من بلاه الله تصبر واحتسب=عادة المسلم على الشدة صبور
اتلمس للخوي عذر وسبب=لي لحقني من بعض ربعي قصور
واتحمل زلة كحيل العرب=واتحاشا عضة الكلب العقور
اعشق الغالي ولاهوب الذهب=وانزل العالي و لاهيب القصور
في هجير العمر خاويت التعب=فوق رمل البيد او موج البحور
كل حي في حياته له طلب=ذا تهياله وهذا في دبور
لا تعجب ما على الدنيا عجب=حكمة الرحمن خلاها تدور

ماعاد لي بمطارد الصيد حاجه = إلاغزالن صادني قبل اصيده
ريمن لبس في عالم الزين تاجه =عزاه داري عن دياره بعيده
خشفن طعن قلبي وعنده علاجه= ماله سلاحن غير عينه وجيده
إلى اظلمت دنياي ولع سراجه= يمشي على دربه فوادن يريده
ياعاذلين القلب هذي سذاجه = خلوني آحبه واحبه وازيده
القلب قلبي والمخالج خلاجه= وكثر الحكي يااهل الحكي مايفيده

احلى عذاب اللي رضّى لي حبيبي=يجوز لي لا صار لعيون الاحباب
تستاهل عيونٍ سهمها عطيب=لا سلهمت بالرمش و الرمش جذّاب
من شافها يشوف شيٍ غريب=فيها حنان و ظلم و دموع و حراب
وفيها كلام و سر و امرٍ عجيب=لا جيت اعاتبها تراجعت بعتاب
لا شفتها دنياي عني تغيب=يلفني موج الهوى بين الاهداب
إن كان ذبحي من عيونك نصيبي=اموت لعيونك ولا أحسب حساب

ياللي تعرفون الهوى لا تلومون=يلومني من لا درى ويش حالي
الحب يودع عاقل الناس مجنون =يودع كبير السن مثل العيال
واهل الكرم والجود لاجله يذلون =يشحذ عزيز النفس فيه الوصال
ان ساعد العشاق حظِ يسجّون=اسعد ليالي العمر هاك الليالي
وان عاكست سود الليالي يموتون=الحب غربال من اول وتالي

زانت بحبّك يا حياتي حياتي =من عقبكم صفوي تكدّر عليّه
يا دعوتي بـ اوّل و تالي صلاتي=و يا نيّتي ما دام للحب نيّه
يا حلم صحواتي و غفوة مباتي =و يا رغبتي من بين كل البريّه
احاول اجمع في غيابك شتاتي =بعضي معك عيّا يفارق خويّه
أرواحنا بـ الحب متعانقاتِ =و قلوبنا بـ الشّوق و الوجد حيّه
وش لون تقوَى سيف زينك عصاتي =يا بو عيون ٍ كلّها جاذبيّه
خذ من حبيبك كل عمري و هاتِ =بلسم جروحي يا حبيبي عطيّه

لك حق تزعل ثم لك حق نرضيك=ما اقوى زعل حبيب قلبي وعيني
ما دام قلبي يا اريش العين مغليك=اطلب ولك روحي وما في يديــني
لا تـنـشـغل مالك وزينٍ يــضـاهــيك=ابـيــك أنا لـو كان غـــــيرك يبيني
يوم الله احسن صورتك خصني فيك=فـيك الجـمال وصــادق الــود فيني
شعري يزين بوصف زينك وطاريك=والأرض مــن مـمشـاك فيها تزيني
اول غــناتي صوت الأشـواق يدعيك=واخــر غــناتي شـق صدري حنيني

تستاهل الحب نجديّه=رفيعة الشأن عجّابه
العين يا عين بحريّه=لقلوب الاحباب نهّايه
والجيد يا جيد ريميّه=تجفل من الزّول لعّابه
والرّيح يا ريح وسميّه=نبت الخزامي تثنَّى به
صفيت مع صافي النية=يوم الذي صابني صابه
معاد لي روحة أوجيه=وقف هوانا على بابه

ليتك معي ساهر(ن) ليل الهوى كلّه=مانوم انا وانت لجل الحب سهراني
ترى السهر مع حبيبك يبري العلّه=لا صرت شفق(ن) وهو عليك شفقاني
كلش طراته الى وافق على حلّه=والا ترى كل شئ يالغضي فاني
لا عاش خل(ن) تنكر في الهوى خلّه=يوم(ن) حبيب(ن) ويوم(ن) يصير قوماني
وش فيك دايم تعسر القلب واتّلّه=اخاف يوم(ن) يجي ما عاد تلقاني

حوّل سحابي واحسب أنّي وصلْتَه=وهبْت هبايبها وشالت سحابي
حلمٍ علَى غفوة زماني حلمْتَه=ليت الزّمان الّلي غفا ما صحى بي
في غمضةٍ من ليل.... عمري سرقْتَه=لاشك حظّي من عذابي وشَى بي
الّليل يوم أنّه صَحى بي... جرحْتَه=والعمْر في مجروح ليلي سرَى بي
من وقتيَ المجروح لجروح وقْتَه=يمشي وحظّي بالعَثاير مشَى بي
لوْ أنّ قيدي في يديني كسرتَه=ميرْ البلى قيد الغرام ألتوَى بي
اللـه من صوتٍ علَى الشّوق جبتَه=واللـه من كلمة غلى في كتابي
أطوّح المسحوب معْ كل نْهتَه=واسمع علَى همس الّليالي جوابي
يا معشر العشّاق قلبي عصرْتَه=قطرات خفّاقٍ من الوجد ذابِ
علَى عشيرٍ بالوفا قد وعدْتَه=لو شبت ( أحبّه )... مثل فتنةْ شبابي

يا ولد عوّد لا هاليك ما تقوّى=لوعة الفرقا سطت فيك مسطاها
لا تهقوى ما بالابعاد سلوى=المحبه ما سلم من شرب ماها
من بلي مثلك فلا يبري البلوى=كود شوفة من بالأوطان خلاها
الذي بك يا ولد بالذي تهوى=ياولد عوّد ترى شفاك بشفاها