موقف غير حياتي (قصتي)

دلوعة أمها · 27-10-2005, 02:58 AM

الله بغفر له ويرحمه

مواقف حزينه وصياغه رائعه

انتظر الجزء الثالث ...

سؤال ..... على اي اساس اختك قالت هالدعاء ...
وشو هالدعاء أصلا ؟؟

سٌٍُـ حٌُِ ـآيِّبٌٍ · 27-10-2005, 07:47 PM

هلا وغلا اختي دلوعة امها

أشكرج يالغلا على متابعتج..

عزيزتي بالنسبه لسؤالج...والله ماذكر شو هالدعاء...

بس في ادعيه وايد..اذا انقرت بنيه خالصه وبخشوع..تقبل باذن الله..

وانا دايما أسمع..ترديد لا حول ولا قوة الا بالله في كل دعاء يستجاب باذن الله

وغير كذا لما تختمين الدعاء قوللي.."اللهم انك قلت وقولك الحق..ادعوني استجب لكم..فاستجب دعائي..يا رب العالمين"..وان شاء الله يقبل منج الدعاء..

مثل ما قتلج اهم شي نيتج تكون خالصه لوجه الله..وتادينها بخشوع..والله يتقبل منا ومنك ومن الجميع..

والله لا يفقدكم عزيز يالغلا

روعـ الاحساس ـة · 07-11-2005, 04:13 PM

اختي الغالية
سحايب و الله قصة محزنة فعلا

الله يرحمه و يسكنه فسيح جنانه

سردك للقصة كان رائعا

تحياتي

سٌٍُـ حٌُِ ـآيِّبٌٍ · 10-11-2005, 10:50 PM

اختي العزيزه روعة الاحساس..

أشكرك على مشاعرك الطيبه..

والله لا يفقدج..عزيز..

تحياتي لج..

سحايب

المتفائل · 10-11-2005, 11:26 PM

اختي الغاليه

سحايب

اولا اعزيك على وفاة اخيك
ولا يسعني قول الا
انا لله وانا اليه راجعون
.................
مشكوره على هذه القصه
وعلى طريقة طرحها الرائعه
التي تجعلنا نعيش في اجواء القصه

تقبلي مني خالص شكري وتقديري
دمتي بود اخيتي...

سٌٍُـ حٌُِ ـآيِّبٌٍ · 17-11-2005, 12:59 PM

اخي العزيز المتفائل..

كل الشكر لك..

على مشاعرك الطيبه...

وتشجيعك لي على تكملة قصتي..

الله لا يفقدك عزيز ياخوي..

وكلها دقايق...و راح انزل الجزئيه الثالثه من قصتي (*40)

سٌٍُـ حٌُِ ـآيِّبٌٍ · 17-11-2005, 02:11 PM

صباح اليوم التالي..

البيت معفوس...فوق تحت..

ما زال...الالم يعتصرنا...لفراق اخووووي..

اسمع انين..امي...من الصاله...

واخوي الصغيرون فديته راقد...ما يدري بشي..

ابوووي...عايش في غيبوبة سرحان..مادري متى بيقوم عنها..ويشاركه اخوي الكبير...

انا واخواتي...يالسين بالصاله...وكل وحده تبكي...بس قابضين اعمارنا..عشان الوالده ما تسمعنا..

اخوي ما زال صاك على روحه الحجره...والله يعلم شصار فيه...

اختي الكبيره..مثل عادتها الله يحفظها..

حريصه علينا..

طلبت منا نسبح..ونبدل ملا بسنا..لان الناس راح يجوون يعزون..

اهلنا وجيرانا وغيرهم..

مر الوقت...

والبيت كان مليان ..ضيوف..حد طالع وحد...داخل..

كنت احاتي خواتي اللي كانو بالسعوديه..

كانو ثنتين..وحده منهم حامل وكنا خايفين الخبر ياثر فيها..

وصل الخبر لاهلنا هناك..والكل تاثر..

مر الوقت علينا بصعوبه..

وبصراحه..

ما زلنا مصدومين..ومب مصدقين..

قرب وقت اذان العصر...

ابوي وخواني راحو يتلبسون استعدادا...للدفن..
وسارو..

ونحن..صج متاثرين..

...اقول في خاطري..اخوي صج مات..

وبيروح عنا للابد..

وبيندفن تحت التراب..

الله يرحمه ان شاء الله

فجاه ونحن في غمرة احزانا..

سمعنا حس طفله..تراكض بالحوش..

ودخل علينا شخص ما توقعناه..

ما صدقت عيوني...

معقوله...

...بكثر الحزن اللي كان مالينا..

حسينا بالفرح..

حسينا بالامل...

لان هالشخص...

يقدر يغير..من حالنا...

