>×<دنيـا غريـبــــه>×<مـــاتدوووم×!×

to0o0ofee · 22-04-2005, 03:34 AM

دكتور::

مشكـــــــــــــووووور.. (*40)

====================

همسات ورده

ياحبيلك بس..والله اني فقيييت كشرتي يوم دريت انك قريتيها..

تحلييييييييييلك حلووووووو (*40) وكل اللي تبينه على عيني وراسي..

بس اعذروووووني ياناااااس والله الإلهام مقاطعني..وصرت اغصب نفسي عالكتابه

ومايعجبني اللي كتبت وامسح..عارفه اني مصختها بس ياليت لو تقدّرررون

انا احاول قد مااقدر اني اطلّع الجزء بأحلى صوره..وافرح بتعليقاتكم وملاحظاتكم

من جد افرح واتحمّس اكثر..

بحاول اني انزل الجزء في أقرب فرصه..وبيكون طويل ومليان احداث...

ابي ارضيكم قد مااقدر وصدقوني اني ازعل واتضايق اذا ماكان الجزء بشكل حلوو..

انا الآن بديت اكتب الجزء..وان شالله بيجيكم..

بس لا تسألوني لاني مادري..

الله لايحرمني منكم..

تحيّتــــــــي (*35)

همسات..وردة.. · 23-04-2005, 11:57 PM

مو مشكلة توفي خذي راحتك..
بس لا تطولين علينا عاد..
تراك ماتنعطين وجه..
مااوصيك نبي جزء حلوووووو زيك..
ويارب الالهام والتهاني والعنود ومزنه كلهم يرجعون لك..
قولي امين..

to0o0ofee · 25-04-2005, 05:53 AM

همسات (*33)

===========

اهلين ياأعضاء وزوّار..كيفكم؟؟بخير ان شالله؟؟

والله وحشتوووني ومن زمان عنكم (*35)

هذاني جيتكم ومعاي فصل (*37) ..عساه يعجبكم..

واعذروني عالتأخير..وان شالله الجزء بيكمل في اقرب فرصه..

بس مابغيت اطول عليكم اكثر من كذا وجبت لكم هالفصل.. (*23)

وعليــــــكم بالعافييييييه..

