أحاسيس

(*3)(*3)(*3)(*3)

السلام عليكم و رحمة الله و بركاته

بما انو كاثره هالايام الناس اللي يتزوجون و يخطبون و يطبخون و ينفخون

( مع اني مدري وش دخل آخر ثنتين بس للسجع )

بغيت أنقلكم بعض النصايح للناس اللي ناوين يعرسون .. و الناس اللي
أعرسوا و توهقوا محد قالهم يعرسون بدون ما يعلموني

هذا جزااااااكم

1- انتا يالزوج !! .. استح على وجهك .. شكلك بصروال وفنيله مهوب لائق
ابدا .. من زين كراعينك هالشهب وإلا من زين جسمك هالحين يومك تلبس تسذا
؟؟ .. البس قميص مغربي محترم ونظيف ,, ولا يكون عقب نوم .. خله على
الأقل يستر كرشكّ .. ولو لبستا تكميلة رياضه محترمه ,, طلع الفنيله برا
البنطلون ,,

2- انتي يا حرمة اللي فوق .. ما يمنع تساعدين رجلتس في اختيار قمصان
البيت اللي هو يلبسها .. او حتى تشرينها انتي له .. وتهتمين انتس
تتابعين نظافتها بعد .. مهوب تشتكين من وصاختها وتخلينها معلقه قدامه
يلبسها كل مافصخ ثيابه !! .. واحرصي كذلك على تخصيص ملابس يلبسها هو
للنوم حتى ما يضايقتس بريحة النوم والعرق ...

3- انتا .. هيه !! ماله داعي تنادي المدام بدون اسم وإلا تسميها بأسماء
هي تكرهها .. اما شف لها لقب محترم ويوسع صدرها او على الأقل نادها
بكنيتها .. ام فلان مثلا !!.. ونفس الشيء للمره ..

4- إذا سويتي له عمل معين من ترتيب او طبخ مثلا ,, اكيد تبينه يمدحتس
ويمدح شغلتس ,, تراه يشوف بس ما تعود يمدح (طبعنا كذا) .. ما يمنع لو
تسألينه عن رأيه في هالشيء مثلا وتبينين له الجهد اللي سويتيه .. ولو
قال لتس " وش الله حادّتس؟ " قولي " علشان هالعيون اسوي اي شيء" ..
مهوب لازم يقول لتس " تسلم لي عيونتس " .. بس تخيليه قالها !!

5- حبيبي .. ترى مهوب عيب ابد تتطيب للمدام .. وياليت بعد تزين ريحة
اثمك بعلك فراوله من باطوق .. ولا يهمك غندور .. يابس والنكهه تروح
بسرعه .. وياليت تكون قوارير الطيب عند مدخل البيت ,, مهوب عند
التسريحه .. يتطيب منه اللي طالع !! لأ .. نبي اللي داخل البيت هو اللي
يتطيب .. اهل البيت هم اولى بالريحه الزينه .

6- اهتمي بشكل زوجتس قبل يطلع من البيت .. تابعي نظافة ملابسه ..
وريحتها .. وتابعي نظافة النعال او الكنادر اللي يلبسها ,, ولا يلبس
شراب متشقق ,, ترى الناس تذم زوجة الرجل الوصخ ,, مثل ما تذم زوج
المرأه المهمله !!

7- على الغداء .. لا تقعد تناظر في الرز واللحم وتنسى المدام .. عطها
نظره .. عطها لحمه .. عطها ابتسامه .. ولا تقعد تماطق بالمضغ ,, صكّ
اثمك وانتا تمضغ !!! (قسم بالله دبل تسبدي واحد يمضغ علك في سياره كانت
ورا سيارتي عند الإشاره ,, ما قدرت اشيل نظري عن المرايه اللي عاكسه
خشته وهو يمططها ويعفطها .. اعوذبالله تقول خشته خلاطة سمنت)

8- انتي بعد .. اهتمي بريحة الملابس والشعر .. ياناس ترى والله الريحه
لها تأثير مهوب صاحي في التقريب والتنفير من الشخص المعفّن !! وترى على
فكرة فيه اختراع اسمه "حق الأباط" مدري وش اسمه العلمي ,, بس هو يحط في
الإبط عقب الدش ويمنع الريحه كم يوم .. وطبعا إزالة شعر الإبط لكلا
الطرفين يعتبر من كمال النظافه ونقص الروائح .. والسنه كذلك امرت بذلك
!!

9- اسرار البيت .. والمشاكل او الخلافات البسيطه بين الزوجين ....
احذروا كل الحذر من خروجها عند الناس ,, مهما كنتوا مختلفين او بينكم
شيء ,, لابد من اللإبتسامه قدام الناس وكتم الزعل ,, والا صرتوا
بلحالكم فترى عقدة المرأه في دغدغة رجلينها وعقدة الرجال في دغدغة
اباطه !! والله يحط حيلكم بينكم !!

10- عقاب المرأه .. فيه تسلسل تم توضيحه في القرآن والسنه ,, يازوج
الزوجة الماصله .. اتبع الترتيب في العقوبه ولا تاخذ الحل الثاني او
الثالث قبل الأول ..

11- لا تكثر سب او تمصيل للمدام .. ترى تتعود عليها ومعاد يصير لها
تأثير ,, خلك منتظم في عملية التمصيل والهواش حتى يكون تأثيرها اقوى
ويكون فعّال (وقاتل احيانا)

12- الصراحه مافيه مثلها ابد .. يعني لو فيه عيوب في احد الطرفين ,,
فالمجامله والسكوت بتزيد المشكله وتزيد العيب ,, ولو الزوجه ما صارحت
زوجها فمن بيقول له عن هالعيب ؟ ولو انتا بعد ما علمتا مرتك باللي
ماتحبه فيها ,, فمالك داعي ابد وانتا تروح تسبها وتشرشحها عند الناس
... وتشتكي من اهمالها ومصالتها !!

