قالت من انت ؟ وقلت مجموعة انسان= من كـل ضـد وضـد تلقيـن فينـى
فينى نهار وليـل وافـراح واحـزان=اضحك و دمعى حايرٍ وسـط عينـى
فينى بدايـة وقـت ونهايـة أزمـان=أشتاق باكر و اعطى امسى حنينـى
واسقى قلوب الناس عشقٍ و ظميـان=واهدى حيارى الدرب ,, واحتار وينى
و أحاوم طيور السماء حوم نشـوان=واسيـل الوديـان دمـعٍ حزيـنـي
فى عينى اليمنى من الـورد بستـان=وفى عينى اليسرى عجاج السنينـي
تهزمنى النجلاء .. وانا نـد فرسـان=واخفـى طعونـى والمحبـة تبينـى
ان مـا عرفتينـى فلانـى بزعـلان=حتى انا ترانـى احتـرت فينـى !!

من يقول الزين ما يكمل حلاه =كل شــيء في حـبـيبي اكتمل
الله الـلي كمله واللـه عطاه =مــابقي للزين في خلـي محل
العيون احلى من عيون المهاه =شافهـا قلبي وصفق واحتفل
نظرته من فتنته شعله حياه =والجفون من الحيـا فيها كسل
ساهم رمشـه على الخد وسناه =كن لمـعـه وجنتـه ورد وطل
والشفايا كنهـا جمر الغضاه =تحرس الـريق المحـلى بالعسل
والشعر ليل تقل حمره مساه =اجـعـد حول علـى صدره همل
مايج من فوق متنه ما طواه =لـون شــلال مع المغرب نزل
انطلـق جيده يمـارى في بهاه =فـوق مـياس تعزل واعتدل
بالرشاقه فيه من ظبى الفلاه =لى مشى كنه على الريح انتقل
ريـحته مـن كل زهر منتقاه =والـزيـاده للخـزامى والنفل
صافي مثل المطر فوق الصفاه =بـاسم مثـل البشاير بالامل
جـامع مـن كل زيـن منتهاه =مستحيل الوصف في خلى سهل
كايد مـاهو يلين لمن بغاه =يرتفع عن كل سقطات الزلل

تدلل علينا يا شبيه الظبـي وش عـاد=تدلل ولك بامر الهوى شافـع عنـدي
ولك في خيال العاشق المهتوي ميعـاد=واجلس على غيمه وليلة قمر نجـدي
اسافر معك لبلاد وانزل معـك لبـلاد=ومن غيمه لغيمه ولا للسنـا وحـدي
رسمتك ضحوك الفجر يا فرحة الاعياد=ولمعة شعاع ينغمس في نـدى وردي
وغنيت بك صوت بقلب الهوى ميـلاد=ونغمة غلرام ذاب في لحنهـا وجـدي
اشوفك مطر هتان لا بـرق لا رعـاد=من الوسم يبعث بالصحارى زهر ودي
احبك وصل وبعاد احبك رضى وعناد=ولا يختلف وعدي ولا ينتقض عهـدي

يغار سمعي و يشره كل وجداني =لا غاب صوتك نهار(ن) ما بلغ سمعي
ياللي لقيت بنواعس عينك أوطاني= هي ديرتي هي ملاذ القلب هي ربعي
أملي النّظر من جمالك يوم تلقاني= و احبس خيالك بعيني حبسي لدمعي
لا شفتك اعيش في عيونك ازماني= وآخذ من نجومها وأشعل بها شمعي
من نورها سالت الفرحه بودياني =ومن سحرها قام يورق بالذهب زرعي
يا واحد الحسن مالك بالعرب ثاني =عطني شرابك وخذ قرطوع من نبعي
غريب الاطوار و الغربات ميداني =هي غربة العمر وافق طبعكم طبعي
اصبحت تغريبتي و اصبحت عنواني= يا واحدي بالهوا و اثنيني و جمعي