نبــــ عـــــروق ـــــض

to0o0ofee · 25-04-2005, 05:55 AM

الجزء العاشر
الفصل الأول

يسكر أزرار ياقة ثوبه البني وشي واحد يدور في باله من امس..اسمها ريم والا لا؟
يمكن اسمها ويمكن لا بس انا لازم اتاكد من هالشي مشّط شعره المبلل لبس طاقيته وشماغه تعطّر بعطره الوحيده اللي يعشق ريحته وكان على آخره قال في خاطره "لازم اشتري جديد في أقرب فرصه"اخذ مفاتيحه وحطها في جيبه وطلع من غرفته ورجع عشان ياخذ قلمه بيير كاردان ونزل تحت ولقاها جالسه في الصاله على كرسيها المعتاد وبملامحها الي يعشقها.. ومعها رادوها البني القديم فاتحته على إذاعة القرآن وتسمع لقراءة السديس
تركي: السلام يمه (وراح لها يحبها على راسها ويدها)
ام عبدالله وهي تبوسه على يده: الله يسلمك هلا هلا بولدي
تركي وهو يجلس عند رجولها ويده بكل حنان تضم يد امه: شلونك يمه؟بشريني عنك؟
ام عبدالله بنظرات حب وصوت تعبان: بخير ولله الحمد
تركي: الحمدالله (قام عنها) يالله اجل فمان الله بطلع انا
ام عبدالله: وين يوليدي مافطرت
تركي: مايحتاج يمه في الشركه افطر
ام عبدالله: ياوليدي ماينفع تطلع وانت ماكلت شي خذ لك لو ملعقة عسل
تركي يبتسم: طيب وين هالعسل
قامت امه وراحت للمطبخ بخطى بطيئه يبان على الإجهاد
تركي يلحقها: الله يعافيك
عطته ملقعه كبيره بعد ماغمستها في العسل ومدتها لفمّه فتح تركي فمه بكل طواعيه ودخلت امه الملعقه وهي تقول له: بالعافيه
تركي وهو يشرب مويه: يعافيك الله.. يالله مع السلامه حب راسها وراح وهي لحقته للباب
تركي: برد وهوا يمه لا تطلعين
ام عبدالله: خذ لك جكيت والا اش
تركي وقف وقفه بسيطه: ايه والله نسيت
رجع تركي لغرفته واخذ بالطوّه ونزل بخطوات سريعه طلع للحوش وفتح الباب الخارجي وقابل عبايه قدامه ماستوعب اول شي بعدين ابتسم يوم شاف سيارة نسيبه
تركي:هلااا مشاعل.. والتفت لنسيبه مساعد يسلم عليه
مشاعل: تركي امي قايمه
تركي: ايه قايمه..وش جايبك
مشاعل: ههههههههه طرده يعني؟؟مساعد بيسافر وجيت عندكم..والا تبيني اقعد بلحالي في البيت
تركي: الله يحيييك بينوّر البيت والله..وش عنده مساعد بيسافر؟؟والا تبع شغله
مشاعل: ايه انت خابر شغله
تركي:الله يعيين..يالله انا بروح الشغل
مشاعل: اذكر الله..مع السلامه
ركب سيارته وهو مبسوط .. يحب مشاعل اخته .. هي اكبر منه بسنتين .. مافيه بينهم فرق..ومن كانوا صغار علاقتهم قويه لحد الصداقه,,حرّك متجه لعمله وماكان بعيد...وهو في الطريق جت في راسه كم فكره قيد التنفيذ.. وكلها تدور حول هالريم هذي..اللي اشغلت باله من كلمها.
