أخوي بقايا أمس

تسلم والله على التواصل الحلو
والتشجيع المستمر

اقتباس والله هالولد رايق يعني مو مضيق صدره الا خمس ريالاته الناس وين وهو وين ؟؟

احمد ربك اني خاليتها خمسة ريال
والا بأول كنت بخليها ريالين
بس قلت مابي افشلك قدام العربان (*10)

وبعدين خفت تجيك طحجة على ظهرك
من حدى ابطال المسلسل >> ياشيخة العبي غيرها تراك انت اللي كاتبة المسلسل لا تلزقينها بالابطال(*33)

اقتباس أنا حاس ان جمان بتروحنا في ستين داهية

لا عاد يا بقايا مااسمحلك
لاتظلم البنية (*33)

اقتباس المسلسل بطولتها بس ودي يسجنها الضابط ولا يعطيها اكل الا بعد يومين ويعطيها سندويش تونه بس ...

تبي اسجنها
ترى عادي اسجنها
لا ولو تبي البسها التهمة بعد ماعندي مانع

تستاهل انا قايلة لها هكاليوم هم تسجنن
اني بنتقم منها بالمسلسل الخاينة >> والله يانتي حاقدة (*33)

وبعدين وش تونتة اللي بتعطيها وشو له الخساير
من فوقها صمولية مالطوط بها جبنة
لافاش كيري " جبنة مثلثات البقرة الضاحكة " (*33)

اقتباس وبعدين ضح ضح وش فيك خايفة الي يشوفها يقول هي الجاني ..!!!

وش يدريك يمكن هي فعلاً القاتلة
انت تدري عنها (*37)

لا يكون بس انت القاتل >> والله حاله ارسيلك على بر من فيهم القاتل (*33)

اقتباس اقول اركدي بس يكفينا الي نسمعه من جمان وخططها

وش يدريك يمكن تطلع جمان
ارحم من ضحيت

ويقولون لا تغرك المظاهر ماتدري
وش وراء هالوجة البريء (*33)

اقتباس تسلمين جلنار الله يسعدك امتعتينا وبانتظار الجديد دائما

الله يسلمك ويعافيك
والله انا اللي متمتعة بردودكم >> تراك ذبحتيهم فصفصتي ردودهم
فصفصة فشلتيهم كل الكلمة والثاني تعلقين عليهم
خلاص بيهابون يردون عليك

المعذرة ترى اللي ترد وراء الاسهم هذي جلنورة
اللي تحبها جمان اما اللي قبل جلنارالمخرجة اللي منشفه ريق
جوجو >> لا توخذني ترى عندها انفصام بالشخصية (*33)

وانا بانتظار ردودكم
سلامي ابعثه لك
مع تمنياتي لك بالصحة والعافية >> اقول تراك غثتيهم ماصار رد صارت قصة لو فيك خير كان بدل هالهذرة الزايدة
نزلتي الحلقة العاشرة(*10)

أشكر كل من تواصل معي في قراء ة القصة والرد عليها ..
ويلا اليوم الحلقة بالمرة حلوه
ولا بعد مطيته لكم علشان تستانسون وتنسون همومكم
شوي .. بس ادعو لي (*10)

ولآن وبعد ان فكرت جمان للوصول الى حل للتخلص من الجثة وناقشت الطريقة
مع اصدقائها لنتابع ما جرى ..


الحلقـــة العـــاشرة


دلوعة أمها: أنا مو قصدي يا الزلزال .. اتمنى أن الله يوفقكم وتعدي
هالمسأله على خير !!!

رجع الأصدقاء الى منازلهم على أمل أن تنتهي هذة الورطة في أسرع مايكون ، وفي اليوم
التالي خرج كل من جمان ومعها أصدقائها الزلزال وبقايا أمس و أمير الذوق
الى حيث وجود الجثة في بلاج الجزائر .

بقايا أمس: أقوووول يا جمان .. أنتي متأكدة ان هذي الفكرة راح تنجح بسهولة ؟!!

جمان: وش فيك يا بق بق الظاهر بديت تخاف .. لا يكون بس
أنت خواف !!

بقايا أمس: وشلون يا جوجو ما أخاف وحنا ناوين نطلع جثة آدمي
من تحت الأرض !!

