لا يفوتكم نجاح المساعيد؟؟؟؟؟؟

ابوغالي · 18-07-2004, 12:26 AM

صراحتون مالي خلق اكتب مقدمه ولا شي

بس من الطفش مادري وش اسوي يعني قلت بكتب موضووع

وعجزت حاولت اعصر هالدميجه مالقيت شي

قلت برووح انام يمكن اتحلم بشي يفتح النفس مو زي كل مره اتحلم بشريط فاضي

واحاول انام ولا قدرت وارجع اطعز الجهاز واشغله والغمص مسكر عيوني
المهم واطفي الكنبيوتر وانزل تحت والقا جدتي موضي تحت تمشط قروونها الذهبيه وعاكسه نور الشمس

وااااااااااو تخيلوو روعة المنظر (بلاكم ماتدرون ان الشيب اكل منها وشرب )

المهم قالت هلا بشبووبي حياتي جعلني ماذووق حزنك

وأتذكر أيام السعد أيام الحب العذري آآآآه يالحب العذري تعالو بس

هذا سلمكم الله بقولكم سالفه خويتي نجاح المساعيد الله يحفظها
نجاح بنت جيراننا وباب بيتنا (نطح) باب بيتهم ... والله كانت
نجاح ولا زالت أطلق بنت بالحاره كلها ... وكانوا عيال الحواري الثانيه يجون يفرون بحارتنا كل عصريه وهذا ما ساعد على تعصيبتي وخلاني كل عصريه أبسط قدام باب بيتنا وأجلس
أقشم فصفص وأقحن شاهي ... لين يأذن المغرب وأقش حوستي وأفرك قبل لا يجون الهيئه ويقرشعوني معاهم ... المهم يوم من الأيام طلعت نجاح المساعيد الله يحفظها وأنا جالس أفرش الفرشه عند الباب وتعرفون لابس سروال سنه وفنيله علاقي
وعصقول وحالتي حاله بس شعري كان فله لأنه منكب عليه بسبسي من أمس ... والله وتطلع نجاح من بيت أهلها وتجي لمي : ... المهم أنا أرتبشت وأقوم وأجيب لها (مركا) ... على بالي مقلط رجال بالمجلس ... والله وتناظرني وأناظرها ... قالت
كيف حالك ابو غالي .... أنا يوم سمعتى هالعلوم وأنا
أنقز للصاله وأحصل ثوب أبوي معلق وألكش مفتاح الددسن وأطلع
للشارع وأسحب لي (جلنطين) وأستلم الشارع (تنطيل) وأرجع لما ... قالت يااااه برافووو عليك يابوغالي قلت تبين أوريك حركت (السنسله) ... قالت وريني قلت وش رايك تركبين معاي .... قالت يالله ... المسكينه جنت على حالها وركبت معاي ... والله من وأطلع لأول شارع والله وأفتح الشباك ... طبعاَ الشباك مكسور بس أنا أسوي فيها أتكيت وأقول أني فتحت الشباك ... والله يوم فتحت الشباك ويدخل الهواء وتقبع ريحه العطر أللي حاطته نجاح .... والله وأنلخم وأفتل الددسن إلا أنا متحظن عامـــــود الكهرب .... ألحق ياولد البنت (أنفلقت) يلعن أم الحاله وش الدبره ... والله قالت ابو غالي الله يخليك شكلي بموت ودني للمستشفى ... والله قلت لا وين الحين يقفطوننا الهيئه خلي أبوك يوديك (يلعن أم الجحده) والله وتاخذني الحنيه وأخق وألقطها للمستشفى ... والله ويوم دخلتها ويقولي الدكتور عشرين ريال خياطه الجبهه ... قلت خلاص بطلنا دام فيها دفع فلووووس .... قالت الله يخليك أرجعها لك بس نطلع ... والله وأجلس أفكر وراسها يخر دم
(صحيح أني قوووي) .... والله قلت يالله عشره مني وعشره منك
قالت ما معاي أنت من فين تفهم (أخرش) .... والله وأدفع العشرين وأنا مطرطع عارف أنها ما راح ترجع والله ويلفون راسها ونطلع ... قالت لي أنا عارفه أنك كنت تستهبل وأنك دافع الفلوس من قلبك علشاني .... قلت والله من ناحيه دافعها من قبلي فهي من قبلي لاكن الله لا يهينك رايحه تردينها بس نوصل للبيت
والله وأردها لبيت أهلها والله قالت لحظه أجيب لك (المصاري) ...
والله واجلس عند الباب شوي إلا جابت لي صحن فيه (كبه نيه)
قلت أيش هذا ... قالت أمي وأبوي طالعين خوذ هذا بدال المصاري ...
(أبوك يالتصريف) قلت يالله المهم أنتي ألي طبختيها
(على بالي مسوي رومانسي) ... والله من تعديتها وأبدأ أدرم فيهم
ومادريت إلا هذا جيب الدوريات يقولي ابو غالي تعال أنت شالع العامود أللي بالحاره صح ... يالله معانا للقسم والله يوقشوني معاهم
والمشكله بقى حبتين من الكبه ما أكلتهن ... والله ويدخلوني قالوا معاك رخصه قلت أيه على بالي بيطلعوني خلاص ... قالي طيب هات التأمين على الرخصه .... قلت وشو هذا ما بعد وصلنا .... والله ويدقون على الوالد ويجي يوم دخل بدأ قبلي بالوقوف التدريجي .... والله وأول ما خش إلا هذاك الشلوتي على الراس ... أول مره أشوف شلوتي على الراس ... ولا أصحى إلا بعد أسبوع من هالسالفه ... ومن هالموضوع لازم تأمنون يالربع على رخصكم لا يجيكم شلاليت على الراس

