يبه و انا بعد اثنعش عام حسيت = اني قدرت اقول شيٍ كتمته
ابطى قصيدي ما انكتب فيك و ابطيت = اجر صوتي و ارجع اجر صمته
ماودي اكتب بيت و اندم على بيت = ما هوب شعر الشعر كاني زهمته
الشعر كانه ما انحنى لّي ماجيت = ان ماعزم مرثيتك ما عزمته
ان ما كتبته بازرق الدمع وابكيت= كل الجروح المبطيه ما رحمته
يبه وانا من بعدك ابو التناهيت= ما مر طعمٍ للحزن مانهمته
يبه يبه كلمه و انا كل ما اوحيت = كلمة يبه صديت و الوقت لمته
يبه يبه كلمه و انا كم تمنيت = اهدم بها و ابني بها اللي هدمته
يبه و انا لاضقت رحت و تهجيت = ركون بيتٍ ضم حلمٍ حلمته
يومك تعلمني الامن تحاكيت= درس الحياه اللي كبرت و فهمته
هناك كانت دلتك لا تقهويت = و هناك كان يساق طيبٍ حشمته
و هناك ايه اذكرني هناك خليت = طفلٍ ملا بالدمع دربٍ رسمته
هناك جاني علمك انك توفيت = و هناك خاويت الشقا و احتزمته
و اليوم قلت اليوم يومي و مديت = كف القصيد و طاح شعر و نظمته
لكن بعد صمت اثنعش عام حسيت = اني عجزت اقول شيٍ كتمته

ياغايـبـه وان كــان فيـهـا جمـالـه=تجمّـلـي يــاام الـحـلا والظـفـايـر
بالله شوفـي صاحـبـك كـيـف حـالـه=شوفيـه فـي غيبتـك وشلـون صايـر ؟!
صارت حياته ضيـق خلـق .. و بطالـه=هم .. وسهر .. واوراق شعر .. وزقاير !!
يعنـي حبيبـك صـار حالـتـه حـالـه=مابـاقـي الا انــه يــدّن العـبـايـر
الله لامـنّــه ذكـــر مـامـضـالـه=قـبـل الـدوايـر ماتـجـر الـدوايــر
يــوم الطفـولـه والشـقـا والجهـالـه=يـوم الصغايـر فـي عيـونـه كبـايـر
ايــام كــان معـانـده راس مـالــه=ويـسـوق لهـبـال الشـقـاوه بشـايـر
يامـا امتلـى بالحـب والطـيـش بـالـه=ويامـا امتلـت مـن شخبطتـه العـوايـر
يكتـب عليهـا : ( عااااشقـك للثمـالـه )=ويخـطّ توقيعـه : ( جريـح الضمايـر )
يامـا اشتكـاه ابـوك فـي بيـت خـالـه=ويامـا تحصّـل مـن هـواك العـزايـر
مـره حـلـف بـأنـه يبّـطـل هبـالـه=وقبـل يكمّـل .. فـك اخـوه الستـايـر
ثـم طالـع الشـبـاك.. ليـنـك قبـالـه=وفي اقل من لمـح البصـر جـاك طايـر
علـى صغـر سـنـه ممّـيـل عقـالـه=كااااشـخ وناسـي لايـصـك الـزرايـر
لاشـافـك يتمـتـم لـحـالـه بـحـالـه=لعيـون هالشـوفـه تـهـون الخسـايـر
ولاشـاف زول ابـوك حــذّف نعـالـه=الحـب جايـر .. لكـن العـود جـايـر
طفـلٍ يتيـم ورغـم الأحــزان دالــه=مايـدري ان حظـه مـع الوقـت بـايـر
كنتـي طموحـه .. كنتـي أغلـى حلالـه=كنتـي وصرتـي بـس يــاام الظفـايـر
طفـلٍ زرع مـن ضحكتـك فـي خيالـه=ليـن اثمـرت شعـرٍ هـزالـه حـرايـر
لاتتركيـنـه فــي غيـابـك لـحـالـه=بالله شوفـي كـيـف هالطـفـل صـايـر
ووحـده بوحـده كـان عـنـدك عـدالـه=اتبّطلـي غيـبـه .. و ابـطّـل زقـايـر

إيه أعرفك بنت عز وكلمتك مسموعـه=وأدري إنك من خلقتي في ظلال وفيّـه
مالعب فيك الزمان ولاقرفتـي جوعـه=ولاوقفتي من همومـك وقفـة محنيـه
أدري ورب اليتيم اللـي يهـل دموعـه=مابعد هلت دموعك في ضحـى عيديـه
بين حضن أبوك وأمك وردةٍ مزروعـه=طول عمرك مافقدتـي لمسـة الحنيـه
إيه أعرفك وأعرف إن الناس بك متبوعه=وأدري إن أمرك مجاب وحاجتك مقضيه
بس أنا من فضل ربي هامتي مرفوعـه=ورث أبوي وراس مالي عزوة جبريـه
مانحنيت إلا لمخافة ربـي المشروعـة=ولابعد دفقـت دم الوجـه مـد ايديـه
بدوي ماعرفت الضحكـة المصنوعـه=احمدالله من خلقـت وطيبتـي فطريـه
قانع في حكمة الله ماشي فـي طوعـه=ماحسبت حساب دنيـا لناسهـا طرقيـه
إيه أنا ياأم الترف قلبي غدا موضوعـه=الفراق اللي بلا رجعه وطـاري جيـه
بس روحي سايري قلبك وهدي روعـه=واعذريني .. وإلا عادي ازعلي عليـه
دامها وصلت لـذل النفـس يالدلوعـه=والله ان يعيش راسـي ماانحنـى لبنيـه