وقف سيارته في الموقف الخاص له ونزل مر على الأمن سلم عليه بهزّة راس وابتسامه متواضعه اللي تقلب ملامحه 180 درجه لانه فيها تلين ملامحه وتتحول حدّتها لرقه.. دخل الشركه بخطواته السريعه ويسلم على كل من شافه بهزة راس وابتسامه رسميه ركب الأصانصير بيروح لمكتبه في الدور الثاني .. مر على مدير وسكرتير المكتب فيصل..
تركي: فيصل جب ملف المشروع وتعال
دخل مكتبه وجلس عالكرسي
دخل عليه فيصل:السلام عليكم
تركي يبتسم: وعليكم السلام
فيصل يجلس عالكرسي المقابل للمكتب ويحط رجل على رجل: وش تبي فيني؟!
تركي: شف!!!ياللوح هذا اسلوب تكلم فيه مديرك وصاحب الشركه اللي تشتغل فيها؟
فيصل بنظرات عتبانه وضحكه شاقه الوجه: وهذا اسلوب انك تمر على صديقك الصدوق ولا تسلم!!
تركي: هههههههههههههههههههههههههه الله يقطع ابليسك
فيصل: ومن قال ياحضرة المدير
تركي:ههههههههههههههههههه اسمع بس وبلا كثرة حكي
طلع موبايله وسحب قلمه وكتب شي على هالورقه صفطها ومدها لفيصل: جب لي هالرقم بأسم مين .. بالكامل طبعاً
فيصل يسحب الورقه بدون مايفتحها وببلاهه:وش قالوا لك اشتغل في الاتصالات انا
تركي بقللة صبر: فيصل بلا دلاخه..عبدالله اخوك في الاتصالات عطه الرقم وجب لي الاسم اليوم او بكرى
فيصل يحطها في جيبه: طيب...بس ممكن أسعل سعال؟
تركي يناظر فيصل بابتسامه مكتومه لانه عارف فيصل ماينعطى وجه يمسك خط: وش تبي؟
فيصل:وش تبي بالأسم؟؟ورقم مين هذا؟
تركي: لغرض تحرّي..(بحزم) وين ملف المشروع؟
فيصل يوقف ويمد الملف
اخذه تركي وفتحه وبدون مايرفع راسه: كلم الموقع وقلهم اني بجيهم اليوم
فيصل: ان شالله.. وطلع
تركي حط كل شي على جنب.. وقت الشغل شغل .. وهذا سبب قوي من اسباب نجاحه في حياته وشغله.. تركي صاحب شركة مقاولات.. وشغلهم ماشي بس هو يبي يوسّع نشاطاتها.. يكبّر سمعتها.. والمشروع الي في يده اول خطوه بهالشي.. المشروع كبير وقوي.. وهو متوقع لشركته من ورى هالمشروع نجاح كبير.
= = = = = = = = = = = = =
نرجع للإستراحه..
العيال
خيمة الشعر
نايف منسدح ومغطي وجهه بشماغه
سلطان يسحب الشماغ: نايف..قم ياشيخ امي مكلمتني بروح اتقهوى مع خالاتي
نايف: رح انت بنوم شوي
سلطان:قم يالله..استح على وجهك اكبر منك وتاركني بلحالي
نايف يجلس: ياربيه منك..شرقه
سلطان:ههههههههههه مقبوله يانايف يالله بس خل نسلم على خالاتك وراي دوام انا
نايف: يالله

