مرحباً يا ملاك الغيد عين الفريـد = يا سحابة ربيـعٍ ضمـي سيلهـا
مرحباً بالعيون اللي غلاها جديـد = كن ربي على شأنه خلقنـي لهـا
في خفوقي غلاً لك كل يومٍ يزيـد = شوفك العين غنت بـه مواويلهـا
كن الأحرار عندك يا حبيبي عبيد = يا قمر غابت النجمة وخـذ ليلهـا
الله اللي عطاك الزين خدٍ وجيـد = مع عيونٍ تطـارد فوقهـم خيلهـا
وعاتقٍ فيه من دم الحيا بالوريـد = وخصلةٍ كفك اللـي عبـد تدليلهـا
جامع الزين كله يا حبيـبٍ وحيـد = في خفوقٍ حياته منك يـا ويلهـا
يا فريد الجمال إن كان تبغى الأكيد = المحبة لك أنت افرح وأنا شيلهـا
وقل لعينك تمشيني على ما تريـد = خلها تكتحل بي يـوم أنـا ميلهـا

عظيم من عظم الحسن فـي جمالـك = سبحان من صورك زاهـي وفتـان
غيرك عصاه الحسن وأنت إهتدى لك = أصبح لك أطوع من هوى قلب ولسان
الأولـه يـوم ابتـدأ الخلـق جالـك = نفحٍ مـن العنبـر وروحٍ وريحـان
والثانية ما معـك أحـد فـي دلالـك = وما تهدي عيونك على كـل ولهـان
العاشق اللي عاف غيرك صفـا لـك = لا تجرحـه بالصـد ظلـمٍ وبهتـان
الـروح قبـل أروح قدمتهـا لــك = هدوٍ ولا للهدو فـي طبعنـا أثمـان

أنا أحسب الأمر بيدي وأحسب ورى أمري فايده = أمرت قصدي تبتعد وأثري على نفسي جنيـت
قمت أتبعك يـا سيـدي محبتـي لـك زايـده = ويني أنا وين السعد لي غبت والا ما رضيـت
صحيح هـذا مقصـدي فرقـا عيونـك كايـده = غريب والغربه وعـد وأنـا لمملكتـه مشيـت
بسري على وجه الجدي وأرسم طريق معايـده = والبرق يبرق والرعد أروح وإلا منـك جيـت
ودي تـرد وتهتـدي للـي كتـب قصـايـده = والليل يسهر به بعد من يوم صديـت وجفيـت
يا نور عيني واسعدي مـن حَـب ذي عوايـده = يعد لليل الوصل عد وأنا بوصلك مـا اهتنيـت

احمرت الحسرة بناظر شفقنـا = والشوق شمسه تختنق في جبينه
ما يمدي تعاتب عـذولٍ فرقنـا = تقول وش سويت بينـي وبينـه
في نار معسول الكلام احترقنـا = ولا بقى إلا ذكريـاتٍ حزينـه
ظنيتنا من نشوة الحـب فقنـا = وأنا نعاني من جـروح دفينـه
جينا على بحر الغرام وغرقنـا = تحطم المركب ولا بـه سفينـه
ليت الجفاف لشط أمانه سرقنـا = لأجل الوصل عيني تناظر بعينه
أخاف نار الهجر تحرق ورقنا = ويموت غصنٍ للوفا زارعينـه

الدار لا كـدرت صافـي مشاربهـا = مـا قادنـي يمهـا شـف ولا راده
أشـوم عنهـا وأخليهـا وأجنبـهـا = الذيب يبخص مصاديـره وميـراده
العين مـا تبكـي إلا مـن سبايبهـا = الوقـت غـلاب والعربـان نقـاده
سـود الليالـي كثيـراتٍ عجايبهـا = تضحك عيال الخدم وتزعل السـاده
يـا عـل ربـي يعدينـا مصايبهـا = عن ما جرى للعرب ما هيب نشـاده
أحـدٍ يصـدق بهـا وأحـدٍ يكذبهـا = وابن الرخم يحتفل في عيـد ميـلاده
أعـز نفسـي وأعزيهـا وأعاتبهـا = وكثر المجامل ترى ما هوب لي عاده
إن كان نفس الولد نالـت مطالبهـا = وإلا قعـد مقعـد الحقـران مقعـاده
كـل الخلايـق لهـا ربٍ يحاسبهـا = واللي تمني كثيـر منـاه مـا فـاده
اللي يعمـر بهـا واللـي يخربهـا = واللي يواعـد ولا يصـدق بميعـاده
أرض الله الناس تسعى في مناكبهـا = كـلٍ بفالـه بمحـداره ومسـنـاده
بعض الرجاجيل لو تنتف شواربهـا = إن كان رأسه يخلي الـزود وعنـاده
يمناً تقصر عـن الماجـوب عقبهـا = تستاهل اللـوم دوم الـدوم وزيـاده

عذِّبْ رعـاك الله يـا سمـح الأقبـال = ربي على كف الغـلا لـك وضعنـي
إن رحت بثياب الجفا البيـض تختـال = رحب الفضا اللِّي واسع ٍ ما وسعنـي
غريب حب وشفت أنا منك الأهـوال = هـمّ ٍ ينّزلـنـي وهــمّ ٍ رفعـنـي
بعدك يضـر الحـال ويضَيِّـقْ البـال = وقربك أبد طول الدهـر مـا نفعنـي
أتبعـك راحـل يـا حبيبـي ونـزّال = حـبٍ يريضنـي وحــبٍ دفعـنـي
معك أنت درب الصبر يا صاحبي طال = حـظٍ يقربـنـي وحــظٍ منعـنـي
راح العمر بيـن التصـدِّدْ والإقبـال = ومدري وش اللِّي يا هوى البال تعني!
طب لي تطيب الحال يا طيِّـبْ الفـال = والاّ تكـرّم حـب غيـري ودعـنـي
أما استدار الوقت من حال لـى حـالّ = الاّ شريتـك كـل مـا قلـت بعنـي
أسقيت من مرْ الصبر زهـر الأمـال = والحظ بك يا صاحبـي مـا جمعنـي
وقّفْتني في حدْ شمـس ٍ مـن اظـلال = عصيتني قبل أمـس وتقـول طعنـي
ما والله أسمع شـور ناصـح وعـذّال = وأنا إن شكيت الحب محـدٍ سمعنـي

يا قريب القلب لـو دربـك بعيـد = جيتك أطوي وحشة الدرب الطويل
كل ماطال المـدى شوقـي يزيـد = العنا اللِّي منك في عينـي جميـل
المسافـه هـمّ والغربـه قصيـد = والـدواة أسقيتهـا مـن سلسبيـل
الغلا اللِّي ساكن ٍ حبـل الوريـد = ساقني لك وصل ياالحب البخيـل
جيت أموت بعينك اليمنـى شهيـد = وعينك اليسرى بها شفت الدليـل
في يديك القلب وإفعل مـا تريـد = وإفهم إنِّيْ فيك ماارضى بالبديـل
مهدي ٍ حبِّي مثـل هـدو العبيـد = وما على مهدي الهدايا من سبيـل
حق عين وحق رمش وحق جيـد = يا بدر شهر الحسن مالـك مثيـل
كلّ شـي ٍ بالمحبـه لـك جديـد = غربتي لك شوقها معني الرحيـل