشاوين
ما ذاق تسهيد العيون الشفوقه= تسهر إلين الصبح يبدي بخطين
على الذي وسّع بقلبي فتوقه= خلاني آهوبي سواة المجانين

ليالى نجد مامثلك ليالي=غلاك اول وزاد الحب غالي
ليالي نجد للمحبوب طيبي =امانه نور عينى ياليالي
حبيبي لى ذكرت انه حبيبي=دريت انى حظيظ وزان بالي
على شانه تهاونت المصايب =اذوق المر لاجل رضاه حالي
والى من الزمان اشتد حره= لقيت بقرب مظنوني ظلالي
عفا الله عنه مما جاني اول =غسل حبه جميع الهم تالي

لا والذي صورك ما لا ق للعيـن=غيرك ولا سوى بي أحد سواتك
أنت الذي حطيت بالجوف رمحين=رمح العيون ورمح وَردي شفاتك
وأنت الذي زينت يا غاية الزين=حياتي اللي نورها مـن حياتـك
أحب فيك الحب يا جامع أثنيـن=الزين وطبوع(ن) تكمل حلاتـك
أحب فيك العطف واللطف واللين=وأحب فيك رضاك عقب زعلاتـك
وأحب هاك الجيد بين الجديليـن=وأحب ما تخفيه طرقة غطاتـك
يا جارح المجروح لا تودع البين=يقضي علي بغيبتـك وسفراتـك

حدني وقتي على شي(ن) جديـدِ=السهر ما هوب من عادة عيوني
أَبعدوني عن هوى بالي وسِيـدي=وامنعوا عنّي خطوطه ياصلونـي
شطّروني عنه في دار(ن) بعيـدِ=حسبي الله كانهم منه اقطعونـي
صارت الفرقا لنا علم(ن) وكيـدِ=ليتهم راحوا وأنا عنده نسونـي
عاقني عن صاحبي سور(ن) حديد= دونه البحور حراس(ن) ودونـي
الرجا بك يا بو خالد يا عضيـدي=لا تخلّينـي تراهـم عذبـونـي

تعبـت عيونـي بـس أدور واراعـي=و أنشد عن الزينات واشتاق واشـوف
لاشك مـا قـد تـاه فكـري وضـاعِ=ألين شفتك و أصبح القلـب مشعـوف
اللي داعاني لك مـن الحـب داعـي=داعـي غـرام للمحبيـن مـعـروف
ملكتنـي يــا بوعـيـون وســاعِ=أسيـر حبـك بيـن أياديـك مكتـوف
ليتك تخفـف مـن عظيـم التياعـي=و تبتسم لي شفتهـا منـك معـروف
متى يصير بنـور عينـي اجتماعـي=و ألقى التّعب من سيد الأحباب مخلوف

إستكثـرك وقتـي علَـيْ وغـدا بـك=عـادة زمانـي كلّمـا طـاب هـوّنْ
ليـت الـذي ودّاك يـا زيـن جابـك=تشوف عقبـك كيـف الايّـام سـوّنْ
شرق(ن) مشيت وغرب وقتي مشىَ بك=والقلب ما له لايـم(ن) فيـك لـوْ وَنْ
عقب الهنا بـك ذاق لوعـة عذابـك=تـلـونّـت دنـيــاه ولا تـلــوّنْ
طويتنـي طـيّ الـورق فـي كتابـك=حتّـى معاليـق الحشـا لـك تطـوّنْ
إشتقت لأيّـام الهـوَى فـي جنابـك=يوم الشّموع بليـل الاحبـاب ضـوّنْ
واشتقت أقول لهاتفـك مرحبـا بـك=واشتقـت لغيـوم الصحـاري تكـوّنْ
عوّد ترَى داعي الهـوَى عنـد بابـك=واروي القلوب الّلي بعـد مـا تـروّنْ
غنّيت لـك عمـري ولاجـا جوابـك=واسمي مـعَ مجنـون ليلَـى تـدوّنْ

قلبي اللي لواه من الصّواديـف لاوي=جرّحته الليالـي والحظـوظ الرديّـه
والله أني بوسط الناس كنّي خَـلاوي=من يلوم المفَارِق عقب فرقـا خويّـه
أشهد أن المفَارَق من عظيم البـلاوي=مير هذا نصيبك يا العيـون الشقيّـه
اتجَلّد واقول انّي على البعـد قـاوي=والله أعلم بقلب(ن) فيه الأشواق حيّه
كيف راحت يا بوتركي حياتي شقاوي=وين درب السّعاده والحيـاة الهنيّـه
ليت لأهل الهوى والحب قاضي دعاوي=كان أداعي عيون اللي فراقه خطيّـه
كنّي المبلي اللـي قطّعتـه المكـاوي=كل مـا جـظّ بالونّـات زادوه كيّـه