عند الباب..

نايف: احم احم.. ياولد يمممه
الجوهره تطلع لهم:هلا هلا يارجل..حياك
نايف يحب راس امه:هلا يمه وشلونكم؟
الجوهره: بخير الحمدالله(تسلم على سلطان)
سلطان:شلونك ياخالتي؟
الجوهره: بخير ياعمري..ادخلوا ماحولكم احد البنات نايمين(دخلتهم المجلس اللي جالسين فيه)
موضي: هلا والله بعيالي
نايف: هلا بجدتي موضي.. يحب راسها ويدها
موضي تضربه على كتفه:اهاا بس..تسم مره قلت لك لا تقول جدتي
نايف: ههههههههه طيب ياامي موضي لا تزعلين بس وش اسوي مااعرف يصير عندي امّين لازم الجده
موضي: جعل مالك جده
نوره: هوّ يمه..سم الله عليتس..
نايف:هههههههههههههههههههه ياحليلك ياامي موضي تدعين على نفسك
موضي تسفهه وتلتفت لسلطان: وش لونك ياوليدي.. وش اخبار المستشفى
سلطان: والله الحمدالله
نوره: مسيكين مايفرغ من هالشغل ابد
نايف: اقول سلطان ورا ماتعرس.. وش وراك
نوره: يخلي الناس مرضى في المستشفى ويعرس لااا ماتصير(تتهزّى على ولدها اللي كل ماقالت له اعرس قالها هالكلام)
سلطان: هههههههههههههههههههه نايف اعرس انت واسكت عن غيرك
موضي: وهو صادز ورا ماتعرس؟؟
"سلطان يطالع نايف بعيون وكنه يقول هين بس نطلع اوريك شغلك" ونايف انواع البسطه..
نوره: حاطه عيني على وحده مبطي يوم انه يتخرج وخِطبت البنت وتزوجت وجابت ثلاثه ماشالله وهو على حاله
سلطان: يمه وش لون اعرس ووين احط بنت الناس فيه وانا كل يومي في المستشفى؟ والا تبيني اناوب في المستشفى واخليها
نوره: والله ياولدي هذا شغلك مهوب متغير..لا الحين ولا بعد سنين توكل على الله واعرس.. واللي بتاخذك بتدري عن وضعك محد بغاصبها
سلطان: يمه الله يرضى لي عليك انتي تعرفيني
نوره: ابد هذا لونك
موضي: موب بعيد عن خاله
سلطانه تغير الموضوع: ماشالله هذا منصور ولدنا يدورون له
الجوهره: مـــاشــالله الله يوفقه يارب
موضي: الله يوفقه ومن بياخذ
سلطانه: تونا يمه مابعد لقينا له..ندور له
نايف: لا يعرس قبلي اهم شي
الجوهره: خل موضوعك يكتمل بعدين تكلم هذا وانت توك
موضي: رجال نايف ماينرد
نايف: الله يطوللي بعمرك يامي موضي
نوره: شيخ ولد شيخ ضد الضديدي
سلطان: يمــه..حقوق الطبع محفوظه..انا خابرها تنقال لي
نوره: كللكم عيالي
نايف: خلاص اخذتها انا..تبيها اعرس
سلطان:ههههههههههههههههههه اجل تنازلت لك عنها
موضي: وينهم هالبني؟؟ماقاموا
نايف: يوم قمت الصبح كانوا قايمين
الجوهره: وش يدريك عنهم؟
نايف: صلحوا لنا فطور
نوره: ماشالله
سلطان: سنعين والله روحوا لنا شاهي وحليب بزنجبيل وصينية الفطور
سلطانه: لا بناتنا سنعييين اجل يتّكل عليهم
الجوهره: هم اللي مصلحين المراصيع
موضي: تهبّل ماشالله بس تسن مويتها زايده
نوره: والله احسبها انتي اللي مصلحتها يالجوهره
سلطانه: امس الليل طلعت لهم ولاهم فارشين برا وغاده قالت هي الي بتسويها بس والله ماخذيت على حكيها
نايف: لا والله ماقصروا انا كلمت ساره بقولها تسوي الفطور واثرهم مسوينه قالت لي تعال خذه
الجوهره: زين والله
سلطان: انا بطلع فمان الله
نوره: وين بتروح
سلطان: المستشفى يمه
موضي: هوّ وشوله وش فيكم؟
نايف: وتس اب جراند ماذر؟
موضي: وشو... وش تخثرق يالكامل؟
نايف:هههههههههههههههههههههههههههههههههههههه اقول انتي احلى جراند ماذر
الجوهره: يانايف خل أمي عنك
موضي: وش هو يقول..وش هالمذر؟
سلطان وهو يقوم بيطلع: يعني جدتي بالانقليزي
موضي ترمي على نايف فنجالها: مايخسى الا هو
نايف يقوم بينحاش: هههههههههههه افا ياجدتي هههههههههههه تطقيني ههههههههههههههههه
موضي: طس يالله..
الجوهره: ماعليتس منه يمه
نايف يرجع ويطل مع الباب: اقول جدتي
موضي: انثبر بس
نايف: ههههههههههههههههههههههههههههههههههههههههههههه ضوّ اعوذ بالله ماينمزح معك ابد (يأشر بيده)مع السلامه
الجوهره تلحقه: وين بتروح
نايف: هه! يمه وين بروح بعد بروح عند الرجال
الجوهره: ايه ياوليدي قلت بعد بتطلع..ماقام اخوك
نايف: لا..اذا اذن الظهر بقومهم كلهم
وراح..راحت الجوهره المطبخ وكانت فيه نوره
الجوهره: وش عندتس؟
نوره:ابد..اشوف وش بنحط عالغدا
الجوهره: جايبه معي جريش وفيه لبن في الثلاجه
نوره: نكب جريش بس
الجوهره: نسوي معه نوع ثاني وبس خلاص وشو له النعم محّد ماكل
نوره: فيه خضار في المرزعه نسوي صينيه
الجوهره: لا تتكلفين اللي فيه فيه بركه
نوره: نقول للرجال يجيبون باديتين رز.. ونسوي جريش..
الجوهره: خلاص زين
= = = = = = = = = = = = = = = =

