يا وجودي كل ما هبّ نسناس الشمال = وجد من حدّه زمانه على اللي ما يبيه
و يا وجودي كلما اضحيت ثم مال الظلال = لا غفت عيني و لا ذقت شي ٍ مشتهيه
وجد من قفّى و هْو في رجا كلمة تعال = و إلتفت من عقب ماْ اقفى ولا أحد ٍ لدّ فيه
و يا عذابي لا دنا الليل من روس الجبال = وانتهى يوم ٍ من العمر ما عاد أرتجيه
و انتي أبعد من سما الحلم و وصالك محال = يا بعد من هلّ دمعي ضحى الفرقا عليه
يا غناتي لا تحسبين دمعي يوم سال = ضعف و لاّ خوف و لاّ كذا و لاّ كذيه
و الله إني من رجال ٍ يضدّون الرجال = لكن الحظ ّالردي ساق دمعي كل أبيه
و الله إني كلما دار حوليك الجدال = قمت كنّ الموت يشّر على قبرى بديه
و الله ان قد لي و انا اصّد لاجالك مجال = صدّة اللي لا تضايق تذكّر قبر أخيه
و من سألني قلت مدري و إذا عاد السؤال = قلت له تكفى سؤالك ترى ما هو وجيه
وش تبيني اقول عن من ترى ذبحي حلال ؟ = و الخطا منها عليّ صرت أحبه و أهتويه
عذرها لو ماْ تْعذّر مثل و اضرب مثال = واحد ٍ ما يعرف الحرّ الاشقر يشتويه
وان رجعنا للتواصيف لله الكمال = لاْ انتهى ليل المزايين جاتك تبتديه
كنّها غفل ٍ مع البدو طاويها الحيال = ما يميّز وصفها إلا نبيه ٍ من نبيه
وآ هني اللي وصلها و ذاق من الزلال= شربة مع غفلة الناس من فيها لفيه
ياْ اول أحلام الطفوله على حد ّالخيال = الرجى باللي حمى البيت من حملة بريه
حال دونك سيف عنتر و تاسع حول حال = باْثر حول ٍ حال دونك و انا ادعى هيه هيه
هيه ياللي غرّك الحسن و اطغاك الجمال = و الله أني اموت ما شفت لأوصافك شبيه
لو يسام الحسن و التيه بجنيه و ريال= ما بقى في سوق غيرك ريال و لا جنيه
كيف أهدّك للمقادير و انتي راس مال؟ = راس مال و مال و المال ماْ يعطى السفيه
حافظك حفظي لعيني و رمشي لك جلال = و انتي تْشحّين بالما و انا شفّي مويه
شايف ٍ ظلمك و ساكت و طال الليل طال = لا نويتي طعن قلبي و انا ما قلت ليه
لو بقى للهيل صبر ٍ على فوح الدلال = ما بقى للهيل صبرٍ علىشي ٍ يجيه
و انتي تْسوقين عقلي على حدّ الهبال = تحسبين ان من بغى شي يقدر يشتريه
و لاّ انا يا وجد حالي وجود ٍ ما يقال = وجد من ضحّى بغاليه لْرضا و الديه
و يا وجودي بأول العمر قبل ألبس عقال = وجد من باع آخر العمر في رغبة ذويه
و يا وجودي كل ما هبّ صوتك من شمال = وجد من حدّه زمانه على اللي ما يبيه

يا صغيّر لا تضيعني بنظرات البراءه= وانت ما تعرف مدى تأثير نظراتك بحالي
آه يالبيه .. يا بشويش .. يا هدّ الإضاءه = للجفول اللي .. من جفاله يجفّلني ظلالي
فز .. باسم الله عليك .. من المبرّة للإساءة = وارقد آمن في عيوني .. واسهر آمن في خيالي
يا صغيّر .. والذكي .. مثلي .. ليا خانه ذكاءه = ماله إلا يعشقك ويصير لعيونك شمالي