من بغى الفرقا لقـى لـه عـذر واسبـاب ودليـل=خل عنـك العـذر والاسبـاب دام الحـب ضـاع
كان ودك بالفراق .. ابشر عسى عمـرك طويـل=لاتـردد وانـت لـك كلمـه ولـك امـر ٍ مطـاع
لـي عليـك انّـك تبّـت بكلمـة ٍ تشفـي الغليـل=ولك عليّ انـي لأوّقـف وقفـة الرجـل الشجـاع
لاتجاملني مخافة ( قال ) مـدري خـوف ( قيـل )=عمر ( هرج النـاس ) مايسمـن ولايغنـي جيـاع
كان قصدك ( سر حبك ) .. اوعدك لأصبح بخيـل= واحمل اسرارك معي للمـوووت قـدر المستطـاع
بس قلها ... قل ما احبك ... وابشر بصبر ٍ جميل=لاتحسب أني مثل مـن طبعهـم لـوي الـذراع !
صاحبـك ماهـو كـذا ياصاحـب القـد النحـيـل=صاحبـك طبعـه غريـب وغربتـه غربـه طبـاع
في الهـوى مايقبـل الحـل الوسـط ولا القليـل=مثل ماهو لاشـرى يشـري .. ليامـن بـاع بـاع
ثابت ٍ لو هـي تميـل الارض حـدره ... مايميـل=يـدري ان الفقـر ماهـو عيـب والدنيـا مـتـاع
ماعشـق لـذّة حياتـه كثـر عشـق المستحـيـل=ولا كـره حتـى مماتـه كثـر كـره الأنصيـاع
كم تعلّم مـن شديـد البـدو وش معنـى الرحيـل=وكم تعلّم من غروب الشمـس وش معنـى الـوداع
وكم تعلّم من سحاب الصيف وش معنـى الحصيـل=وكم تعلّم من ليـال البـرد وش معنـى الضيـاع
ايه انا هذا طريقي ( موحش .. وصعب .. وطويل )=وانت لامنـك تعبـت .. العالـم فجوجـه وسـاع
اعتبرنـي فـي بدايـة سكّـتـك عـابـر سبـيـل=و رح وانا قلبي معك من ويـن وجّهـت الشـراع
يكفي اني لاانذكرت فـي سالفـة عشّـاق .. قيـل =:عاشر احبابه شجـاع .. وفـارق احبابـه شجـاع

الباب هـذا بـاب بيتـك .. بـس مـا يفتـح عليـه!=البـاب هـذا لـو فتحتـه .. تنفتـح لــيّ الحـيـاه
وانـا وراه .. احـسّ كـنّ الدمـع تخنقنـي يـديـه=احـسّ كنّـه حـدّ منفـى .. والوطـن كـلّـه وراه
صوتك وحشني يا وطن .. وأحترت وين القاه فيـه؟!=وأمسيت اغني به .. وانا اللّي كنت اغنّي لـه معـاه !
وحشني صوتك يا وطن .. وأمسيت اغنّي : ليه؟..ليه؟·=ليه الكلام اللي نقـول يمـوت فـي سكـة صـداه؟!
ليـه الدوايـر تنتهـي مـع دربهـا اللـي تبتديـه؟!=ليه الشوارع ساكتـه .. والنـاس كـلٍ فـي هـواه؟!
ليـه اليديـن تصـدّ عـن شـيٍٍ تبيـه وتشتهيـه؟!..=يـوم العيـون تسابـق الجايـع علـى لقمـة عشـاه!
علمّتني في صف (أول حبـك) .. ان اكبـر سفيـه..=.. اللـي اذا حـسّ بغـلا خلّـه يفـرّط فـي غـلاه
طيّب علامك .. كل ما زدتـك غـلا .. تـزداد تيـه=آهات والله يـا وطن..حتـى ولـو مـا قلـت : "آه"

