سـامحــوني يابنــات !!

معاند الوقت · 19-04-2005, 01:41 AM

خيانة

لا ردك الله لا ولا اطلب تردين

ادعي عليك بعثرة فـي صلاتـي

عثره تشلك ما بعدها تقوميـن

يا قاتلتني يوم صرتي حياتــي

خدان لك بالقلب كانت بساتين

وريضان وغصونا بها يانعاتـي

كنتي مناة القلب والروح والعين

واليوم عينك يعلها ماتباتـــي

كنت أحسبك للعهد والحب توفين

قلتي الغدر بالحب ماهي بسواتي

وحلفتي يمين الله ما منك اثنتين

وانك ملاك دون كل البناتـــي

وانك على عهد المودة تسيرين

ولا تسمعين أهل الحسد والوشاتي

وصار اليمين ستارخلفه توارين

ورماح غدرك بالخفا مشرعاتـي

وبان الغدر سم جرى بالشرايين

الله عسى يسقيك سم الفعاتـــي

كلي سقيتك حب واليوم تنسيـن

تقولين حلم ايام واليوم فاتـــي

خذتي الهوى لعبه على ما تحبين

لين عصفت بالهوى عاصفاتـي

من زينك يا بنت بالشعر تزيين

من صورك بابياته الطايلاتــي

انا من غرامي قلت كانك تذكرين

قلت الخجل صاب البدر من مناتي

وصرتي بشعري في العذاري تباهين

تقولين انا شمس العصر في حلاتي

زينتك بشعري ولا غربك الزين

ما زانتك صبغات حمر الشفاتــي

صورتك بالشعر حزام ورياحين

واثرك هضاب وشوك ما به هداتي

رسمتك سحابه خير قطر تنفين

فزت لك الصحراء زهور ونباتـي

رسمتك مهاه للجميله تقودين

واثرك قطيعه وضيعتها الرعاتي

واثرك غراب يوم سدل الجناحين

كنت احسب اني شايف لي قطاتي

بالشعر غليتك على كل غاليين

واثرك دنيه وتعشقين الدناتــي

وبالشعر عاتبت عتاب المحبين

انا من يسوم الروح لك يا غناتي

توسلت لك خايف على حب عامين

عامين لكن في حسابي مئاتــي

ناديت لكن لي ابد ماتسمعين

عمري وروحي فكري في ثباتي

حذراك للشينات عمري تماشين

عديمات اصل اخلاقهن دانياتي

غاب الولي عنهن ولعبن بحبلين

يا خس واليهن وخس الولاتي

ما همهن في الناس زين ولا شين

وقلوبهن من حقدهن مظلماتي

وقلتي وربك لو يكونا ملايين

ما غيرن بالطباعهن من سماتي

تحسبين انك بالمهافه ترقين

كيف الصعود يكون للهاوياتي

وخنتي وبعتي كل عهد وايامين

ما عاد يفرق بين ماضي واتي

وصرتي مثل غيرك برخص تبيعين

يا مرخصتني ما بقى لك غلاتي

صبري نفذ واليوم ثارت براكين

مظلوم انا وباكر تحل ادعواتي

سمعي عسى من بعدها ما تسمعين

سمعي دعا من صار قلبه حصاتي

ادعي عسى من ناضرك ما تشوفين

وتطحن بك الايام طحن الرحاتي

وعساك عوق منه ما عاد تبرين

عوق تشافق له قلوب العداتي

ويالله عسى يحتار فيك المداوين

تبين الممات ولا يجيك المماتي

ويالله عسى كف الندامه تعضين

تندمين يوم انه يفوت الفواتي

وتبكين دم يسيل من مقلة العين

وتحتار امك عن عناك وتحاتي

عسى ما تلاقي من له القلب تهدين

وان هو حصل ادعي عساك الشتاتي

يا بلوة اللي وسط بيته تعيشين

ساهي وحوله شب جمر الغضاتي

عسى بعمرك ساعه ما تهنين

وتمضي حياتك بين هم وشقاتي

يا بنت قلبي وين مثله تلاقين

قلبا عطاك الحب ما قال هاتي

جيتك وروحي شلتها لك بكفين