قم فديتك وانت حر .. من الف باءه .. لين ياءه = ما عطاك الا الله .. اسرف واستبيح ولا تبالي
سو ما يرضي غرورك .. وإدّ ما تهوى أداءه = الحشا لك بيت حاتم .. وانت غالي عند غالي
قم تمخطر في الحشا .. وانسى الكتابة والقراءة = وحل واجب شاعرٍ ما حلته سود الليالي
وعلّمه وشلون تتعدي على خط استواءه = وعلّمه وشلون كيف .. وهل يضيعون الرجالي
وكيف يجني خلف سور الجامعة .. ذنب الكفاءة = ساعةٍ نادى ابليس وقال له : مالك ومالي
وأنا يشفع لك صغر سنك ونظرات البراءة = بري حالي .. كل مالديت يمي بري حالي

يا عظيمه كل شيٍ له حـدود ولـه نهايـه=لكن انتي ماوقفتي عنـد حـدّك ياعظيمـه
استلذّيتـي بطعنـاتـي واخذتيهاهـوايـه=كن ما لك حربـةٍ توجـع وطعنـاتٍ أليمـه
آه ليتـك مـا تماديتـي بطعنـات البدايـه=لين صار لكل طعنه فالحشـا معنـى وقيمـه
الله يبيحك ولكن كيف فـي أغـرب روايـه=تكتبين الحب كذبـه والهـوى دقّـه قديمـه
وانتي اللي كل ما لـدّت عيونـك فالمرايـه=ما لمحتي الا اليتيم اللي خذت قلبـه يتيمـه
واليتيمه فاليتامـى مالهـا حـق الوصايـه=الوصيّه عودها الغـض ونوايـاه السليمـه
لكن انتي صار لك حق الوصايـه والولايـه=واستبدّيتي وشدّوا البدو واضحيتـي مقيمـه
ما رحلتي لين حطّمتي بمـا فيـه الكفايـه=عاقلٍ حب الجنون وصوت نارك في مشيمـه
استبحتي حرمة المجنون بـادراك وعنايـه=والتفتّي له بعقلك وارتكزتي فـي صميمـه
امتلكتي غايته لو كـان مالـه فيـك غايـه=وانتصرتي في عيونه واعترف لك بالهزيمـه
من كثر ما يعشقك ماقال لك بالحـب رايـه=خايف الأيـام لا تطلـع عواقبهـا وخيمـه
في طريقك كل ماكنّه لمـس درب الهدايـه=تاه ودروب الحيـاة المستقيمـه مستقيمـه
تايهٍ بصري ومـن جابـه لبيـت الله تايـه=عذر من غمّض بعين وعينه الأخرى كريمـه
فدوتك مافات من ليّام واللـي عـاد جايـه=يا بعد عمرٍ مخاسيره معك عنـدي غنيمـه
أنتي الفارع بقـد وجـد واسمـاء وكنايـه=من عشق مثلك يجوز من الهوى وشداد ريمه
ليه لا وانتي بحسنك في ذوات الحسن آيـه=لا ذهب لا ماس لا ياقوت لا احجارٍ كريمـه
شاعرٍ له مع هل الرايـات فالمرقـاب رايـه=كل ماهبّـت هبوبـك فلّهـا قـدر وحشيمـه
سامحك من ألف باء الذنب الى مالا نهايـه=واستباحك عن خطـاه وكـل طـقٍ بتعليمـه
يوم قلتـي أعطنـي حرّيتـي أطلـق يدايـه=ما ذخر عن وجهك الا طعنتينٍ فـي صميمـه

الهنوف اللي سرت من نجد وامست فالحويه=ضيقت صدر الرياض وسافر الطايف وجاها
وانتني غيم الحجاز لخد نجد النرجسيه=يوم جاته من زعلها كنها تقصر خطاها
زعلوها وارحلت واخلت قصور الفاخريه=وألقتني شرهت الزعلان واخطاني رضاها
سافرت والله ما اخبر اللي يزعلها عليه=واستباحت لله الخيره سهر عيني وماها