كان هذا الشخص..قريب ع الوالده..

قريب علينا كلنا..

انسان ملتزم,,,

يخاف ربه..

...هذا الشخص..كان خالي..الله يحفظه..

حضر مع زوجته وبنته..الصغيره..

تفاجأنا بوصوله...لانه كان ياي من الدمام..

واستغربنا...وصوله بهالسرعه مع ان الخبر ياهم متاخر..

يوم شفناه حضناه ويلسنا نصيييييح....

كان مستعيل يبي يلحق ع الدفن

جاف امي وسلم عليها..

وسالنا وين المقبره وقلناله ما نعرف..

وهو طالع..

لحقناه..شفنا جارنا..ماقصر خذاه معاه..للمقبره..

خلصت مراسم.الدفن..

ردو ابوي..خالي..وخواني..

تيمعنا حولين خالي..

قالنا عظم الله اجركم..

وقعدنا نبكي..

سأل..الوالد..عن تفاصيل..الحادث...

بعدين اختي الكبيره..قامت تجهز للافطار..

بالرغم انا صيام..بس والله ما حسينا بالجوع..

همومنا شغلتنا..

واختي كانت محتاره من غير الوالده..شتسوي..فطور...

بصراحه هي ما كان لها نفس لاي شي..

وشوي..الا يوصلنا فطورنا من الجيران جزاهم الله الف..خير..

واذن المغرب..

محد طاع ييلس..ع السفره..

خالي..قالنا حرام...الموت علينا حق..

وطلب منا نبل ريقنا..ونبطل صيامنا ع الاقل..بتمره..

بعدين توجهوا للصلاه..في المسيد..

وهلو علينا الناس من يديد..

وكالعاده..

في كل عزاء..تيي..محاضره...تحاضر..في الحريم..

وتدعي للشخص المتوفي..

المهم...مر الوقت..

وراحو الناس...

وخلا البيت..

تجمعنا مع خالي...في حجرتنا..بعد ما تطمنا ان الوالده راقده

كنا نبكي..حضنا وحاول يهدينا..

قال.."لا تبكون.."

"كانكم تعترضون على قدرة ربكم"....والنعم بالله...

وبعدين قالنا معلومه..حسيت انها جلطت الدموع اللي في عيني

قالنا.."ما تعرفون ان دموعكم مثل الجمر عليه في قبره!!!!"

استغربنا لهالكلام...تفاجأنا..ومسحنا دموعنا..

نبي نسمع ونتعلم منه اكثر..

قال "يا بناتي هذا بدال ما تدعون له..

الحمد لله ..الله راضي عنه..توفى وهو شاب..احسن ما يكبر وتزيد ذنوبه..

وقالنا الله سبحانه وتعالي..دايما ياخذ الطيب..

وغير هذا..ارواح الناس..بايد رب العالمين..

والحمد لله انه مات ..في هذا الشهر العظيم..وفي الاواخر.."
وذكرنا بان بهالشهر تفتح ابواب الجنه وتغلق ابواب النار..

بصراحه بكثر ..الحزن اللي فينا..

استانسنا..بكلام خالي..

زرع فينا شي من الامل...

وصانا بامي..قال "لا تهدونها.. بروحها..ولا تعطونها فرصه وحده تفكر..فيه..حسسوها انكم معاها بكل لحظه..ولا تبكون جدامها"

وعلى طول رحنا للوالده..تجمعنا حوليها..

اللي كان مضيق صدورنا ان امي ما تكلمت من ليلة الوفاة..ولا كلمه..

خفنا عليها..

شوي خالي قال خلونا بروحنا..

وقعد مع الوالده..يحاول يهديها..

زرع فيها الامل..مثل ما زرعه في قلوبنا...

الوالد قاعد بالصاله..في عالم ثاني..

تعرفون ليه.؟؟.

كنا حاسين فيه..

ابوي كان يحس انه السبب في موت اخوي..

و ندمان ع اللي سويه مع اخوي..

في خاطركم تقولون شسوا ابوي..!!!

ابوي..كان شديد شوي..في معاملته مع المرحوم..اخوي.

كان يعاقبه اذا تاخر برا..

يحرمه من المصروف.

واذا فكر يعطيه..ما يعطيه وايد..

هذا من خوفه عليه...

كنت احس بعيونه ندم..على معاملته لاخوي..

كان شديد معاه بمعنى الكلمه...

مع انه كان طيب..

..مب لان ما يحبه.

بالعكس..بس ابوي قرن معنى المحبه والحرص..بالشده..

كان يشد عليه..ويتحرا انه..الشده..راح تخليه ريال!!!!

بعكس معاملته لنا..كان بمنتهى الطيبه..التسامح..