to0o0ofee · 25-04-2005, 05:58 AM

صحى من النوم وهو متوجّس..يحس انه فيه شي غلط وشي تلخبط في نظامه.. رفع يده يطالع الساعه.. وكانت 11,28 استرجع احداث امس بسرعه
وتذكر انه كان سهران ونام متأخر.. منبه الجوال نسى يشغله.. والساعه رنت لما شبعت وماصحى والدوام راح عليه اليوم .. وإحسان مسافر وماعنده احد في البيت
"ياربيييييه شهالحاله.. يالله اليوم ضاع علينا"
قام يتروش ويصلي الفجر.. خلص ونزل تحت يدور شي ياكله
دخل المطبخ وكان محيوووس.. والمواعين مكدّسه هذا وإحسان ماله الا يومين مسافر..انسدّت نفسه عن الأكل فتح الثلاجه وكانت شبه فاضيه..اخذ عصير بيشربه
وطلع .. مر على الصاله كانت مرتبه بحكم انه محد يجلس فيها وجلس يتأمل في البيت
"اول مره احس بالشعور هذا..احسان اول كان فيه وكان ماسك اشياء كثيير في البيت.. بس من راح والبيت حايس المطبخ مواعينه كثر شعري .. يعني لو انا متزوج ماصارت الحياة كذا ولا فات علي دوامي اليوم..الله يجيبها ان شالله..متى بشوف حرمتي في هالبيت..عن قريب ان شالله(حط العصير على الطاوله وقام يتفحّص ويناظر ويشوف وش اللي يبيله تغيير.. بيتزوج وبتجي حرمه ولازم البيت يكون مجهّز.
بيضرب بويه وبيغير الاثاث..والمطبخ بيتغيره..وجناحه..
طلع برا شاف الحديقه يبيلها تغيير جذري..
الحوش ولمباته..الخيمه بيقطّع على فرشها..راح عند المسبح
كان المسبح ورا البيت.. وعنده مساحه كبيره فيها كرسيين حقة تشميس..
فكر يحط شلال على الجدار اللي على المسبح .. وبيحط بيت زجاجي..في المساحه الكبيره الي مقابله المسبح..تحمّس للفكره وحس النشاط يمشي في عروقه.. شاف الساعه.. وراح يفتح النت بيشوف السوق.
= = = = = = = = = = = = = = = = = =