Dr.Rae3 · 19-07-2004, 06:36 AM

ههههههههههههههههههههههههه

بصراحة سرد غير طبيعي للموضوع بطريقة طريفة فعلا ..

والله انا ضحكت فعلا يوم تحضنت العمود ..

والله يقويك انشاء الله ولا تنسى ثاني مرة تامن على الرخصة ونا اخوك

ونا بعد ابامن على الرخصة انشاء الله (*5)

ابوغالي · 19-07-2004, 01:21 PM

هلا واللــــــــــــــــــــه

هلا بالد كتور وتسلم يالغالي والله يخليك

من ذوقك

وانا جالس ادور موضوعي يمين يسار وثاريكم خاطفينه بس يعطيكم العافيه

والي قدام

amell · 19-07-2004, 03:49 PM

ههههه

ابوغالي · 19-07-2004, 05:00 PM

اهلين وسهلين

وش ذا الضحكه

عموما يعطيك العافيه ومقصرت

حوران · 20-07-2004, 11:04 PM

والله صراحة الموضوع بدون صور ماله طعم على كذا يموت الحيل لو بغيت أقراه وشكراً

طويـــــل البال · 24-07-2004, 01:27 AM

هههههههههههههههههههههههههههه (*10)

ماكنه فلم هنــــدي (*7) ؟؟؟؟؟

خخخخخخخخخ (*16) (*16) (*16)

أدوات الموضوع
عرض نسخة للطبع إرسال هذه الصفحة إلى بريد إلكتروني
أنماط العرض
النمط الخطي الانتقال إلى النمط المختلط الانتقال إلى النمط الموضوعي

مواضيع مشابهه
الموضوع	كاتب الموضوع	المنتدى	ردود	آخر مشاركة
زواج نجاح المســاعيد ... بالصور ...!!!	najd-ksa	طرب - فن - اغاني 2009 - جلسات - فضائح الفن	20	31-10-2007 12:48 AM
اكسسوارات لغرف البنوتات لا يفوتكم....	عاشقة لبنان	ديكور - اثاث - غرف - ستائر - مطابخ - مجالس	16	24-08-2007 01:32 AM
واحد رايح يخطب لا يفوتكم ......	المجـ،،ــروح	وناسة - صرقعة - فرفشة - نكت - هبال	7	15-09-2006 05:57 AM

مستخدمين موجودين حالياً يشاهدون الموضوع: 1 (0 أعضاء و1 ضيوف)