انا ماقولكم انه قاسي..بالعكس كان في قمة الطيبه..

من هذا الموقف.....وهو وفاة اخوي..

تغيرت معاملة ابوي..لنا

وخاصه الاولاد..

مخليهم على هواهم..يلبيلهم كل طلباتهم..

..بس للاسف..ماقدر يوازن بين الشده والتساهل..

كان متساهل في كل شي..

اي شي يبونه يلبيه لهم..

كان في فرق كبير بين معاملة ابوي لاخوي الله يرحمه..واخواني الثانيين..

كان في قمة التساهل معاهم..

وهذا السبب...الرئيسي..اللي خلا اخواني..يودرون الدراسه..

ويتجهون للاعمال الحره..

مع ان كان يطمح بانهم يكملون تعليمهم ..ويتخرجون..ويرفعون راسه

بس يلا الحمد لله

.......

..صباح اليوم الثاني..

يوم انزل الصاله تفاجأت بالمنظر..

معقوله..

امي يالسه. (*35) ..و بويها نووووور..

قاعده تسولف مع خالي..

اي خال..ان المفروض...اسميه ملاك..ايه والله..

قدر يقلب حالنا..

رحت وانا مبتسمه حبيت ع راسها..

وقعدت معاها..اناظرها..

مو مصدقه عيني..

تسولف ..بس في عيونها..مسحة حزن

ما لومها...فقدت جزء منها..

فقدت ولدها..الغالي..

الحمد لله..على كل حال..

هذي كانت اول صفحه من صفحات الامل..بعد وفاة اخوي..

زرعها خالي الله يحفظه..

اللي...يلس معانا..ما يقارب الشهرين..

جزاك الله خير يا خال..

هذي قصتي..

ومن هذا الموقف...تغيرت..شخصيتي..

تصرفاتي..

والحمد لله..كسبت..رضا الرحمن عني..

بصلاتي ..والتزامي بها..

بس مادري..اكملها...ولا اكتفي بهذا القدر...!!! (*23)

انتظر ردودكم...

تحياتي لكم..

سحايب

جلنار · 17-11-2005, 11:22 PM

الغلا (*35) سحايب

تسلم هالانامل (*40)
الصراحة عيشتينا بجو القصة

ماشاء الله اسلوب ..
سلس وحلو ورائع

لو ماعليك امر يا سح سح ياليت تكملين
اندمجت معك (*23)

وماشاء الله على هالخال ونعم الرجل
الله يخليكم لبعض..

والله يطول بعمر الوالدة والوالد
ويخليهم لكم ..

سلامي ابعثه لك
مع تمنياتي لك بالصحة والعافية

دلوعة أمها · 17-11-2005, 11:24 PM

سحايب

قصه مؤثره ....
ونهايه برضى الله ....

جزا الله خالك الف خير .. وان شاء الله تكتب في موازين اعماله
ورحم الله اخوك وادخله الجنه في درجة الصديقين والشهداء
ويجمعنا واياكم في جنته يوم القيماه

..........

سٌٍُـ حٌُِ ـآيِّبٌٍ · 18-11-2005, 12:02 AM

الغلا جلنار... (*35)

أشكرك من اعماق قلبي..

على تعايشك مع احداث قصتي...

كان موقف صعب في حياتي..

ولكن تعلمت منه الكثير..

واشكرك ايضا على تشجيعك لي..

تقبلي مني كل الشكر عزيزتي...

والله لا يفقدج عزيز

أدوات الموضوع
عرض نسخة للطبع إرسال هذه الصفحة إلى بريد إلكتروني
أنماط العرض
النمط الخطي الانتقال إلى النمط المختلط الانتقال إلى النمط الموضوعي

مواضيع مشابهه
الموضوع	كاتب الموضوع	المنتدى	ردود	آخر مشاركة
شاركوووني هاللعبه...أطرف موقف مر عليك	سٌٍُـ حٌُِ ـآيِّبٌٍ	العاب - ترفيه - مسابقات	61	15-01-2006 10:12 PM
مسجـــــــــــــــــــات على اسماء البنات	أحاسيس	رسائل - مسجات - مسج - رسائل جديدة 2009	6	09-09-2005 08:48 PM
وينك احس كني في حياتي غريب ........	المحرووووم	الشعر والخواطر المنقولة	4	10-03-2005 08:35 AM
بـــــزوغ أمل في حياتي ....	بقايا أمس	شعر - قصائد - حب - عتاب - جديدة	14	22-01-2005 04:54 PM
صفحة من دفتر حياتي	I0 _ 0I	الشعر والخواطر المنقولة	8	04-12-2004 07:20 PM

مستخدمين موجودين حالياً يشاهدون الموضوع: 1 (0 أعضاء و1 ضيوف)