الظهر
نوره
فتحت باب غرفة البنات وولعت الانوار.. وبكاس مويه ترش عاالبنات..
نوره: نعنبوكم وش هالنوم..لاصلاة ولاعباده..قوموا ماتستحون مير يالله اشوف قوموا
منال:يممممه حرام عليك شوي تكفيـــــــن
نوره: مافيه شوي بسكم نوم(وتجر اللحاف)
يالله يامها قومي..ريم..من ذي(ترفع اللحاف وكانت هيفا) وترش مويه عليها بدون أي مقدمات
هيفا تحتج:خااااااااالتي
:اللي موب قايم بالمويه والله.. يمال السهاد وش هالنوم بيذّن العصر
هنوف: يمه الساعه وحده وثلث بدري عالأذان
نوره بعد مانكّدت عالجميع نومهم فتحت الشباك وطلعت وهي متأكده مليون بالميه انهم بعد شوي بينزلون كلهم
هيفا تجلس على فراشها: طار النوم
ريم: من هالمويه بلا قوموا بس مافي امل تنومون
قاموا البنات وضفوا فرشهم..غسلوا وصلوا
هنوف: بنات بتغيرون ملابسكم؟
ساره: والله انا مايحتاج اغير.. بنزل بجلابيتي وبعد الغدا بلبس
هيفا: انا بغير بجامتي ماتهيئ اجلس فيها عند خالاتي استحي
هنوف تدخل لبسها اللي كانت مطلعته من شنطتها: اجل خلاص منيب مغيره
تدخل عليهم مها: بنات وينكم..انزلوا بيقلطون الغدا عنكم
هيفا: اصلا من بيقلط غيرنا
ريم: وجع وخالاتي وين راحوا يالله خل ننزل
لمى تصفق وهي تصلي..منال: وش عندها ذي تصفق..هي انتي وش تبيييين؟
لمى تصفق .. ساره: هو؟!!
ريم: اسمع شي يرن..يوووووه جوالي وراحت بسرعه لشنطتها فتحت الجيب
ساره: اهاااااااا عشان كذا تصفق..
ريم: هلا يمه
سلطانه: وينك..انزلي تحت..ابيك
ريم: يالله بنجي كلنا الحين
سلطانه: يالله عجلي خالاتك ينتسبون الغدا ومامعهم احد ياخزياه بس
ريم: ان شالله يالله يمه
هيفا: هب انّا ماسمعناه وهو يرن وهذي اللي تصلي سمعته ههههههههههههههه وش هالأذون
غاده: ههههههههههههههه اذكري الله
لمى تسلم: قولي ماشالله يمال الصقه
هيفا: ههههههههههههههههههههههههه منيب
لمى تقوم وتمسك يدها وتلويها ورا ظهرها: قولي ماشالله ياحماره
منال: هييف وجع قولي ماشالله حرام عليك
هيفا: هههههههههه منيب هي كذا تخاف من العين لو تمرض تقول هذا احد نظلني
لمى: العين حق وجع اذكري الله هييف
هيفا: فكيني ياحماره وش هاليد..ماشالله لا اله الا الله
لمى تفكها: اشوى
= = = = = =
بيت ام عبدالله..
بعد الغدا..
مشاعل تشيل المواعين من السفره.. وام عبدالله تساعدها.
مشاعل: يمه خلاص روحي الشغاله بتكمل الباقي
ام عبدالله: مسيكينه نشيل شوي عنها نخفف عليها السفره
تركي يرقى مع الدرج: مشاعل اذا خلصتي ابيك شوي.. يمه انا بنوم شوي وقوموني العصر عندي شغل
ام عبدالله: ان شالله
وراح لغرفته وراحت مشاعل وراه
طقّت الباب ودخلت
وكان جالس على سريره وفي يده جواله
مشاعل تجلس على كرسي المكتب: مرييح كرسيك
تركي: ليس للزرف
مشاعل: هههههههههههههههههههههههههه والله اني مافكرت كذا
تركي: طيب شوفي بقولك شي
مشاعل تقوم وتروح له عالسرير: سم وش عندك؟
تركي: باحكي بس لاتقاطعين والا تطيرين في العجّه..اذا خلصت قولي رايك
مشاعل: شكل الموضوع موب سهل..اسلم
تركي: فيه بنت..ابيك تدقين عليها وتتأكدين لي من اسمها لا تناظريني كذا..البنت مااعرفها..بالغلط جا رقمها عندي..وفيه شي ابي اسويه بس اول ابي اعرف اسمها وابيك تساعديني في هالشي
مشاعل: اسمح لي..مااقدر..تركي اوكي انت تكلم بنات وانا اعرف هالشي بس
تركي يقاطعها: لا تفهمين غلط..شوفي يامشاعل عمري مااصريت على شي مثل اصراري على هالبنت..
مشاعل: وش تبي فيها.. بعدين ياتركي متى بتعقل؟؟
تركي: موب هذا وقت هالحكي..ولا تقاطعين خليني اكمل
مشاعل: كمل يالله
