الحلقة الثالثة

@@ خريشة الخريشات @@: هلا بجنية المنتدى شلونك اختي؟

## جنية المنتدى##: هلا وغلا بيك أنا بخير الله يعافيك... إنت شلونك وشلون صحتك إن شاء الله بخير ... خبريني عن علومك.

@@ خريشة الخريشات@@: بخير الله يسلمك ..... زين يا معوده اللي دخلت المسنجر لأنني كنت ناطرتك .... أنا محتاجتك بخدمة ضرورية، وما حدا راح يساعدني غيرك..... تكفين الله يخليك لا تتخلين عني وساعديني اطلع من هالورطة أرجوك.

## جنية المنتدى ##: إذا كنت اقدر اخدم من عيوني ... شغلتي بالي قوليلي شنهي سالفتك.

@@ خريشة الخريشات @@: انت تعرفين بالعلاقة اللي بيني وبين $$$ نافش ريشه $$$، وعندك خبر عن قصة الحب اللي بينا.

## جنية المنتدى##: اعرف سالفتكم من خلال كلامكم انتو الاثنين، ويا عمي الله يوفق حتى نصفق (العرس).

@@ خريشة الخريشات @@: تعرفين شكثر أنا احب $$$ نافش ريشه$$$ واعزه واموت فيه، وتعرفين اني قاعده ارفض كل العرسان اللي قاعدين يتقدموا لي علشان سواد عيونه..... (تبكي) بس للاسف انو طلع إنسان جاهل وما يقدر المسئولية، وقام يتصل فيني على البيت بأي وقت ويسبب لي اجراح مع أهلي، وخلا كل الأهل يشكون فيني.

## جنية المنتديات ##: طيب سؤال: من وين حصل على رقم بيتكم ؟؟

@@ خريشة الخريشات @@: مني أنا عطيته رقمنا بعد ما حبيته، ووثقت فيه، وصدقت كلامه وما خطر على بالي في يوم من الأيام انه راح يعور قلبي .... وهالحين قام يلعوزني ويبني اشوفه واطلع معاه، ومثلك عارفه بعاداتنا وتقاليدنا مثل هذه السوالف مستحيله عندنا.

## جنية المنتدى ##: أفهم من كلامك انتو متفقين على الزواج وانتو حتى ما تعرفون شكل بعض .... معقوله انتي البنت الجامعية بتفكري بهالطريقة!!؟؟

@@ خريشة المنتديات @@: اعرف شكله من الصور اللي طرشها لي سلامته على الانترنت .. بس هو للحين ما بيعرف شكلي.... المصيبة من يومين اتصل وأول ما رديت على التلفون قام يسولف معي، والداهية والوالد جنبي ..... ولما لاحظ الوالد اني مرتبكه أخذ مني السماعه وسمع كل هرجه ..... ومن كلامه فهم الوالد انو في علاقة بينا.

## جنية المنتدى ##: يا حسرتنا وبعدين شصار.

@@ خريشة المنتديات @@: أكلت طقه من الوالد لا صارت ولا استوت ، ولامني على خاينة الثقة إلي وضعها فيني.... وفوق هذا منعي اروح الجامعة، واللي ذبحني أكثر نظرة الاحتقار اللي قاعد يطالعني فيها.

## جنية المنتديات ##: الله يهديك عطيتي $$$ نافش ريشه $$$ ثقة كاملة بمجرد ما تعرفت عليه على الانترنت أو من المنتدى، وعلمتيه بكل صغيره وكبيره عنك، وسردت له أدق التفاصيل عن حياتك، وحبيته من الصورة اللي طرشها إلك على ايميلك يا خريشه الخريشات .... معقوله انت (مستغربه) .... مش جايز يكون ارسل لك صورة صاحبه، وثانيا كيف عطيتيه رقم بيتكم بمنتهى السهولة.

@@ خريشة الخريشات @@: غلطة وندمانه عليها صدقيني... بس تكفين الله يخليك ممكن تساعديني وتبلغيه لا يتصل علي بالمرة ولا أبي اسمع صوته خير شر، وكفاي اللي حصل لي منه كفاني.
## جنية المنتدى ##: زين عرف $$$ نافش ريشه $$$ بالمشكلة اللي سببها إلك؟؟

@@ خريشة الخريشات @@: أيوه عرف، لأني دقيت ثاني يوم وقلتله بأنه ورطني مع أهلي، وخبرته بأنه السبب في حرماني من المرواح على الجامعه وبرة عتبة البيت، وتوقعت يوقف إتصالاته ويحترم نفسه ويقدر المأزق اللي حطني فيه ..... للاسف ليومك هذا وتلفون بيتنا ما يسكت، ولما يردوا الأهل يسد الخط بوجهم.

## جنية المنتدى ##: بصراحه ماني عارفه شقولك .... تعرفيني ما احب اتدخل بخصوصيات الناس ...... بس على العموم لو صدف وكلمني على المسنجر راح اثول نفسي قدامه، وما راح ابينه اني عارفه بالسالفه، وراح اسئله عنك وأكيد راح يخبرني باللي جرى، وساعتها راح انصحه بالابتعاد عنك بإسلوب مؤدب.

@@ خريشة الخريشات @@: تسلمين يا غاليه والآن بطلع من النت لأنو الأهل صاروا على جيه مع السلامة.

## جنية المنتدى ##: مع السلامة.