كنت احسب اني عرفت الحب قبل اعرفك =وعشقت قبل اعشقك واشتقت قبل التقيك
وكنت احسب انيرلقيت احباب قبل اوصلك =واثري توهمت في غيرك وانا كنت ابيك
تعال نعطش وتشربني وانا اشربك =تعال قبل الوعد اجلس معي نحتريك
تعال شفني وانا استناك ك اشبهك =يطري علي الف راي و راي واحتارفيك
اجي مكان الوعد والا اسبقه انطرك= والا آخذ الموعد اللي يحتريك واجيك
يا آخر الحب ذقت الحب في اولك =ويا اول الشوق اقصى الشوق ما ينتهيك
علمتني كيف اعرفك لين صرت اجهلك =ضيعتني في متاهاتك وكنت ارتجيك
حبيب الاحلام يابعدك ويامقربك= حرام يكفي تبعثرني وانا احتويك
ان شفتك بحلم صدقته وانا اتوهمك =وان شفتك بعلم كذبته الين انتشيك
اخاف اغمض عيوني وان رمشت افقدك= واخاف افتح وتصبح حلم ولا التقيك

حبيبتي لا من غديتي لي سراج اتبعه = وكني غديت من الظما اركض ويطردني السراب
لا تبخلين اليا شربتك ماشربتك من سعه = دامي من جروح الهموم الموجعه كلي صواب
اليوم مرتني السواني والفصول الاربعه = اليوم مريت المواني والمباني والسحاب
اليوم ماكني لقيتك مر صوتك ماسمعه = اليوم ما كني فقدتك من سؤالين وجواب
يابنت في خدك وهج سيل الشموس الساطعه = احرق بداخل داخلي انسان ماهو للتراب
واللي خلق ظلم الليالي بالعيون الهاجعه = اني من الحرمان اتسائل وحرماني جواب
يوم الوداع تخيلي مالي حبيب اوادعه = محروم انا وتخيلي محروم حتى من العذاب
يابنت لي قصه تطول بكلمتين موجعه = هي باختصار اني انا اركض ويطردني السراب

جتني وشافتها عيونٍ حايرات =ذا شعاع الشمس أو هذا سناها
ضاعوا ألي جو معاها مسيرات=وأقبلت تمشي تقل محدٍ معاها
ياسنم فضه وياجيد المهات =ياشذى نبت الخزامه في وطاها
قلت كن بوجنتك زهر النبات=قالت إن الرمش يجرح لي صفاها
تجرح الظلمه عيونٍ ناعسات=سلهمت وأغضت تغطرس في بهاها
حققوا بالشوف في لون الشفاة=هو خذا منها الشفق والا عطاها
ولو ظلام الليل يعطينا ثبات=فيه من لون الشعر والا كساها
كيف أباصف زين كاملة الصفات=كيف أباصل في حروفي منتهاها

ما قلت احبك ولا قد قلت ما احبك =احب مالي عيوني وانت تسواها
لوتدري اشكثر تعني لي تعرف إنك=آخر امل في حياتي وأول مناها
ياكثر احس ان بك مني وبي منك=روحٍ قسمها شخصيين مولاها
لاتقول شتحب فيني اعشقك كلك=من ليل شعرك لشمسك واخر اقصاها
سميتني نصفك الثاني وياشحك= انا بسميك كلي وانت معناها
تعبت اوديك له ياقلب ويردك =لا خذ حلومي ولا خلاني انساها
كل الحمام استراح وناح في ظلك= والورد الاصفر سقته الروح من ماها
ليتك بعمري ثلاث اشخاص ما املك=واحد معي دوم واحد روحي يملاها
والثالث بجفن عيني لافقدت حسك =او غمض الجفن جاني فيك يتباها
مو بس أحبك أنا والله من حبك=أحب حتى ثرى الأرض ألي تطاها

يا صغيّر ما يكبرني لقب= وما يصغرني إذا انكرني صغير
ما خذينا الصيت من جمع الذهب = ولا نسابة شيخ او قربة وزير
كاسبينه من هل السيف الحدب = الجنايز كان ما جاك النذير
صيتهم نجم ٍ على رأسه لهب = سمعوا الصقهان به و اجهر ضرير
بالوفا تاريخ أبيض ينتصب = لا حكوا بالحق حيين الضمير
ضيغمين للسناعيس انتسب = لابةٍ طلنا بها عرش كبير
عند حدك يا كثير الهرج تب = لا تمر النار و ثيابك حرير
كان لك عز بذلي فتعقب = و الله ألا تبطي و حبلك قصير
احسبنك من صناديد العرب = و اثر ساترتك عباتك يا غرير
ما حسب للسوس زراع القصب = و القراده ما درى عنها البعير
و لو حسبنا للحسايف والتعب = ما بذرنا يا العصافير الشعير
عن هلك ابراي لله و احتسب = الرجال اللي مجارهم عسير
من قريش المصطفى و ابو لهب = و الدغالب ما غشت عذب الغدير
للرجال من الرجاجيل العتب = و الزكاة تحل في حال الفقير
لعنبو وقتٍ غدينابه حطب = تحرقه نار يثورها اجير
ما ألومك و الزمن سوى العجب = هو بقى غير الكرامه بالجفير
ما أذل و راسي يشم المهب = لو بقى من شمر طفلٍ غرير
ما اهاب ولا يزلزلني غضب = الشجاعه ورث العاقل غزير
يا صغير ما يكبّر باللقلب = غير من هو كان من دونه صغير