ليتها يوم استباحت دمعة العين الشقيه=ما استباحت دم قلبي من خلاها في خلاها
سامح الله ظلمها وطعونها الخضر النديه=والله يسامح خناجرها ويعفو عن خطاها
عرضتني للهبايب والضمى والمهمهيه=واتركتني للزعل والشوق والكبر وغلاها
والغلا ماهو في يديها ولا هو في يديه=الغلا شيءً من الله واشهد ان الله عطاها
من غلاها لو توردني على حوض المنيه=كنها تسقيني الشهد المصفى من شفاها
ومن حلاها ما توصفها الحروف الابجديه=كيف توصف وردةً يبري من العله شذاها
الورود تغار منها مزهريه مزهريه=وان تباهت عذرها معها يحق ألها تباها
ما يشابهها شبيه ولا يحاليها حليه=جل ربً يوم صورها فرقها عن سوها
لأقبلت هيجنت وان اقفت جذبت السامريه=وعذابي وان عطتني وجهها والا قفاها
ان بدالي وجهها يسعد صباح اليوسفيه=وان غشتني نفحة من ليلها يسعد مساها
درة بالموت محروسه وبالبحر محميه=البحر من دونها والموت الاحمر من وراها
دونها ما اغليت وسم اهلي ولا شداد المطيه=مرخصً فالقاع عمري والثريا في سماها
لايمي يبلى بحب الحضر فعيون بدويه=في ضروفً ما يقارن مستواه بمستواها
الله اقوى يافقير القلب ابو نفسً غنيه=مالك الا الصبر والجنه لقاها من لقاها
والهوى اللي يطرح الرجال في يدين اجنبيه=علةً بالجوف لا تبرا ولا يلقى ادواها
والهنوف اللي لرد الثار تاخذها الحميه=شفتها بالعين في قلبي وهي تاخذ قضاها
وشفتها تشتاق تطعني بلا ذنب وخطيه=كثر ما تشتاق لاعماقي وانا اشتاق لدفاها
كل ما عرقت بمسمها تحريت الخويه=والحقت بالميسم الميسم كذا على عماها
عاقبتني كل يومً تلحق الكيه بكيه=واتعبتني وادركتني والحقت نفسي مداها
وان تمادت جهزوا قبري وانا ابكتب وصيه=بكتب الله لا يعاقبها ويرضى لي علاها
العمار تلفه الايام والدنيا مديه=والسنين تلفني والنار تحرق من وطاها
علموها تلحق الباقي مدام الشمس حيه=واتغانم ما بقى مني وما تطلب فداها
لا تمادى في جفاها والرياح الموسميه=ما تقدر وقفة الاشجار وتثمن عطاها
علموها ما بقى لي غير ادن الهاشميه=كان ترضاها علي والا تهون من جفاها
وانصحوها لا تحمل نفسها نفسً بريه=وذكروها بالقبر لاعلها والا عساها
وعلموها علومها لا تطول فالحويه=ديرة ما هي بديرتها لو اعجبها هواها

فمان الله يأول من سكن بين الضلوع العوج=عسى دربك سفير وياعسى الله ما يخليني
توكل لا توادع رح عسى درب الجفا المسهوج=يصادف درب فرقى عقبها ما تلمحك عيني
سمحت من الهوى ومن القصيد ومن زراق الموج=ورميت أغلى مجاديف الغرام وجيت بيديني
أبغرق في عذابك لا رحلت ويصبح المنتوج=قصدً في حياتي سلوتي وان مت يرثيني
اذا هبن بنات الريح للذكرى بدون سروج=ابسرج مهرة النسيان وارحل من عناويني