جمان: قصر حسك لا أحد يسمعك ونروح فيها .

الزلزال: بقايا معه حق يخاف كذا ترى المسألة مو هينه بالدرجة اللي تتصورينها
يا جوجو .

جمان : ماعليه ترى كلها دقايق معدودة بس ونفتك من هالورطة للأبد .. اصبروا
علي شوي وبتشوفون أفكاااار أختكم جمان العبقرية .

أمير الذوق : ايه الله بس يستر من اللي جاي .

الزلزال: الظاهر أمير الذوق صار يخاف مثل بقايا !!

أمير الذوق: أكييييد يا زلزول لازم أخاف والا أنا ويش لي جابني معكم
لو قاعد بالبيت اتصفح لي منتدى روائع واشارك بساحة
الألعاب والصرقعة كان ابرك لي من مقابلكم .. كان الحين تلقاني
مستانس .. آه آه

جمان : يلا يا جماعة خلونا ننزل العربية وأدوات التنظيف .

قام الأصدقاء بانزال كل المعدات الخاصة لتنظيف الساحل .

جمان:يالله يا زلزول نظف هالقمامة اللي متجمعة لها من سنة .

الزلزال : والله حاله أنا على آخر عمري أشتغل عامل نظافة !!

بقايا أمس: بس ترى النظافة من الايمان يا زلزول .

جمان ( بصوت منخفض) : يالله يا جماعة خلونا ننظف شوووي شوي لين نوصل
مكان الحفرة اللي فيها الجثة .

و اخذ الاصدقاء الاربعة يتظاهرون بتنظيف ساحل البلاج وشيئاً فشيئاً حتى وصلوا مكان
الحفرة التي بها الجثة .

جمان:يالله ياشباب اليوم يووومكم ابيكم تبيضون الوجه .

بقايا أمس: بصراحة يا جمان قلبي قام يدق دق من الخوف .

أمير الذوق : و أنا بعد مثلك يا بقايا قام قلبي يدق من الخوف وخايف
اطيح عليكم .

جمان: ماله داعي كل هالخوف الزايد والله انكم جوارين .. لازم تصير
قلوبكم قوية مثلي أنا والزلزال .

بقايا أمس : انا هذا اللي مستغرب منه وشلون انت والزلزال قلبكم بارد كذا وحنا
جايين نطلع جثة ميت !!

الزلزال: يمكن علشاني أنا و أختي جمان كنا نشرب ريد بوووول .

"هذا فاصل اعلاني دعاية لـ ريد بول بيعطيك جوانح (*33) "

في هذة الأثناء أخذ الاصدقاء الأربعة بتنظيف الحفرة من الأوساخ ونزلت جمان
كالمعتاد .. متظاهرة للمارة من عامة الناس أنها تزيل الأوساخ
من داخل الحفرة .

الزلزال: يالله يا جمان بسررررعة قبل لا يجي أحد .

جمان : لحطة يا زلزول قاعدة أدور الكيس اللي فيه الجثة الظاهر طايح عليه
رمل وااااجد !!

بقايا أمس: بصراحة أنا مني قادر أشوف هالموقف الصعب .. عجلي يالله
يا جوجو حرام عليك .

الزلزال : خل قلبك قوي يا بقايا .

جمان : لقيتها يا شبااااااااب .. ساعدوني خلونا نطلعها برى .

قام الأصدقاء بإخراج الكيس من الحفرة بعد أن تأكدوا أنه لا يوجد أحد من المارة
بالقرب منهم .

جمان : يالله يا بق بق رح بسرررعة وافتح شنطة السيارة وحنا جايين وراك
علشان نحط الكيس بالشنطة .

و أخذ بقايا أمس يركض بإتجاه السيارة يتملكه خوف شديد ، في هذه الأثناء تبعه
اصدقائه الباقين حتى وصلوا ناحية السيارة .

جمان: يالله بسرعة يا شباب شيلوا الكيس ودخلوه بشنطة السيارة .

وضع الأصدقاء الكيس الذي بداخله الجثة في شنطة السيارة وساروا مسرعين
الى مكان بعيد لا يشك فيه أحد .

