برائه الاطفال ايام زمان

ابوغالي · 20-07-2004, 07:06 AM

كانت الدنيا براد و مع طلوع الشمس بدت عصافيرنا تهاوش على الشجر من يحلها قبل الثاني..خصوصا ان جنب غرفتي سدره كبيره من كثر المطاق فيها و الازعاج تحسبها للوهله الاولى عمارة باكستانيه يشجعون منتخبهم وانقطع عليهم الارسال..

دخلت الوالده علي عشان تصحيني من النوم شافتني ماسك الدريشه و احبحبها و اقول لها والله ان تتغدين معي اليوم << ما انفع اذا بديت احلم.. و تمسكني الوالده مع شعري و تلخني بالقزازه و تقول قوم جعلك القام .. الناس صفت طابور وانت تحلف على الدريشه: ..قلت وانا مرتاع ورافع يدي لفوق و الغمص حاجب الرؤيه ماسويت شي يا شرطي اقسم بالله مهوب انا اللي اكل عسكريم و ارجمه على الجيران << ضميري قام يخرط .. وتمسكني امي مع شعري مره ثانيه و تلخني بالقزازه وتقول بسم الله ... الله واكبر .. وليخسئ الخاسؤون << نسخة عراقيه .. ويطلع لي صعرورتين فوق عيوني بالضبط و صار شكلي كان لي عيون دورين
فزيت بسرعه ولبست الثوب فوق صروال البجامه الطويل عشان بالفسحه ارفع الثوب و اطرد براحتي هو صدق ان صروالي دواسة سيارتنا القديمه بس اهم شي الستر..و انطلق على المدرسه تارك وراي الوالده الحبيبه وهي تقول نعالك مقلوب يمال الجدري..

عاد بالمدرسه انا اشطر و اخطر واحد على طاري اخطر واحد.. مره نادني المدرس عشان اشارك معهم في مسرح المدرسه .. يقول عندنا مسرحيه بداويه مشاركين فيها بحفل تحضره الاميره .. و نبيك تقلد لنا صوت الماطور.. و افلها بالحفل و اقلد لهم صوت الماطور و التيس بوقت واحد << الله من الذهانه فيني ..حتى اذا جو يفتحون باب الخيمه .. اطلع صرصره مع صوت الماطور .. مرات الحصه الاولى و الثانيه و الثالثه
والرابعه و الخامسه و السادسه جميع << يقال لك جايب قصيده

يوم جات الساعه وحده جيت ناكس على البيت بوجهن طاقته الشمس.. وشعرن مغبر .. و ثوب ازراره ضايعه وجيبه منمزع وطالع من تحت السروال حق البجامه << ومن زود الخرشه.. و جبهتي عليها لطشة حبر احمر << موقع عليها المدرس و كاتب "للعمل بموجبه" تحسبها تعميم....ونعالي ناسيها عارضه بالفسحه.. وكوعي اليسار منزلغ.. والشنطه تهابد على ظهري<< يالله لك الحمد و المنه جاي من انتفاضه..و ادق الجرس و يرد ابوي وهو يصارخ مييييييين قلت مياااااااااو تو ما بعد تساوت خشتي الا ومفاتيح طااايره و تصمخني على مقفاي .. << يسمعون بالمداعبه الاسريه..

دخلت و لقيت اهلي مجتمعين بكل حب حول السفره يتغدون .. بس كن اخوي مهوب جالس كويس لان كوع جدي داخلن بخشمه .. الله يهديه كاب عمره على الصحن تقل يبي يخترع شي ..و ماتسمع الا هات الليمون .. نظف خشمك .. وين البصل .. جب الشطه والخ.................
وطلع اللعب مع عيال الحاره دعيبس--- وجخيرب----- ومفضي---- وسليم