وابنسى لين اسج وبرسل الونات فوج وفوج=وبنسى دمع عيني ينتثر وانساك من حيني
صبور؟ أي والله اني ما ثنيت العزم قبل ادوج=بريضان الجفا واضما لوصلك لين تسقيني
شجاع: إي والله اني ما عرفت الذل قبل اسوج=قدم رجلي على درب لبيت أهلك يوديني
كريم؟ إي والله اني ما عرفت الشح قبل تروج=دموعي في عيوني ثم اشح بحسرتي فيني
احبك؟ حسبي الله ليت مالك في سماي بروج=ولالك في البسيطة كود شيء بينك وبيني
دخيلك لا تلفت رح بفالك واترك المرجوج=تغانم مابقي لك ولا أنا ما عاد يمديني
فمان الله سق ركبك على درب السنين العوج=ولكن طالبك لا أقفيت عني لا تخليني

هيه ياللي غرك الليل واغراك النديم=هيه ياللي هزك الشوق والمسرا ضياع
وقفي بين الخطأ والسراط المستقيم=وألعبي بين التراحيب وكفوف الوداع
سولفي من المشاريه في صوت الحشيم=واسكتي مثل الشفايف اليا طاح القناع
واضحكي مثل النواوير في روضة خريم=واغربي مثل المزاجات في غربي الرفاع
وابعدي مثل المتاهات في حلم اليتيم=واقربي بين السوالف وكتفي والذراع
وانظري لي نظرة الشوق للشيء القديم=واغرقي بالدمع الازرق مظاليلً وساع
واصبري مثل المسافات في صبر الحليم=واسمعي صوت الهوى يوم فليت الشراع
يوم صرتي عود ريحان ورضاي النسيم=اصبري يا نجمة الصبح ما للصبح داع
قد طلبت الله وانا بين زمزم والحطيم=شوفتك يا اغلى ثنية اليا صرتي رباع
العيون تجوع لك جوع والله العظيم=والعشاء فعيونك السود وعيوني جياع
ان عطيتي ما يرد الكريم الا الئيم=وان بخلتي قلت تكفين والدنيا متاع
اقبلي مثل التباشير في وجه الكريم=وارحلي مثل التعازي على موت الشجاع

بانت نجوم الصبح واللي في عيوني من عصر=ماهوب دمع لاتضايقت آتنّهت واسكبه
لاوالله الا حلم شيخٍ عن طموحه ماقصر=لو قصرت سود الليالي من يمينه وشنبه
وانا لو ماتعلّمت الهزيمه والنصر=ماكان ذقت من الهوى القتال مرّه واعذبه
شاعر وعصري فاتني واعيش في اغرب عصر=لاالوقت وقتي والزمن مابيني وبينه شبه
لكن هنوفٍ مثلت دور العزيزه في مصر=قدّت قميصى واسرفت في وصلها قبل انتبه
يوم انتبهت استشهدت ضدي بحراس وقصر=قلت ارحمي عزيز قوم ذلّ وارخى منكبه
ماني نبي الله اقاوم حسن خصرك لاانهصر=انا بشر..عبدا ضعيف وكل برقٍ يجذبه
قالت وهي توّي تثنّى كن مافيها خصر=الشعر ياضيدان ورث جدود والا موهبه ؟؟
قلت الشعر سحرٍ يسخَر لي القلوب ويختصر=عمر المسافات الطويله والسنين المجدبه
والحب شيٍ لو حصرته في ضلوعي ماانحصر=يطغى على حدب المعاني لين ابيحه واكتبه
وان علّمتني الفاتنه وشلون اسير بلا بصر=علّمتها الفنجال وشلون اتحدى واشربه
وعلَمتها اني كذا طال الزمان والا قصر=وان اعذب الحب اصدقه وان اعذب الشعر اكذبه

يقول من عدى علـى روس الطـوال النايفـات=من ضيقةٍ فالصدر كانيهـا وحزتهـا عصيـر