الزلزال :لا تسوقين بسرعة كذا يا جوجو طيحتيلنا قلوبنا .

بقايا أمس: قلوبنا طااااحت من زماااان يا زلزول من يوم ماشفنا هالمصيبة .

جمان: لازم ناصل بسرعة قبل لا يجي الليل ويشك فينا أحد .

أمير الذوق : وين بتاخذون الجثة يا جمان ؟!!

جمان: أحسن شي نوديها للبرفي مكان يكون واسع علشان يكون صعب
على أي أحد يكتشفها هناك .

بقايا أمس: هذا اللي أتمناه أن مايجي يوم من الأيام ويكتشفون الجثة
ويحكمون علينا بالإعدام .

الزلزال: أي إعدام يا بق بق الله يهديك حنا ماقتلناه !!

بقايا أمس: بس حنا مابلغنا الشرطة يوم شفنا الجثة ولا فوق كل هذا حنا
قاعدين الحين نرتكب جريمة ثانية .

جمان: يؤ يؤ أشوفكم قاعدين تخورون بالكلام .. أي قتل و أي بطيخ هذا
اللي تتكلمون عنه !! حنا ماقتلنا احد كل اللي سويناه ان حنا ابعدنا أنفسنا عن الشبهات
وتحقيقات الشرطة اللي ماتخلص من سين وجيم .. ويعني هذا جزاتي
اللي قاعدة أحامي عنكم ؟!!

أمير الذوق: انتي قاعدة تحامين عن الكل وأولهم تحامين عن نفسك
مو بس حنا والا نسيتي انك شريكة معنا .. وبعد لا تنسين ان كل هالبلاوي
من تحت رأسك .

جمان: بل بل بل كل هذا شايله بقلبك يا مرمر .. لا يا أخي مانسيت
وعلشان كذا أنا قاعدة أخاطر بروحي علشان اطلعكم من هالورطة .

أمير الذوق : انالله رجعت تقول اخاطر بروحي وحنا مو معك هذانا بعد
نخاطر باروحنا ؟!!

الزلزال: خلاص يا جماعة وخلونا نفكرالحين وين ندفن الجثة ترى قربنا
نوصل للبر .

بقايا أمس : يا جماعة كأني أشوف من بعيد سيارة شرطة واقفة .

الزلزال:ايه صدق يا جمان هذي سيارة شرطة واقفة .

جمان: اووووه يا جماعة تراني نسيت أن في هالمنطقة نقطة تفتيش .

الزلزال: ويش ويش ويش تقولين يا جمان وليش ما قلتي لنا قبل .. حاولي
ترجعين يا جوجو قبل لا نرووووح فيها .

جمان : فااات الآوان يا زلزول هذا الشارع اتجاه واحد ومايصير ارجع
أو اخذ لفة .

بقايا أمس : يعني وشو يا جمان راحت علينا !! يا ويلي ويلاه أنا قلت منب
جاي معكم وشو اللي جابني بس .




شارع ذو اتجاه واحد (*16)

الزلزال : وش العمل يا جمان لازم تشوفين لنا حل قبل لا نروح فيها .

جمان: انت وش فيك كل الكلمة والثانية لا نروح فيها لا نروح فيها
تراك ازعجتنا .. وبعدين هذاني قاعدة أفكر وش نسوي في هالورطة الجديدة !!
بس خلاص يا جماعة لقيتها مافيه غيرها .

الزلزال: قولي يا جمان بسرعة .

جمان: بنخلي أمير الذوق يسوي روحه مريض بالمرة وحنا رايحين نوديه
للمستشفى ، وكذا راح يفتشون بسرعة ويخلونا نمشي اذا شافوا
أمير قاعد يتألم من المرض .

أمير الذوق : مالقيتي غيري يا جمان تراني ما أعرف أجيد التمثيل زين .

جمان: مافيه غيرك يا مرمر ويالله بسرعة انسدح على الكرسي وسو
روحك تصيح من شدة الألم .

بقايا أمس : والله أني صرت أخاف من أفكارك يا جمان .