و يقطع علينا سوالفنا ولد جيرانا السوري.. توهم ساكنين جدد و اسمه (زياد) .. و اول مره يطلع للشارع قمنا من البراحه و رحنا عنده والتفينا حوله نتفرج عليه
قال واحد ناظروا.. خدوده ملتهبه الله يفشله.. قال عبيد من الوصخ ( متعودين على المشق و طالع : نظروا شعره شاب تقل العنز الجرباء ..لا وبعد من زين الاخلاق عيونه خضراء تقل بدلة رياضه << الله من زين الذبه .. و جلسنا نضحك عليه وهو ساكت ماتكلم
ثم قال لنا ..ممكن افوووت:قال دحيم يبي يفوووت .. انا قلت .. الله يقلعه الخايس و ما جته الفوته الا قدامنا << تفكير قروي.. و نهج مسرعين و نطب في صندوق دينا و نسد اذانا و نكتم عمرنا عشان ما نحس بالفوته.. بس انكتمنا .. اثاري جارنا توه محمل في سيارته غنم و حنا قالطين على الي انتم خابرين (الله يكرم الموجودين) ...
طلعنا من السياره و مالقيناه .. قلنا الظاهر استحا وراح بيتهم ..<< مالت عليكم يالقراوى الولد دخل على بيتهم و خلص ..
ونرجع البيت و كل واحد ريحته غنمه ..

Dr.Rae3 · 20-07-2004, 07:26 PM

ههههههههههههههههههههههههههههههههههههههه

الله يرجك ورب البيت قصة منها ضحك خاصة يوم صمخت الوالدة براسك في القزازة..

انا ماشف تايام زمان والله ولكن اسمع الوالد يقولنا عنها في كذا موقف .. والله شي

تحس ان الناس يحبون بعض ومع بعض ولا يفرق بينهم اي شي .. ولكن الحين على النقيض

مشكور والله على موضوعك الرايق يارايق انت ..

E.R · 20-07-2004, 08:48 PM

والله
في فرق بين اولاد قبل والحين

اول كانوا طبيغين اطفال

اما الحين
ماسكين الدنيت بيدهم

بقايا أمس · 21-07-2004, 05:01 PM

بسم الله الرحمن الرحيم
السلام عليكم ورحمة الله وبركاته
الاخ ابو غالي
انا الى شفتك تذكرت براءة الاطفال (*10)
تسلم على المشاركة
يعطيك العافية

ابوغالي · 22-07-2004, 01:16 PM

هلا وغلا

ابو فهد والدكتور

وE.R

لكم تحياتي وربي احرجتوني

حمراً خدودي

وتسلمون والله يخليكم لغاليكم

اخوكم / ابو غالي

أدوات الموضوع
عرض نسخة للطبع إرسال هذه الصفحة إلى بريد إلكتروني
أنماط العرض
النمط الخطي الانتقال إلى النمط المختلط الانتقال إلى النمط الموضوعي

مواضيع مشابهه
الموضوع	كاتب الموضوع	المنتدى	ردود	آخر مشاركة
*موسوعة أمراض الأطفال*	tinhi16	صحة - رجيم - اعشاب - ادوية - طب بديل	30	15-03-2008 10:49 AM
بطاقات زواج ايام زمان	عطر اللــيل	صور - تصوير - مكتبة الصور - صور 2009	11	15-05-2006 03:57 PM
كيف تحمي الأطفال والمراهقين من أخطار شبكة الإنترنت؟	صاحب السمو	نقاشات - حوارات - قضايا - الراي الاخر - وجهة نظر	2	09-05-2006 10:42 PM
صور لاعضاء المنتدى ايام زمان رهيييييييييييب	bint_aldosseri	صور - تصوير - مكتبة الصور - صور 2009	4	08-01-2006 08:16 PM
تاشيرة دخول الى عالم الاطفال	بدوي روعه	روائع العامة	6	18-12-2004 01:50 PM

مستخدمين موجودين حالياً يشاهدون الموضوع: 1 (0 أعضاء و1 ضيوف)