يا الله يا أعظم من الأسماء واجل من الصفـات=يـا الله يـا الله يـا سميـع ويــا بصـيـر
يارب أجرني من عذاب القبر ما بعـد الممـات=وأغفر لأبي وأبيه وأخوانه وأجرهم يـا مجيـر
يارب أنا عبدٍ خلقته مـن تـراب وطيـب ذات=ونفخت فيه الروح وانت اللي على ذلـك قديـر
يارب انا ما اخترت اكون الشاعر اللي قاسيـات=الطرق يطرقها وتصبح لـه أرق مـن الحريـر
أنت الذي خلقت كائـن حـي غيـر الكائنـات=الحمد لك والشكـر والمنـه وخيـر الله كثيـر
يارب انا عبدك وأشيل مـن الذنـوب الكايـدات=مالا تشيـل الأرض والدنيـا رحاهـا مستديـر
يارب انا شاعر وأهيم بكل وادي مـن شتـات=واقول ما لا أفعل وانا مؤمن ولي قلب وضميـر
شاعر ويتبعني من الغاويـن كثـر الغاويـات=أذنب بهم وإن غرروا بي صرت اقل من الغرير
والشعر مثل السيف ابو حدين وعيـون البنـات=ياليتها كانت مدى الشاعـر ومرسـاه الأخيـر
ما كان جبت العيد والعـذر البنـات المترفـات=إلين ما صرت الحكم بيـن المقّـدي والضريـر
البارحه هبت علي الريـح مـن كـل الجهـات=حتى عرفت إن الليالي غيـر والوقفـات غيـر
وقمت التفت للسنين اللي غـدت منـي فـوات=وآمنت بان العمر مهما طال في الدنيـا قصيـر
كلٍ يموت وينتهي والوقت يمضي هـات هـات=ولا عاد يبقى إلا الذكر إن كان شر أو كان خير
والشاعر أبقى بعـد موتـه بالعلـوم الطيبـات=او عكسها والموت ياخـذ والقصايـد تستخيـر
أقرب مثال اللي لهم في البيت سبـع معلقـات=راحوا ولا زالت قصايدهم كمـا البـدر المنيـر
الأعشى وعمرو وطرفه بن العبد والعبسي ثبات=والنابغه وابن ربيعه وابن أبي سلمـى زهيـر
والشعر فضّل شاعره على سواه ولـه سمـات=فضّل أبو الطيب وهو سقّا وأبو فـراس أميـر
والشعر مهما فضّل الشاعـر مقـام ودرجـات=مافضّله بالفعل في اليوم العبـوس القمطريـر
أقولها وانا اعرف إنهـا مـا تلحفنـي العبـاة=اللي طرفها في يدي واكمامهـا فيـد الوزيـر
لكن على الله يامتم الصـوم ومقيـم الصـلاة=تدفى الكفوف الباردات ويجبر العظـم الكسيـر
يا صاحبي يا حظي المكتوب يا أغلى الأمنيـات=يا اجمل الصدفات لو ما جات يا السهل العسيـر
من صيف عاما ما خذاني عنك بعد ولا سبـات=وانت تجاهلني وانا وضعي من اسبابك خطيـر
والحب ذنب مـا يكفـرّه التجاهـل والسكـات=واجه فديتك واحسم الموقف يصير اللي يصيـر
ولا تعلقنـي علـى أمـل نجـومٍ سـاريـات=وابقى على قول العرب لو لا الأمل مات الفقيـر
يا سيدي يا أغلى السنين الماضيه والمقبـلات=يا أعز وأغلى من على الدنيا برجلينـه يسيـر
لا تحسب إني جاهلٍ بعض الأمـور الخافيـات=اللي تحدك وانت مالك مـن مخاليبـي مطيـر
أدري واقـدر واتحمـل واتحاشـى الانـفـلات=وإلا تراني في بعض الأحيان ما أطيع الشويـر
