امير الهوى

الله أنه يذكرك يالخير يانجد العذيه=ياغرام المغرم الي مالقا بغيرك غرامه
والله أني عاشقك والعشق ماهو في يديه=لو أن بعض هالناس تلحقني مشاريه وملامه
وأشهد أن عشقك زاد عقب برج الفيصليه= والخميس عصيروالرذراذ وطعوس الثمامه
والبلاء من جيتي هاك النهار بحسن نيه= يوم شفت الشوفه الي قومت في القيامه
جادلً ماخلت من الزين لو أنه بليه=شفت فيها الزين كله من بهامه لبهامه
مهرة ً لاشبهوها بالكحليه والعبيه=ذكرتني خيل تغلب والمشهظ والنعامه
أن بغيت أصد عنها كل أبوها جاذبيه= وأن بغيت أقرب وأسلم قلت يارب السلامه
وأن تثنت قلت مال الخيزران الأ التحيه= وأن تخطت قلت يا حي التخطي والزعامه
وأن تبين خدها شفت الصباح وقلت حيه= يابعد شوف المساء والحزن والليل وظلامه
وأن تبسم ثغرها قلت أرحبي يالعقربيه=والله أنه كنه البراق بطراف الغمامه
وأن سكت قلت آآآه ياغلو الذهب لولاحليه= وأن تكلم قلت ياحلو الشهد لولا كلامه
أذكر أني قلت أناديها ياوضاح الثنيه=وهني الي يشوفك لو يشوفك في منامه
وروحت يبرالها قلبي وودعته هديه=والله أني ما أملك أغلى منه ياكود الكرامه
صاحبي أن شفت في ماعفت لاتشره عليه= وأن تغير في رفيقك شئ لاتنشد علامه
عذري أني كنت ناوي خير والنيه مطيه=وعيبي أني ما أقدر أخون المروه والشهامه
وأنا ما أخذت منها الأ طعناتً خفيه= وأدري أن الله رحمني بالعباه وباللثامه