أمير الذوق : يا ويلي ويلاه أنا خايف ننكشف ونروح فيها .. شكلك يا أمير
الذوق بتروح روووحك وانت للحين عزوبي مابعد اعرست وتهنيت
بعش الزوجية ومابعد جاك عيال تلعب معاهم وتمشيهم
وتشريلهم كل شي يبغونه و يطلبونه ..

الزلزال: يالله تفضل .. حنا في ويش و أمير في ويش .. أقول يالحبيب
أنت هذا مو وقت أحلام اليقظة خلنا بالاول نخلص من هالمصيبة
وبعدين كمل أنت والعيال مشواركم وتمشيتكم بمحلات الفيصلية .

بقايا أمس : يالله يا جماعة خلونا ننفذ خطة جمان .

جمان : خلاص يا جماعة هذانا وصلنا اسكتوا وأنت يا أمير مثل
ماوصيتك أول ماتشوف الشرطي ارفع صوتك بالصياح .

في هذة الأثناء وصلت جمان واصدقائها ناحية نقطة التفتيش ..

الشرطي (رماد انسان) : السلام عليكم ..

جمان :وعليكم السلام طااااااال عمرك .

الشرطي (رماد انسان) : على وين يا جماعة ؟!!

جمان: طاااال عمرك عندنا مريض بنوديه للمستشفى .

الشرطي (رماد انسان) : ممكن أشوف مريضكم ؟!!

جمان : ايه طال عمرك هذاه قاعد على الكرسي ورى وما يقدر يتحرك .

في هذه الأثناء نظر الشرطي ( رماد انسان) الى المريض أمير الذوق ولكنه
ولشدة خوفه لم يتحرك ساكن ولم يصرخ من شدة الألم مثلما
اوصته جمان .. فما كان من الزلزال إلا أن ركله برجله اليمنى
فظل يصرخ من الألم .

الشرطي ( رماد انسان) :الظااااهر صديقكم تعبان حده ؟!!

جمان : ايه والله طال عمرك تعبان ومحتاج نوديه للمستشفى في أقرب
وقت ممكن .

الشرطي (رماد انسان) : طيب ممكن تفتحين شنطة السيارة بسرررعة .


نهايــــة الحلقــــة العاشــــرة

وش تتوقعون بينفضحون الاصدقاء على يد الشرطي ( رماد انسان )
ويطيحون بمصيبة جديدة
علشان تعرفون تابعوا الحلقة القادمة (*37)

الغلا (*35) ضحيت بعمري

تسلمين والله على هالتواصل
الحلو (*40)

اقتباس يوووووووووووه والله تحمست حيل

والله تحمستي
أجل هذا المطلوب اني اشوقكم
علشان تابعوني (*10)

اقتباس كله بسبت جمان الله يهديها يوووووووووووووووه ورطتكم ولاورطتنا رحنا فيها خلاص

ايه ابيك تستانسين
وتنبسطين بقية الحلقات بتلومون جوجو
يعني انتي طالعتي منها (*33)

اقتباس مابي ابي ارجع ديرتي رجعوني اهئ اهئ اهئ..

مهب على كيفك
وش تبيننا نسوي بالمسلسل نوقفه
والا نسيت العقد اللي موقعة عليه >> مصدقه روحها المخرجة (*33)

سلامي ابعثه لك
مع تمنياتي لك بالصحة والعافية

الغلا (*35) شادن

تسلمين والله على هطلة

اقتباس يبيهم يفتحوون الشنطه اجل راحوا في خبر ان وكان

مو بس بيروحون بخبر ان وكان (*13)
لا بيروحون بخبر ان وكان واخواتهم
والعائلة الكريمة كلها(*33)

اقتباس بس اتوقع تصرفهم جماان بافكارها الجهنميه

امحق من افكار على هالجمان (*33)

انتم لو بس تسلمون منها ومن
أفكارها الجهنمية كان انتم بنعمة (*13)

نسيتي ان كل هذا من تحت رأسها >> بتشوشك عليها (*10)

اقتباس يلااا شوقتينا يا جلناار نبي التكمله بسرعه

ان شاء الله قريب
بهاليومين انزلها (*40)
انتم تأمرون امر من عيوني (*15)

كم اسعدني تواصلك
سلامي ابعثه لك
مع تمنياتي لك بالصحة والعافية