وفي التاليه رمح الخيانه جزاتي

يالله عساك النار يا أم وجهين

كله انكشف لا ما تفيد العباتي

ويالله عسى تلبسك جن وشياطين

وتكونين مدعاة الحكي والشماتي

يا حية رقطا تقود الثعابين

باكر تحن ايامك المعتماتي

وباكر على فعلك بمثله تجازين

ظلم المشاعر ما تحكمه قضاتي

بيني وبينك تحكم ايام وسنين

وانا شاهدي قلبا من الغدر ماتي

ويا دمعة التمساح لالا تذرفين

العيون رغم ادموعها كاذباتي

لا ما عرفتي الحب لا ما تحسين

وغدرك تعدى غدر ذيب الفلاتي

الذيب يعوي قبل يغدر بمسكين

وانتي غدرتي خافقي في سباتي

لو كان غدرك في كفوف الموازين

لكان رجح كل غدر البناتي

انتي السبب سقتي على القلب جرحين

غدر الغرام وموجع الذكرياتي

وانتي السبب واليوم لالا تلومين

وان جاك باكر شوفي اشلون يأتي

والله لاكتب وافضحك في دواوين

وارقص واغني يوم خبر الوفاتي

وارسم لاهل العشق قلبا وسهمين

وقصة خيانه ما روتها الرواتي

ويمين لانشر فوق اسمك عناوين

واشهرك من قاصي اليمن للفراتي

ومن غرب هالدنيا الى قاصي الصين

ديوان غدر فيه كل اللغاتي

والبادي اظلم سنة العين بالعين

والا فذي لا عادتي ولا صفاتي

ويا شبه انسانه برأس ورجلين

اعوذ بالرحمن منك بصلاتي

للأســف ما اعــرف صــاحب القصــيدة (*36)

جمــان · 19-04-2005, 11:14 AM

ههههههههههههههههههههههههههههه
ههههههههههههههههههههههههههههههه

حسبي الله على ابليسك وعلى ابليس صاحب القصيدة
والله هذا أبد..أكيد موب صاحي (*15) ..
ول .. هذا لو حصله كان مسك البنية وعذبه حتى الموت
وما يكفيه
كل ذا حقد (*18) ..؟؟
موب معقول انه حب في يوم من الايام (*7) ..!
لان اللي يحب ما يقدر يقول هالكلام مهما غلط بحقه الحبيب
واسألن أنا
أنا اذا سمعت أحد يدعي عليه بكيت
وشلون أدعي عليه أو أتمنى موته
عسى الله يسامحه ويسعده (*35)

لكن بصراحة قصيدة كلماته قوية وقاسية
خلتن أرحم البنت أكثر منه (*20)
ما تنلام
اذا سوى به كذا عشان تركته
أجل لو تسوي شي أعظم وش يسوي به هذا..؟
الله يستر

--------

آسفة أخوي
لكن ما قدرت أمسك نفسي
شوي أضحك وشر البلية ما يضحك

وشوي أشهق من قسوة دعواته

عسى الله ما يضع ستري بين ايدين انسان مثله
اعوذ بالله منه ومن قصيدته

مشكور

تحية طيبة
أختك
جُمان

بقايا أمس · 21-04-2005, 02:14 AM

(*12) (*12)
(*21)
:

:
تحيتي الطيبة لك

:

معاند الوقت · 21-04-2005, 05:46 AM

معاند الوقت · 21-04-2005, 05:51 AM

همسات..وردة.. · 21-04-2005, 07:34 PM

قصيدة قوووووووية..
بس حلوة..
والله لاكتب وافضحك في دواوين
وارقص واغني يوم خبر الوفاتي
اكثر بيت عجبني!!

معاند الوقت..
مشكور على مواضيعك الروعة..
وننتظر منك المزيد..

معاند الوقت · 22-04-2005, 12:13 AM

أدوات الموضوع
عرض نسخة للطبع إرسال هذه الصفحة إلى بريد إلكتروني
أنماط العرض
النمط الخطي الانتقال إلى النمط المختلط الانتقال إلى النمط الموضوعي

مستخدمين موجودين حالياً يشاهدون الموضوع: 1 (0 أعضاء و1 ضيوف)