هالبنت مااعرفها..بالغلط جا رقمها..حاولت اكلمها ورفضت..هالشي خلاني اصر عليها..ليش ماتكلمني؟؟البنت رفضت كل محاولاتي..فهمت من تصرفها انها محترمه اختبرتها وحلفت لها اني ماارح اضرها..وكثير من البنات يتمنعون ويترددون لخوفهم من الشاب بس لما يضمنونه يتغير رايهم .. بس هالبنت لا.. حتى اسمها اللي طلبته منها ووعدتها مااكلمها رفضت وبشكل قاطع.. قالت لي:لا تربيتي ولا ديني يسمحون لي..وربي استحيت منها.. وقتها كان ودي اشيلها فوق راسي يامشاعل.. هالبنت فيها ثلاثة اشياء شدتني
اول شي جذبتني من اول مكالمه ثاني شي اسلوبها حلو ثالث شي اعتزازها بدينها وتربيتها.. وازعها قوي وهذا اللي ابيه..على كثر ماعرفت بنات بس مثلها ماعرفت..البنت غيير وربي..
مشاعل: طيب..وش المطلوب مني؟
تركي: شوفي انا حاولت اجيب اسمها بالكامل لا تطير عيونك علي وافهمي ليش ابيه..اذا جبت اسمها خلاص وصلت..اذا ينفعون لنا وناس اجواد وماعليهم جبنا الرقم وخطبنا البنت.. بس المشكله اني مااعرف اسمها وابيك انتي تجيبينه لي
مشاعل: شلون اجيبه
تركي: انا سمعت احد عندها كم مره ينادي باسم ريم ومشكك اذا اسمها او لا..ابيك تكلمين تسوين نفسك غلطانه أي شي المهم تعرفين اذا هي ريم والا لا
مشاعل: والله مدري وش اقول لك..الموضوع صعب اذا بتعرس فيه غيرها ليش هذي اللي مانعرف عنها شي
تركي: نقدر نعرف كل شي والمهم ان اخلاقها عرفتها والبنت محترمه
انتي بس كلميها..موبايلك وينه؟
مشاعل: هذا هو معي..
تركي: يالله خذي الرقم
مشاعل: لا تحرجني معها ياتركي
تركي: شعوووله تكفين
مشاعل متردده: وش اقولها انتي ريم؟
تركي: سوي نفسك غلطانه مافيه ريم الا هي
مشاعل: الله يعييين..انت بعد لازم هالبنت مافي هالبلد الا هالولد!
تركي: بتكلمين والا لا؟
مشاعل: بكلم والله يعين
خذت جوالها ونقلها الرقم ودقّت..محد رد
مشاعل: ماترد خيره بعد خلاص موب لازم
تركي: وش فيك انتي..ماترد على ارقام غريبه كلمي مره ثانيه
مشاعل: نزعجها في هالظهر يمكن نايمه
تركي: حاولي واذا ماردت دقي وقت ثاني
دقت مشاعل مره ثانيه
يرن يرن يرن وماترد
مشاعل تهز راسها شوي الا وتأشر بعيونها: الوو
ريم:...
مشاعل: الوووو
ريم: الو
مشاعل: هلا والله ريممممم وينك ياشيخه ماتردين
ريم باستغراب: هلا..ميين؟
مشاعل: هوّ ماعرفتيني؟
ريم: لا والله
مشاعل بتشكك: انتي ريم؟
ريم: ايه معاك ريم بس من انتي
مشاعل: أوووه شكلي غلطانه
ريم تستغرب: شلون؟
مشاعل تألف اسم: انتي ريم ***؟
ريم : لا شكلك غلطانه
مشاعل: معليش اختي بس لاني اخذت الرقم من صاحبتي وشكلها عطتنياه غلط آسفه اشغلتك وازعجتك بس اعذريني غلطانه
ريم بعفويه: لااا يالغاليه اش دعوا..تحصل في كل العائلات بس صدفه ان الاسم تشابه
مشاعل: ايه شفتي شلون .. العذر والسموحه ياختي
ريم: عادي معذوره
مشاعل: فمان الله
ريم : مع السلامه
تسكر مشاعل..
مشاعل: ياحليلها مررره تجنن .. مشت عليها السالفه
تركي بلهفه: وش صار؟؟وش قالت؟؟هي والا موهي
مشاعل تبتسم: هي ريم
تركي يبتسم ويضحك: ايووووووه كفوووو اختي راعيتها
مشاعل: حرام والله رحمتها صدقت على نياتها شكلها
تركي: وش قالت؟؟كيف اسلوبها معاك؟شكّت بشي؟؟
مشاعل: ماقالت شي .. بس اسلوبها مره حلوو مؤدبه حسيتها بس مشى عليها الموضوع
تركي: اكيد مؤدبه مو اختياري
مشاعل: بدينا من الحين
تركي ينسدح: يالله قومي.. وطفي اللمبات خل انوم شوي وراي شغل
مشاعل: تو تترجاني والحين تطردني..طيب ياتريكي
تركي: تريكي في عينك يالله روحي بس
تطلع مشاعل وهي تضحك على اخوها..
كانت تفكر في كل كلامه..والله انه متهور بعد..عليه تصرفات غريبه احيانا..
يالله الله يكتب اللي فيه الخير...
تركي..يمكن يكون متسرع..بس آراءه دائما تكون صائبه..عنده بعد نظر..ويفهم في اللي قدامه أيا كان..
وأنا أثق في اختياره..البنت يبان عليها محترمه..بس بعد ماعرفوا عنها أي شي..
راحت عند امها.. وهي تدعي جواتها ان الله يقدم الي فيه الخير.. ويوفق اخوها..