اكتب واسلّي خاطـري بـ(الكتابـه)=كود التهي في نظم الابيـات وانسـاه
واثر القصايـد منـه قامـت تشابـه=من وين اقلّب دفتـر اوجاعـي القـاه
هـذي قصيـده قلتهـا فـي عتـابـه=وهـذي قصيـده قلتهـا يـوم فرقـاه
وذيك القصيـده قالهـا مـن عذابـه=يكتب قصيدٍ منكسـر بـس مااحـلاه
ويقول: (( جابه كان تقـدر تجابـه))=واقول شعرك لعن ابـو مـن تحـداه
ويروح يضحك ما اقتنع في الاجابـه=ويقول: (( شعرك زين بطّل محاباه))
واقول: ((طبعا زيـن لأنـك زهابـه=لاصرت روح البيت وش لون تبغاه))؟
واليـوم ذاك الوقـت جمّـع شبابـه=واقفي ولاادري صاحبي ويـن وداه؟
رضيـت مــدري ذل ولا مهـابـه=ابعـد واهـلّ الدمـع لأيـام ذكـراه
الشعـر والليـل وبيـاض السحابـه=والضحك والحظ الـردي والمعانـاه
كلّـش يذكرنـي بـوقـتٍ غـدابـه=ياوين أبرمي هالجسـد فيـه وانسـاه

من عز نومي صحيت وشفت فـي عينـي=دمع تهـادى علـى جفنـي وأنـا غافـي
ستـرت دمعـي بكمـي قبـل يغريـنـي=وأخذت هذا الجسـد مـن باقـي لحافـي
وسريـت تايـه ورا خطـوات رجلينـي=لا الوجه وجهي ولا أوصافي هي أوصافي
أمشـي وأقـول لطريـقـي لا توديـنـي=لعيون نـاس تبـي تـدري عـن الخافـي
أمانتـك.. خلهـا مـا بيـنـك وبيـنـي=خابرك يالـدرب خـوة عمـر وسنافـي
مـا ودي النـاس تـدري وش يبكيـنـي=كرامـة النفـس ورث أبـوي وأسلافـي
أمشي وأحـس الخناجـر فـي شرايينـي=والبرد يمشـي وراي وينهـش اطرافـي
وحـيـد واللـيـل بـردونـه يغطيـنـي=تقـول كـن البلـد روح بهـا السـافـي
إلين مـا أوحيـت لـي صـوت ينادينـي=صوت أعرفه مثل ما أجهل وش خلافـي
قمـت أتلـفـت وانــادي لا تخليـنـي=ما غيره.. الصوت هـذا صوتـه الدافـي
ولمحت زوله من أقصى الـدرب لافينـي=مدري وش اقول لكن حـي هـا اللافـي
تعال.. شف غيبتـك كيـف أثـرت فينـي=تعال.. شفني وأنا أغرق عقـب مجدافـي
تعال.. خذنـي ورحبـي مـن عناوينـي=تعبت أعدي علـى جمـرك وأنـا حافـي
تعال واقطـف بصوتـك زهـرة سنينـي=كـل المواعيـد عقبـك شمعهـا طـافـي
تعـال وازرع خصـل شعـرك بكفينـي=بضمهـا ليـن أحـس بليلـك الظـافـي
تعـال وشفيـك خايـف؟ أنـت ناسينـي؟=قطعت صوتـي عليـك وطـال ميقافـي
حتى بديـت أشعـر أن الحـب معمينـي=وان أنت حلم عثـى فينـي وأنـا غافـي
لكـن أمانـة تـرى اللـي فـي كافينـي=إن رحت منك كـذا مـا رحـت متعافـي
بصـدق الحلـم وأحـذر لا تصحيـنـي=فـي خاطـري كلمتيـن إن قلتهـا كافـي
أمانـة الله عليـك إن غبـت عـن عينـي=لا يكون قلبك مثل قلـب الزمـن جافـي
مـع كـل دمعـة تذكـر رعشـة يدينـي=ومع كل ضحكـة تذكـر قلبـي الوافـي

هب الشمال وفـزّ بيـن المحاديـب=طفل ٍ على خدّه مشاريـه وعتـاب
والبرد شبّع جـرد الأيـام تعذيـب=وأنا ضحية بـرد وأيـام وأحبـاب
ياليل مالي غير حضنـك معازيـب=خلك معي لاشحّت وجيه الأصحاب
ماعاد هي لحيـة غـرام ومكاتيـب=لاوالله الا قرّبت صـوب الأهـداب
يابنت ياأم الضحكـه أم المعاطيـب=لاماك ذنب وشاعرك مابعـد تـاب
مرّت ثلاث سنين ياأغلى الرعابيـب=والريح تشكـي للشبابيـك والبـاب
مرّت ثلاث سنيـن بيـن المراقيـب=عدّيتهـا يابنـت مرقـاب مرقـاب
في ذمّتي ماعـاد أودي ولااجيـب=حتى الشعر ماعـاد ودّى ولاجـاب
يابنت عندي كلمـةٍ تقطـع الجيـب=بـاقولها لو ماحسبتي لهـا حسـاب
طرد المقّفي مثل طـرد العذاريـب=وأنا تعبت أبلع مشاريـه الأعـراب
أما تعالي وأقطعـي دابـر الريـب=والا انسي أني كنت انا وانتي أحباب