من بغى الفرقا لقى له عذر وأسباب ودلــــــــيل=خلى عنك العذر والأسباب دام الحــب ضــــــــاع
كان ودك بالفراق أبشر عسى عمرك طويــــــــل=لا تـــردد وإنت لك كلـــمة ولك أمر ٍ مــطـــــــــاع
لي عليك إنك تبت بكلمة تشـــــــفي العلـــــيل=ولك علي إني لأوقف وقفة الرجل الشــــــــجاع
لا تجاملني مخافة قال ما أدري خـــــــوف قيـــل=عمر هرج الناس ما يسمن ولا يغنـــــــي جــياع
كان قصدك سر حبك أوعدك لأصبـــــــح بخيــــل=وأحمل أسرارك معي للموت قدر المستــــــطاع
بس قلها .. قل"ما أحــــــبك" وأبشر بصبر جميل=لا تحسب إني مــــــثل من طبعهم لوي الـــذراع
صاحبك ما هو كذا يا صاحب القد النحـــــــــــــيل=صاحبك طبعه غريب وغربتـــــه غربــــة طـــــــباع
في الهوى ما يقبل الحل الوســــــــط ولا القــليل=مثل ما هو لا شرى يشري لـــــــــيا من باع بـــاع
ثابت لو هي تميل الأرض حــــــــدره ما يميـــــــل=يدري إن الفقر ما هو عـــــيب والدنيـــا مــــــــتاع
ما عشق لذة حــياته كثر عشــــق المستـــحيل=ولا كره حتى مماته كـثر كـــــــره المصــــــــــياع
كم تعلم من شديد البدو وش معنى الرحـــــيـل=وكم تعلم من غروب الشمس وش معنى الوداع
كم تعلم من سحاب الصيف وش معنى الحصيل=وكم تعلم من ليالي البرد وش معنى الضيـــــاع
إيه أنا هذا طريقي موحـش وصعــــــب وطويـــل=وإنت لا منك تعبت العالم فجوجـــــــــه وســـاع
إعتبرني في بداية سكتك عابر سبــــــــــــــيل=رح وأنا قلبي معك من وين وجهت الشـــــــراع
يكفي إني لا انذكرت في سالفة عشاق قــيل=عاشر أحبابه شجاع .. وفارق أحبابه شـجـــاع