انتهى الفصل الأول

همسات..وردة.. · 28-04-2005, 12:49 AM

توووووووووووووووفي..
وش هالحلاوة هذي؟ (*35)
الجزء رااااااااااااااااايق..
متكامل من جميع النواحي..
الا انه قصير!!
يله.. مو مشكلة.. اكيد بتعوضيننا بجزء طويل.. (*23)
الصراحة دخلت جو مع تركي.. ارتحت له ماادري ليه..
منصور حلو انه بدى يفكر جد..
البنات النوامات مرة ثانية خل يقومون نبي نقرى عنهم..
وسالفة المويه..
هههههههههههههههه معاناتي..
اخر شيء.. الجزء حلوووو..
تسلمين عليه.. وننتظر ابداعاتك.. (*40)

Dr.Rae3 · 01-05-2005, 03:29 AM

انا تعمدت اني مارد بدري عشان تاخذين راحتك في صياغه الجزء القادم ...

ماشاء الله تركي دخل منافس على ريم ماشاء الله شكل القصه هذي بتزوج كل بنات القصه

فعلا جزء حلو وجميل وفيه اشياء كثيره وضحت في القصه واطراف جديده دخلت في القصه..

مشكورة توفي على الجزء وبانتظار الجديد

رغـــــــــد · 01-05-2005, 09:29 PM

والله ونااااااااااااااااااااااسه شكله فلم مكسيكي سعودي

وودي اتابع بس ما فيني اقراااااااااااااااااااااااااااااا >>>>>>>>> متعيجزه

ممكن احد يختصرلي الاجزاء السابقه في سطرين >>>>>> الله لا يهينه

همسات..وردة.. · 13-05-2005, 01:56 PM

رغد..
هههههههه.. خمس صفحات وتقولين سطرين؟
طيب بحاول..
كان يامكان في قديم الزمان وفي سالف العصر والاوان.. كان هناك فتاة جميلة وحلوة وتجنن وتهبل.. اسمها ريم.. تسكن مع اهلها في بيتهم.. ولكن للأسف ان ماعندات اخوات.. فقط اخوان ووحوش بعد.. ولها بنت خالة اسمها هيفاء.. وصديقتها الروح بالروح.. وحتى مع بعض في الجامعة..
للأسف خلصت سطرين وماعرفت بالشخصيات!!
اممممممم.. وانتظريني بالجزء الثاني..
ههههههههه
توفي..
خربت قصتك وخليتها حقت اطفال.. معليش....... العذر والسموحة...
لحظة.. تراك تأخرتي بالفصل.. وينك؟

رغـــــــــد · 13-05-2005, 07:50 PM

ههههههههههههههههههههههههههههههههههههههههههههههه

.... علشااان خاطرك بخليها ثلاثه اسطر ونص ولا تزعلين

و مشكوووووووووووووره همسات ابشرك فهمت الهرجه منك خلااااااااص

وعلى العموم الاخت توووفي ما قصرت قصتها باين عليها حللللللللللووووووووه ويعطيهاااا الف الف عااافيه وانشالله اشوف اسمها منور على مسلسل في رمضاااان ولا تسألون اشمعنا رمضااان اعتقد مايبيلها سسسوووععععااااللللل

أدوات الموضوع
عرض نسخة للطبع إرسال هذه الصفحة إلى بريد إلكتروني
أنماط العرض
النمط الخطي الانتقال إلى النمط المختلط الانتقال إلى النمط الموضوعي

مستخدمين موجودين حالياً يشاهدون الموضوع: 1 (0 أعضاء و1 ضيوف)