مرتاح أحبك ولا علّمت= حتى إنت عييّت أبيّن لك
البارحه يوم أنا سلّمت = شكيت لو عيني تدلّك
برقٍ لمع بالعيون وخفت = مواجع القلب توصل لك
عساك في ناظري ما شفت = كيف المعاليق يومِن لك
من خوفتي لا أحترق جنّبت = هربت من شمسك لظلّك
أخشى عليك الهوى لو طحت = ما تلّني يمّك يتلّك
أبي قليلك ولا حصّلت = بعضك تركني مع كلّك
ما أدري صواب أو خطا ما قلت= إنك حبيبي وأنا خلّك

يا مسافر للجفا و الوصل يبكي عليك = وين عهدك بالوفا للخفوق اللي يبيك
لي جناح و لك جناح و لا نطير إلا سوى= إسقني عذب القراح لي زمان أشرب هوى
ليت لي قلبٍ خلي ما عرف فرقا الوليف= لا عليه و لا عليّ لا ربيع و لا خريف
الهوى أمرَّه عجيب مرّه يسابق حلاه = إن صفى ود الحبيب الزمان أبعد مداه
ويل قلبي يالغرام كل يومٍ لي قصيد = إشتكى مني الكلام أجرح حروفه و أعيد

غرّدي بالحب يا لحظة هواي= و إلعبي تطريب يا نجمة مساي
و احضني خفقات قلبي لا تطير = و اجمعي رقصات فرحي في خلاي
إزدحم في صدري الشوق العظيم = و الهوى في قلبي أبعد من مداي
فيني أكبر من غرام العاشقين = و الأمل يسبق من الفرحه رجاي
إنتِ الدنيا إذا جاد الزمان = و إنتِ الحسره إذا جاني بلاي
و إنتِ الما في حياتي و الهوا = و إنتِ أرضي و الوطن و إنتِ سماي
و إنتِ أجمل لحن غنّيته طرب = و إنتِ الحب الذي يملا فضاي
أتظلّل فيّتك فيظ الحياة = و أتدثّر دَفوتك ليلة شتاي

من يقول الليل للعاشق ضرير = الهوى في كل وقتٍ له نظر
شوفة العاشق عن الباقين غير = له نظر بالعين و لقلبه بصر
ساهرٍ بالليل فارقت السرير = و البحر رفيقي بليل و سهر
موجته تسري و أنا فكري يحير = ليت لي يا فيصل بسرّه خبر
تلعب الموجه و للغبّه هدير = و القمر من فضّته رشّ البحر
من غزير القاع للشّط القصير = قامت من النوم في لحظة عمر
كنّها عَنْدَا تثنّى في حرير = أسرعت يمّ الحبيب المنتظر
عشقها ترقص على نسمة عبير = ترتفع ثم تنهصر ثم تنحدر
ساقها شوقٍ على العاشق خطير = شوق من يهوى مواعيد الخطر
خلفها خواتها صفوفٍ تسير = هايماتٍ ما يعرفون الحذر
زفّها في محفل الزّار الكبير = كل مسحورٍ بشيطانه حضر
تلتوي في ثوبٍ أبيض ثم تطير = في حضن شطٍ تحبّه .. تنتحر

نادميني كلها ساعة و أغيب = ما بقى غير الموادع يا حبيب
سلّي الخفّاق عن هم الزمان = و اجلي من العين نزّات السريب
طالت أيامي و أنا فوق الشّداد = الذلول تسير و الراكب غريب
درهمت بي في عجاج القايله = و الثرى من حدرها جاله لهيب
كل خفٍ يرسم بدربي حذر = لاهل ركبٍ ما بعد طبّ الشعيب
يفهم اللي يفهم و يجهل كثير = و المراجل دربها دايم صعيب
يا كبر غلطات جهّال الحياة = ضيّعوا بعيدهم و أخطوا القريب
يا بعد فرق الليال من النهار = و يا بعد فرق الغرير من اللبيب
بعضهم يزمّ به كثر الهدوم = و إن تحدّث طاح من عين الرقيب
كل رجلٍ يستره قل الكلام = و اللسان يجمّله و إلا يعيب
نادميني .. وقتي الباقي قصير = و المسي بعيونك جروحي تطيب
فرّغي قلبي و فكري من عناي = يا شعاعٍ بالعمر قبل المغيب
ومضةٍ في ليل في دهرٍ ظلوم = تبعث الآمال في وقتٍ عجيب
السؤال يغيب من قبل الجواب = نادميني .. كلها ساعة و أغيب