13- الزوجه دايم مهمله وكسلانه ,,, وكل الحريم ماصلات بعد ... لا تفكر
ان حرمتك بتترك هالعادات فيها إلا لو قدرتا تخليها تترك القرقره
والدندره مع امها واخواتها في التلفون !! وهذا طبعا....... مستحيل !!
ريّح عمرك ..

14- السوالف اللي تدور بين الزوجين ,, خلوها اسرار بينكم ,, وماله داعي
الواحد منكم يقعد عند ربعه ويغازل زوجته !! او انتي بعد تقعدين عند
اهلتس وتعطين السماعه لأخواتس حتى يسمعون الكلام الحلو اللي يقوله لتس
,,

15- الزوجه .. يجب ان تكون صديقه لزوجها .. لكن تاخذ كورس اول في معنى
الصداقه ,, وحسن المحاوره والإنصات ... حتى لو تكلم زوجها عن شيء ما
يهمها ,, لازم تتفاعل معه وتكون امينة اسراره ..... هذا لو الزوجه فعلا
حريصه على تقوية علاقة زوجها بها ... ومافيها عيب ابد لو الزوج بعد
يشاور المدام في اي شيء ,, عطها اكثر من فرصه ,, جربها .. واحكم ..

16- يجب احترام افكار واهتمامات الطرف الآخر .. على الزوج انه يعطي
زوجته فرصه ووقت كافي للتعبير عن اللي في خاطرها .. مهما طالت المده ..
انتا نصفها الثاني ,, ولازم تحمل همومها وتتعرف على طريقة تفكيرها ..
وتعدل الغلط فيه .

17- اختاري الوقت المناسب للبس الزين .. وللكلام والغرام ولكل شيء
ناويه تسوينه ,, وقدري حالة الزوج في الوقت اللي تطري عليتس تكلمينه في
موضوع او تورينه شيء جايبته ,, او حتى تاخذين رأيه في فكره معينه !!
وافهمي ان الزوج مهوب دايما مهيّا لإستقبال افكارتس او كلامتس ,,,,

18- مع وجود الأطفال في البيت .. تنسى المرأه زوجها تماما ,, او هو على
الأقل يحس بهالشيء ,, ترى الرجل يحب يكون الطفل المدلل لزوجته ,, تماما
مثل ماالزوجه تحب دايما تكون في نظر زوجها طفله .... احرصي على عدم
إهمال الزوج من اجل الأطفال ,,, ولا تحرمينه من شيء بسبب الأطفال ,,
دبري عمرتس !!!

19- جلسات صامته + نظرات بالعيون + هدوووووء + ابتسامه = لحظات
رومانسيه يحتاجها الزوجين من فتره إلى اخرى .. اسكتوا شوي وخلوا العيون
تفضفض ..

20- قطعة ذهب .. تورته .. ورد .. قزازة عطر (صغيرة 50 مل) ,,, او حتى
لعبة تجيبها لزوجتك ,,,, تسوى الدنيا عندها !! مهوب لازم تكون غاليه
حتى تنتظر مناسبه وتجيبها .. لأ .. القيمه الحقيقيه في كونها جت منك
انتا .. لا تتردد ابد .. ولو ما امداك تروح تشري لها ,, لفّ على اقرب
بقاله عند البيت وانتا راجع من الدوام واشتر لها قطعة كاكاو بريالين ..

بقايا أمس

بسم الله الرحمن الرحيم
السلام عليكم ورحمة الله وبركاته

(*4) الاخ
mutair

مشاركة رائعة جدا
لكن ودي اقولك كلمة
انت جبتها بالعامية رغم انها نصائح جيدة
يا ليت كنت صغتها
بصورة اجمل
عموما المشاركة تستحق الاشادة
وخصوصا
1- انتا يالزوج !! .. استح على وجهك .. شكلك بصروال وفنيله مهوب لائق
ابدا .. من زين كراعينك هالشهب وإلا من زين جسمك هالحين يومك تلبس تسذا (*16)(*16)
<<<<تراه منهم (*15)

الف الف شكر

تحيتي لك

كيمو

بسم الله الرحمن الرحيم
السلام عليكم ورحمة الله وبركاته

الاخ (*4)(*27)
mutair

مشاركة رائعة جدا (*27)

يوهاش

مشكور وعن جد محتاجين لهذي النصايح

الكنز

انت ماخليت شى فضحت كل شى ياهكوتي ما بقى شي خلاص بان كل شى .

لك تحياتي

مشاغب

يقطع ام ابليس خلة جدت ام شغالتكم

وش ها الروعة يا روعة

الله يعطيك العافية


ولا تحرمنا ها المواضيع الحلوه

يا قمر

alnour

بسم الله الرحمن الرحيم
إن الحمد لله، نحمده ونستعينه، ونعوذ بالله من شرور أنفسنا ومن سيئات أعمالنا، من يهده الله فلا مضل له، ومن يضلل فلا هادي له، وأشهد أن لا إله إلا وحده لا شريك له، وأشهد أن محمدا عبده ورسوله.
- ‎كل حاجة جديدة تدخل بيتك لها كتالوج تشغيل , إلا الزوجة

فداء

ههه حلو ......


مشكور على النصائح......