والصبر مفتاح الفـرج والقـل جـرّاح اللهات=وسهيل يبدي في السما ويهيج في الأرض البعير
وانا من اللي مجدهم على ظهـور المسرجـات=قومٍ ما هي بتشد لا جاها مـن القـوم النذيـر
وش عادني حيٍ على شانه ووش لي في الحياة=إن كانني لا سرّجتها ما أفرِّق الجمـع الغفيـر
لعيون من حبه رسى مرسى الجبال الراسيـات=وإليا اصطفق ما كنه إلا الموج في البحر الغزير

الجادل اللي يمـر القلـب شارعهـا=بيـن الحنايـا تعـدي ماتطالعـنـي
تقفي مـع الـدم بعروقـي واتابعهـا=واحس كنها علـى نفسـي توزعنـي
قامت تبعثر غلا وان جيت ابجمعهـا=اضمهـا واتشتـت ليـن تجمعنـي
بين الحنايـا تثنّـي فـي مرابعهـا=كنها تقـول اتحـدى مـن يطلعنـي
دام الحشـا بيتهـا وانـا مدلعـهـا=وش دخل القلب يزعل يوم توجعني؟
وليا خـذا رمشهـا رجـل يطالعهـا=لعـل رمـش خذانـي مايرجعنـي
عيونة جيـوش والنظـرة طلايعهـا=غارت بصدري وجاز لسيفها طعني!!
ويوم انكفت لين قلبي مـن قلايعهـا=والصبر عن خافقي ماعـاد ينفعنـي
مدها لها القلـب وعيونـي مراتعهـا=اموت فيها وهـي للريـح تزرعنـي
ريحانتي والغـلا بالقلـب زارعهـا=تشرب عروقي وتروانـي وتشبعنـي
كان النحل من رحيق الورد مشبعهـا=انا شموخي من احلا شـي جوعنـي
وليا تعانق خجلهـا مـع تواضعهـا=عانقت ليل علـى مسـراه شجعنـي
وليا تعانق خجلهـا مـع تواضعهـا=عانقت ليل علـى مسـراه شجعنـي
لوينسـري ليلهـا سريـت بايعهـا=بشر ولا اللة عـن الزلـة مرفعنـي
واصبحت من عقب ماني ضدها معها=ان ضاعت اضيع وان دلت تسنعني!!
للجـادل اللـي شراينـي شوارعهـا=القلـب يقتادنـي والنفـس تمنعنـي.

ياللي على وجهي قريتي كل صفحات الشقى= اقري وانا بكتب قصيده واشعل الساحه حريق
باقي كثر ماراح واللي راح نصف اللي بقى=وان ماوصلتْ لغايتي بموت في نصف الطريق
يابنت يوم امطر غلاك في قلب ضيدان وسقى=تدرين وش سـبة شقاها وسبة الجرح العميق
شقاها من يمناه واسم الشيخ والنفس امحقى=والجرح منك يا أعذب العذبات يالموت الرقيق
يابنت مادام البدو تخلف هقاوي من هقى=وانا بدوي متني يشيل من الزمن مالا يطيق
ابى افتخر حنا بدو نعشق على وضح النقى=حنا بدو فينا الولد للقمه العليا عشيق
حنا بدو فينا الولد لو شاف موته مااتقى=حنا بدو فينا الولد يرقى ولوماله رفيق
حنا بدو فينا الولد لامن رقى رقى رقى=الين يوصل غايته لو كانت في قمة طويق
يابنت جيتك والثمن عمري ابي ليلة لقى =يامّا كذا ولا بلاش من الصداقه والصديق
وساعة تبسمتي وشفت الجمر والثلج اصدقى =قلت ان شهد ان الموت حق وصحت لك صيحه غريق
واعتقت دمعي والزعل والحزن لرضاك اعتقى=وقفه عيوني في عيونك ياعساها ماتفيق
وآمنت باللي سخرك تقرين صفحات الشقى=واشعلت بردي في دفاك وشبت الساحه حريق