الا يالله عفوك لا معـي بيجـر ولا جـوال
ولا عندي وظيفـه والتجـاره فاشلـن فيهـا
ولاعندي شهاداتن ولا حرفـه تسـد الحـال
ولا حظن كبيـرن لأخطـت الجـره يقديهـا
مخابي الثوب تومي ما دخلها من زمان ريال
بها فاتورة الكهـرب ولا يمدينـي أقضيهـا
على‎ ‎ذيك العراوي تتعب الحادي مع الجمـال
ثلاث شهور فالورشـه وشهريـن مغطيهـا
ابيها لوتجمل يـوم واجلبهـا علـى الـدلال
يجيها واحدن حظه مثـل حظـي ويشريهـا
نصيت العسكريه يوم قالـوا للنظـام إرجـال
و قدمت الملف و صورتين متشخصن فيهـا
خذ الأوراق مني واحدن ما عنـد بـوه دلال
سلوم الناس وأهل المعرفه والطيب مخطيهـا
قراها في دقيقه والتفت عجلـن علـي وقـال
شهادتك العظيمه ياولد ويـن انـت مخفيهـا
هزيت الراس ما عندي تقول اني من البنقـال
وقمت أحـب خشمـه واطلبـه بالله تمشيهـا
حذفها من يده شين الطبيعـه والنبـا والفـال
وقال أزين تعود صـوب نوقاتـك تعشيهـا
تناوشته من الكرسي وعفت الحل والترحـال
وضربته بالبياله عقب مـا بيحـت شاهيهـا
خذوني للسجن لانيـب لاظالـم ولا محتـال
مجرد واحدن جـا يكحـل عيونـه فيعميهـا
ويومني خرجت أقفيت لارض الله وسيع الجال
على بـرن هـواه يـداوي العلـه ويبريهـا
ادور قصعة الجربوع والضب الفتى يحتـال
والأرنب ياشفـاة الـروح محلاهاوطاريهـا
بلا كهرب ولابيجر ولا غـازن ولا جـوال
قوانين الحضـاره لاتبـي شوفـي ولا بيهـا